ޝަހާދަތުގެ ކަލިމަ ލިޔެފައިވާތީ ސައުދީގެ ދިދަ ބިން މަތީގައި ނުބާއްވާ، ޚާއްޞަ އުސޫލެއް

ފީފާ ވޯލްޑް ކަޕްގެ މެޗުތައް ފެށުމުގެ ގޮތުން ބާއްވާ ރަސްމިއްޔާތުގައި މެޗުގައި ބައްދަލު ކުރާ ދެ ޤައުމުގެ ދިދަ ދައްކާލާއިރު، ސައުދީ އަރަބިއްޔާގެ ދިދަ އަށް ފީފާ އިން ޚާއްޞަ އުސޫލެއްގެ ދަށުން އަމަލު ކުރަން ފަށައިފި އެވެ.

އެމެރިކާގެ މިއާމީ ސްޓޭޑިއަމްގައި ސައުދީ އާއި އުރުގުއޭ ބައްދަލު ކުރި މެޗު ފެށުމުގެ ކުރިން އޮތް ރަސްމިއްޔާތުގައި، ސައުދީގެ ދިދަ ބިން މަތީގައި ބާއްވާފައި ނުވެ އެވެ. އާންމު ގޮތެއްގައި ދެ ޤައުމުގެ ދިދަ ހިފައިގެން ތިބޭ ކުދިން ތިބެނީ، ދަނޑުގެ ވިނަ ގަނޑު މަތީގައި ދިދަ ބާއްވައިގެންނެވެ.

ނަމަވެސް، ސައުދީ އާއި އުރުގުއޭ ބައްދަލު ކުރި މެޗުގައި ސައުދީގެ ދިދަ ވިނަ ގަނޑު މަތީގައި ބޭއްވުމުގެ ބަދަލުގައި، ކުދިން ތިބީ ދިދަ ވިނަ ގަނޑުގައި ނުޖެހޭނެހެން ހިފަހައްޓައިގެންނެވެ. ހަމަ އެއާ އެކު، ތަފާތު ނުވާނެ ގޮތަށް އުރުގުއޭގެ ދިދަ ވެސް ވަނީ ވިނަ ގަނޑުގައި ނުޖެހޭނެހެން ހިފައިގެން ތިބެފަ އެވެ. 

ސައުދީގެ ދިދަ ވިނަ ގަނޑު މަތީގައި ނުބާއްވަން ނިންމީ، އެ ދިދައިގައި އިސްލާމީ ޝަހާދަތުގެ ކަލިމަ ލިޔެފައި ވުމުންނެވެ. އެހެންވެ އެ ދިދަ ވިނަ ގަނޑު މަތީގައި ބޭއްވުމަކީ އިޙުތިރާމް ކުޑަ ގޮތަކަށް ވާނެތީވެ، ވިނަ ގަނޑު މަތީގައި ދިދަ ނުބާއްވަން ނިންމީ އެވެ. ފީފާ އިން މި ނިންމުން ނިންމާފައި ވަނީ ސައުދީ އަކީ އިސްލާމީ ޤައުމަކަށް ވެފައި، އެ ޤައުމުގެ ދިދަ އަށް އިޙުތިރާމް އާއި ރައްކާތެރިކަން ދިނުމުގެ މަޤުޞަދުގައި އެވެ. 

ކޮންމެ މެޗެއް ފެށުމުގެ ކުރިން ފީފާ އިން ބާއްވާ މި ރަސްމިއްޔާތުގައި ދެ ޓީމުގެ ޤައުމީ ދިދަ ދައްކާލުމުގެ އިތުރުން، ޤައުމީ ސަލާމް ޖެހުން ވެސް ކުރިއަށް ގެންދެ އެވެ. މިއީ އާންމު ގޮތެއްގައި ފީފާ އިން ކުރާ ކަމެކެވެ. މިފަހަރުގެ މުބާރާތުގައި ބައެއް މެޗު ތަކުގައި ފެށުމުގެ ރަސްމިއްޔާތު ދިގުވުމުގެ ސަބަބުން، މެޗު ފެށުން ލަސްވެގެން ގޮސްފައިވާ ކަމަށް ވެސް ފާހަގަވެފައިވެ އެވެ.

މުބާރާތުގައި ސައުދީ އިން ކުޅޭ ކޮންމެ މެޗެއްގައި ވެސް، މި އުސޫލުން އަމަލު ކުރާނެ ކަމަށް ވަނީ ބެލެވިފައި އެވެ.