ތުރުކީ ބަލިކޮށް، ޕެރަގުއޭ އިން އުންމީދު ހޯދައިފި
20 ޖޫން 2026 | ހޮނިހިރު 05:59ޕެރަގުއޭގެ ފުރަތަމަ މެޗުގައި އެމެރިކާ އަތުން ބަލިވެފައިވާއިރު، ތުރުކީގެ ފުރަތަމަ މެޗުގައި ވަނީ އޮސްޓްރޭލިއާ އަތުން ބަލިވެފައި. ދެ ޓީމަށް ވެސް މޮޅުވާން މުހިންމު މެޗުގައި، ޕެރަގުއޭ އަތުން ބަލިވެ ތުރުކީ އަށް ވަނީ މުބާާރާތް ނިމިފައި.
މެޗުގައި ލަނޑު ޖެހުމަށް ފަހު ޕެރަގުއޭގެ ކުޅުންތެރިން އުފާާ ފާޅު ކުރަނީ. | ރޮއިޓާސް
މިހާރު ކުރިއަށްދާ ފީފާ ވޯލްޑް ކަޕް ގުރޫޕު ޑީގައި ތުރުކީއާ ދެކޮޅަށް ކުޅުނު މެޗުން މޮޅުވެ، ޕެރަގުއޭ އިން އުންމީދު ހޯދައިފި އެވެ.
އެމެރިކާގެ ލެވިސް ސްޓޭޑިއަމްގައި ހޮނިހިރު ދުވަހުގެ ހެނދުނު ކުޅުނު މެޗު ޕެރަގުއޭ އިން ކާމިޔާބު ކުރީ 1-0 އިންނެވެ. މެޗުގައި ޕެރަގުއޭ އިން ލަނޑު ޖެހީ ވެސް ފުރަތަމަ ހާފުގައި އެވެ.
މެޗު ފަށައިގެން ދެ ވަނަ މިނެޓުގައި ޕެރަގުއޭ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޕެރަގުއޭ އަށް ޖަހައިދިނީ މަތިއަސް ގަލާޒާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޖޫލިއޯ އެންސީސޯ އެވެ.
މެޗުގެ ފުރަތަމަ ހާފުގެ ފަހު ވަގުތުގައި ޕެރަގުއޭގެ މިގޭލް އަލްމިރޯން އަށް ވަނީ ސީދާ ރަތް ކާޑު ދައްކައިފަ އެވެ. އެއީ މެޗުގައި ހިނގައި ދިޔަ ހަމަ ނުޖެހުމެއްގެ ތެެރެއިން، އަނގަ މަތީގައި އަތް އަޅައިގެން ވާހަކަ ދެއްކުމުންނެވެ. މެޗުގެ ބާކީ ބައި އެއް ކުޅުންތެރިޔަކު މަދުކޮށް ކުޅުނު ޕެރަގުއޭ ކޮޅަށް ލަނޑެއް ޖެހޭ ގޮތެއް ތުރުކީ އަށް ނުވި އެވެ.
ޕެރަގުއޭގެ ފުރަތަމަ މެޗުގައި އެމެރިކާ އަތުން ބަލިވެފައިވާއިރު، ތުރުކީގެ ފުރަތަމަ މެޗުގައި ވަނީ އޮސްޓްރޭލިއާ އަތުން ބަލިވެފައި އެވެ. ދެ ޓީމަށް ވެސް މޮޅުވާން މުހިންމު މެޗުގައި، ޕެރަގުއޭ އަތުން ބަލިވެ ތުރުކީ އަށް ވަނީ މުބާާރާތް ނިމިފައި އެވެ. މި ގުރޫޕުގެ އެއް ވަނައިގައި އެމެރިކާ އޮތް އިރު، ދެ ވަނައިގައި އޮތީ އޮސްޓްރޭލިއާ އެވެ. ތިން ވަަނައިގައި ޕެރަގުއޭ އޮތްއިރު، ޕެެރަގުއޭ އަށް ދެން އޮތީ އޮސްޓްރޭލިއާއާ ދެކޮޅަށް ކުޅޭ މެޗެވެ.
