މެސީ އަކީ އެންމެ މޮޅު ކުޅުންތެރިޔާކަން ދުނިޔެ އިން މިހާރު ޤަބޫލު ކުރަން ޖެހޭ: ރޮނާލްޑޯ

ދުނިޔޭގެ ފުޓުބޯޅައިގެ ތާރީޚުގައި އުފެދުނު އެންމެ މޮޅު ކުޅުންތެރިޔަކީ އާޖެންޓީނާގެ ކެޕްޓަން ލިއޮނަލް މެސީ ކަމަށް ޤަބޫލު ކުރަން ޖެހޭ ކަމަށް، ބްރެޒިލްގެ ލެޖެންޑް ރޮނާލްޑޯ ނަޒާރިއޯ ބުނެފި އެވެ.

ރޮނާލްޑޯ މިހެން ބުނެފައި ވަނީ ވޯލްޑް ކަޕްގައި އާޖެންޓީނާގެ ފުރަތަމަ މެޗުގައި އަލްޖީރިއާއާ ދެކޮޅަށް ކުޅުނު މެޗުގައި މެސީ ހެޓްރިކް ހަދާފައި ވަނިކޮށެވެ. އެ މެޗުގައި ޖެހި ތިން ލަނޑާ އެކު، މެސީ ވަނީ ވޯލްޑް ކަޕްގައި އެންމެ ގިނަ ލަނޑު ޖަހާފައިވާ ޖަރުމަނުގެ މިރުސްލާވް ކްލޯސާގެ ރެކޯޑާ އަރާ ހަމަ ކޮށްފައި އެވެ. ކްލޯސާ އާއި މެސީ ވޯލްޑް ކަޕްގައި 16 ލަނޑު ޖަހާފައިވާއިރު، މި ރެކޯޑު މުގުރާލުމުގެ ފުރުސަތު މެސީ އަށް އެބަ އޮތެވެ. 

މިފަހަރުގެ ވޯލްޑް ކަޕްގެ ފުރަތަމަ މެޗުގައި މެސީ ހެދި ހެޓްރިކަކީ، ވޯލްޑް ކަޕްގައި އޭނާ ހެދި ފުރަތަމަ ހެޓްރިކް އެވެ. އެ ހެޓްރިކާ އެކު، އުމުރުން 38 އަހަރުގެ މެސީ ވެފައި ވަނީ ވޯލްޑް ކަޕްގައި ހެޓްރިކް ހެދި އެންމެ އުމުރުން ދުވަސްވީ ކުޅުންތެރިޔާ އަށެވެ.

އެކަމަށް އިޝާރާތް ކުރަމުން ރޮނާލްޑޯ ބުނީ، ކޮންމެ ސީޒަނެއްގައި ވެސް އަދި ކޮންމެ ވޯލްޑް ކަޕެއްގައި މެސީ ކުޅެން އެރުމާ އެކު ތާރީޚާ ގުޅޭ ކަމަށެވެ. ރޮނާލްޑޯ ބުނީ އެއީ ހަނދާން ނައްތައި ނުލެވޭނެ ތާރީޚީ ކަމެއް ކަމަށެވެ. ފުޓުބޯޅައިގެ ގިނަ ކާމިޔާބީ ތަކެއް ހޯދާފައިވާ ރޮނާލްޑޯ ބުނީ، ފުޓުބޯޅައިގައި މިހާ ގިނަ އަހަރު ތަކެއް ވަންދެން، އެހާ ހަމަޖެހިލައިގެން ކުޅުމަކީ ކޮންމެ ކޮންމެ ކުޅުންތެރިޔަކަށް ކުރެވޭނެ ކަމެއް ނޫން ކަމަށެވެ. 

މީގެ އިތުރުން ރޮނާލްޑޯ ބުނެފައި ވަނީ ދުނިޔެ އިން މިހާރު ހަގީގަތް ޤަބޫލު ކުރަން ޖެހޭ ކަމަށެވެ. އެގޮތުން ފިލައި ނުތިބެ، މެސީ އަކީ ދުނިޔޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާކަށް ޤަބޫލު ކުރަން ޖެހޭ ކަމަށް ރޮނާލްޑޯ ބުނެފައިވެ އެވެ. އެކަން ފާހަގަކޮށް ރޮނާލްޑޯ ބުނީ ރެކޯޑަކީ މުގުރާލެވޭނެ އެއްޗެއް ކަމަށާއި، މެސީ ރެކޯޑު މުގުރަމުން ގެންދިޔުމަކީ ފުޓުބޯޅައިގެ އެއްވެސް މީހަކަށް ހައިރާން ކަމެއް ލިބޭ ކަމެއް ނޫން ކަމަށެވެ. 

މިއީ މެސީގެ ކެރިއަރުގައި އޭނާ ކުޅޭ ހަ ވަނަ ވޯލްޑް ކަޕް އެވެ. އާޖެންޓީނާ އިން 2022 ވަނަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕް ކާމިޔާބު ކުރިއިރު، އެންމެ އިސް ދައުރެއް އަދާ ކުރީ ވެސް މެސީ އެވެ. އެ މުބާރާތުގެ އެންމެ މޮޅު ކުޅުންތެރިޔަކަށް ވެސް ހޮވުނީ މެސީ އެވެ. މީގެ އިތުރުން 2014 ވަނަ އަހަރުގެ ވޯލްޑް ކަޕްގެ ފައިނަލްގައި ޖަރުމަނު އަތުން އާޖެންޓީނާ ބަލިވެފައިވާއިރު، އެފަހަރުގެ މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ވެސް މެސީ އެވެ.