މުބާރާތުގެ އެންމެ އަވަސް ލަނޑާ އެކު، މޮރޮކޯ އިން ސްކޮޓްލެންޑު ބަލިކޮށްފި
މިއީ މިފަހަރުގެ މުބާރާތުގައި މޮރޮކޯ އިން ހޯދި ފުރަތަމަ މޮޅު. ފުރަތަމަ މެޗުގައި ބްރެޒިލްއާ ދެކޮޅަށް ކުޅެ އެ ޓީމު ވަނީ އެއްވަރުވެފައި. ގުރޫޕު ސްޓޭޖުގައި މޮރޮކޯގެ ފަހު މެޗުގައި ނިކުންނާނީ ހައިޓީއާ ދެކޮޅަށް.
މެޗުގައި ލަނޑު ޖެހުމަށް ފަހު މޮރޮކޯގެ ކުޅުންތެރިން އުފާ ފާޅު ކުރަނީ. | ރޮއިޓާސް
ފީފާ ވޯލްޑް ކަޕްގެ ގުރޫޕު ސީފައި ސްކޮޓްލެންޑާ ދެކޮޅަށް ކުޅުނު މެޗުން މޮޅުވެ، މޮރޮކޯ އިން މުބާރާތުގެ ފުރަތަމަ މޮޅު ހޯދައިފި އެވެ.
އެމެރިކާގެ ބޮސްޓޮން ސްޓޭޑިއަމްގައި ހޮނިހިރު ދުވަހުގެ ފަތިހު ކުޅުނު މެޗު މޮރޮކޯ އިން ކާމިޔާބު ކުރީ 1-0 އިންނެވެ. މެޗުގައި މޮރޮކޯ އިން ލަނޑު ޖެހީ ވެސް ފުރަތަމަ ހާފުގައި އެވެ.
މެޗު ފަށައިގެން ފުރަތަމަ މިނެޓުގެ ތެރޭގައި މޮރޮކޯ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު މޮރޮކޯ އަށް ޖަހައިދިނީ އިސްމާއިލް ސައިބާރީ އެވެ. އެ ލަނޑު ޖަަހަން ސައިބާރީ އަށް ފުރުސަތު ތަނަވަސްކޮށްދިނީ ބްރަހިމް ޑިއާޒް އެވެ. މިއީ މިފަހަރުގެ މުބާރާތުގައި މިހާތަނަށް ފެނުނު އެންމެ އަވަސް ލަނޑެވެ.
އޭގެ ފަހުން ވެސް މެޗުގެ ފުރަތަމަ ހާފުގައި މޮރޮކޯ އަށް ވަނީ އިތުރު ލަނޑު ޖަހަން ފުރުސަތު ލިބިފައި އެވެ. އެގޮތުން ސައިބާރީ އާއި، އަޝްރަފް ޙަކީމީ އަށް ލިބުނު ފުރުސަތުގެ ބޭނުން ކުރެވޭ ގޮތެއް ނުވި އެވެ. މެޗުގެ ނަތީޖާ ހަމަހަމަ ކުރުމަށް ސްކޮޓްލެންޑަށް ފުރުސަތު ލިބުނު ނަމަވެސް، ކާމިޔާބުވާ ގޮތެއް ނުވި އެވެ.
މިއީ މިފަހަރުގެ މުބާރާތުގައި މޮރޮކޯ އިން ހޯދި ފުރަތަމަ މޮޅެވެ. ފުރަތަމަ މެޗުގައި ބްރެޒިލްއާ ދެކޮޅަށް ކުޅެ އެ ޓީމު ވަނީ އެއްވަރުވެފައި އެވެ. ގުރޫޕު ސްޓޭޖުގައި މޮރޮކޯގެ ފަހު މެޗުގައި ނިކުންނާނީ ހައިޓީއާ ދެކޮޅަށެވެ.
