ޑިއާޒް އާއި މުނޯޒްގެ ލަނޑުން، ކޮލަމްބިއާ އިން އުޒްބެކިސްތާން ބަލިކޮށްފި

ފީފާ ވޯލްޑް ކަޕްގެ ގުރޫޕު ކޭގައި އުޒްބެކިސްތާންއާ ދެކޮޅަށް ކުޅުނު މެޗުން މޮޅުވެ، ކޮލަމްބިއާ އިން އެ ޓީމުގެ ފެށުން ރަނގަޅު ކޮށްފި އެވެ. 

މެކްސިކޯ ސިޓީ ސްޓޭޑިއަމްގައި ބުރާސްފަތި ދުވަހުގެ ފަތިހު ކުޅުނު މެޗު ކޮލަމްބިއާ އިން ކާާމިޔާބު ކުރީ 3-1 އިންނެވެ. މެޗުގައި ކޮލަމްބިއާ އިން ލަނޑު ޖަހައި ކުރި ހޯދާފައި ވަނިކޮށް، އުޒްބެކިސްތާން އިން ނަތީޖާ ހަމަހަމަ ވެސް ކުރި އެވެ. ނަަމަވެސް، އިތުރު ދެ  ލަނޑު ޖަހައިގެން ކޮލަމްބިއާ ވަނީ މެޗުން މޮޅުވެފައި އެވެ.

މެޗު ފަށައިގެން ރަނގަޅަށް ކުޅެމުން ދިޔަ ކޮލަމްބިއާ އިން ލީޑު ނެގީ ފުރަތަމަ ހާާފުގެ ފަހު ވަގުތުގެ ތެރޭގައި އެވެ. އެގޮތުން ފުރަތަމަ ޙާފު ނިމެން ފަސް މިނެޓަށް ވެފައި ވަނިކޮށް، ކޮލަމްބިއާ އަށް ލީޑު ނަގައިދިނީ ޑެނިއެލް މުނޯޒް އެވެ. އެ ލަނޑު ޖަހަން މުނޯޒް އަށް ފުރުސަތު ތަނަވަސްކޮށްދިނީ ލުއިސް ޑިއާޒް އެވެ.

ނަމަވެސް، މެޗުގެ ދެ ވަނަ ހާފުގައި އުޒްބެކިސްތާން އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެެވެ. މެޗުގެ 60 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ އަބޯސްބެކް ފައިޒުލާވް އެވެ. އުޒްބެކިސްތާން އިން ނަތީޖާ ހަމަހަމަ ކުރިތާ ފަސް މިނެޓު ފަހުން، ޑިއާޒް ވަނީ ކޮލަމްބިއާގެ ދެ ވަނަ ލަނޑު ޖަހައި ދެ ވަނަ ފަހަރަށް ލީޑު ނަގައިފަ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ކޮލަމްބިއާގެ ތިން ވަނަ ލަނޑު ޖެހީ ޖަމިންޓޮން ކަމްޕާޒް އެވެ.

ގުރޫޕު ސްޓޭޖުގެ ދެ ވަނަ މެޗުގައި ކޮލަމްބިއާ ނިކުންނާނީ ކޮންގޯއާ ދެކޮޅަށެވެ. އަދި ފަހު މެޗުގައި ނިކުންނާނީ ޕޯޗުގަލްއާ ދެކޮޅަށެވެ. އުޒްބެކިސްތާންގެ ދެ ވަނަ މެޗުގައި ޕޯޗުގަލްއާ ދެކޮޅަށް ކުޅުމަށް ފަހު، ފަހު މެޗުގައި ކުޅޭނީ ކޮންގޯއާ ދެކޮޅަށެވެ.