ފަހު ވަގުތު ލަނޑު ޖަހައިގެން، ގާނާ އިން ޕެނަމާ ބަލިކޮށްފި
18 ޖޫން 2026 | ބުރާސްފަތި 03:06މި މެޗުގައި ގާނާގެ އެންމެ މުހިންމު އެއް ކުޅުންތެރިޔާ ކަމަށްވާ ތޯމަސް ޕާޓޭ ކުޅެފައި ނުވޭ. އޭނާގެ މައްޗަށް ރޭޕުގެ ދައުވާ ކޮށްފައި އޮތުމުން، ކެނެޑާ އިން ވަނީ އޭނާ އަށް ވިސާ ނުދޭން ނިންމާފައި. އެ މައްސަލަ ޕާާޓޭގެ ފަރާތުން އިސްތިއުނާފު ކުރި ނަމަވެސް، ކާމިޔާބުވެފައި ނުވޭ.
މެޗުގައި ލަނޑު ޖެހުމަށް ފަހު ގާނާގެ ކުޅުންތެރިން އުފާ ފާޅު ކުރަނީ. | ރޮއިޓާސް
މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު އެލްގައި ޕެނަމާއާ ދެކޮޅަށް ކުޅުނު މެޗުން، ފަހު ވަގުތު ގާނާ މޮޅުވެއްޖެ އެވެ.
ކެނެޑާގެ ޓޮރޮންޓޯ ސްޓޭޑިއަމްގައި ބުރާސްފަތި ދުވަހުގެ ފަތިހު ކުޅުނު މެޗު ގާނާ އިން ކާމިޔާބު ކުރީ 1-0 އިންނެވެ. މެޗުގައި ގާނާ އިން ލަނޑު ޖެހީ ވެސް މެޗުގެ ފަހު ވަގުތުގައި އެވެ.
މި މެޗުގައި ގާނާގެ އެންމެ މުހިންމު އެއް ކުޅުންތެރިޔާ ކަމަށްވާ ތޯމަސް ޕާޓޭ ކުޅެފައި ނުވެ އެވެ. އޭނާގެ މައްޗަށް ރޭޕުގެ ދައުވާ ކޮށްފައި އޮތުމުން، ކެނެޑާ އިން ވަނީ އޭނާ އަށް ވިސާ ނުދޭން ނިންމައިފަ އެވެ. އެ މައްސަލަ ޕާާޓޭގެ ފަރާތުން އިސްތިއުނާފު ކުރި ނަމަވެސް، ކާމިޔާބުވެފައި ނުވެ އެވެ.
މެޗު ފަށައިގެން ވެސް ދެ ޓީމުގެ ފަރާތުން ފެނިގެން ދިޔައީ ހަމަހަމަ ކުޅުމެކެވެ. ދެ ޓީމުން ވެސް ވަނީ ލަނޑު ޖަހަން ފުރުސަތު ތަކެއް ހޯދައިފަ އެވެ. މެޗުގައި ލަނޑު ޖެހުމަށް ގާނާ އިން ކުރި މަސައްކަތް ކާމިޔާބު ކުރެވުނީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެވެ. އެ ލަނޑު ގާނާ އަށް ޖަހައިދިނީ ކަލެބް ޔިރެކްންޔީ އެވެ.
ގާނާ އިން ފުރަތަމަ މެޗު ކާމިޔާބު ކޮށްފައިވާއިރު، މި ގުރޫޕުގެ ތިން ވަނަ ހޯދާ ޓީމަކަށް ވެސް މުބާރާތުގެ ކުރިއަށް އޮތް ބުރުން ޖާގަ ލިބޭނެ އެވެ. މުބާރާތުގައި ގާނާގެ ދެ ވަނަ މެޗުގައި އިންގްލެންޑްއާ ދެކޮޅަށް ނިކުންނައިރު، ޕެނަމާ ނިކުންނާނީ ކްރޮއޭޝިއާއާ ދެކޮޅަށެވެ. ފަހު މެޗުގައި ގާނާ އިން ކްރޮއޭޝިއާއާ ދެކޮޅަށް ނިކުންނައިރު، ޕެނަމާ ނިކުންނާނީ އިންގްލެންޑްއާ ދެކޮޅަށެވެ.
