އޮސްޓްރޭލިއާ ބަލިކޮށް، އެމެރިކާ އަނެއް ބުރަށް

މިހާރު ކުރިއަށްދާ ފީފާ ވާރލްޑް ކަޕް ގުރޫޕު ޑީގައި އޮސްޓްރޭލިއާއާ ދެކޮޅަށް ކުޅުނު މެޗުން މޮޅުވެ، އެމެރިކާ އިން މުބާރާތުގެ އަނެއް ބުރުން ޖާގަ ހޯދައިފި އެވެ.

އެމެރިކާގެ ސީޓަލް ސްޓޭޑިއަމްގައި ހުކުރު ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކޮށްފައި ވަނީ 2-0 އިންނެވެ. މެޗުގެ ފުރަތަމަ ހާފުގައި އެމެރިކާ އިން ވަނީ ދެ ލަނޑު ޖަހައިފަ އެވެ.

މެޗު ފަށައިގެން ރަނގަޅަށް ކުޅެމުން ދިޔަ އެމެރިކާ އިން ވަނީ، 11 ވަނަ މިނެޓުގައި ލަނޑު ޖަހައި ލީޑު ނަގައިފަ އެވެ. އެއީ އޮސްޓްރޭލިއާގެ  ކެމެރުން ބާގެސް އަތުން ބައި ކޮޅަށް ވަތް ލަނޑުންނެވެ. 

އޭގެ ފަހުން ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، އެލެކްސް ފްރީމަން ވަނީ އެމެރިކާގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. އެ ލަނޑު ބަލައި ގަންނަން ރެފްރީ ނިންމާފައި ވަނީ ވީޑިއޯ އެސިސްޓެންޓް ރެފްރީ (ވީއޭއާރު) އިން ވެސް ބެލުމަށް ފަހު އެވެ.

މެޗުގެ ފުރަތަމަ ހާފު ދެ ލަނޑުގެ ލީޑެއްގައި އޮވެ އެމެރިކާ އިން ނިންމާލިއިރު، ދެ ވަނަ ހާފުގައި ވެސް އެ ޓީމަށް ވަނީ ލަނޑު ޖަހަން ފުރުސަތު ލިބިފައި އެވެ. އަނެއްކޮޅުން މެޗުގައި ލަނޑު ޖަހަން އޮސްޓްރޭލިއާ އަށް ވެސް ފުރުސަތު ލިބުނެވެ. ނަމަވެސް ފުރުސަތުގެ ބޭނުން ކުރެވޭ ގޮތެއް ނުވި އެވެ. 

މުބާރާތުގެ ގުރޫޕު ސްޓޭޖުގައި އެމެރިކާ އިން ކުޅުނު ފުރަތަމަ މެޗުގައި ވަނީ ޕެރަގުއޭ ބަލިކޮށްފައި އެވެ. ގުރޫޕު ސްޓޭޖުގައި ބާކީ ތުރުކީގެ މެޗު އޮތްއިރު، ދެ މެޗުން ހަ ޕޮއިންޓާ އެކު އެމެރިކާ އިން މި ވަނީ މުބާރާތުގެ ގަދަ 32 ވަނަ ބުރުން ޖާގަ ހޯދައިފައި އެވެ.