ވިޓްކޮފް އީރާނާ ގުޅޭ މަޝްވަރާތަކަށް ސްވިޒަލޭންޑަށް
20 ޖޫން 2026 | ހޮނިހިރު 06:06އެމެރިކާއާއި އީރާނާ ދެމެދު ވެފައިވާ އިބްތިދާއީ ސުލްހައިގެ އެއްބަސްވުމާ ގުޅޭ ފަންނީ މަޝްވަރާތައް ކުރިއަށް ގެންދިއުމަށްޓަކައި، އެމެރިކާގެ ޚާއްޞަ މަންދޫބު ސްޓީވް ވިޓްކޮފްއާއި ޖެރެޑް ކުޝްނަރ ސްވިޒަލޭންޑަށް ވަޑައިގެންފި. މެދުއިރުމަތީގެ ހަނގުރާމަ ހުއްޓާލުމަށް އަމާޒުކޮށްގެން ބާއްވާ މި މަޝްވަރާތަކުގައި ބައިވެރިވެވަޑައިގަންނަވަން އޮތް ނައިބު ރައީސް ޖޭ.ޑީ ވެންސްގެ ދަތުރުފުޅު ވަނީ ފަސްކުރައްވާފައި.
މެދުއިރުމައްޗަށް ކަނޑައަޅުއްވާފައިވާ ވައިޓް ހައުސްގެ ހާއްސަ މަންދޫބު ސްޓީވް ވިޓްކޮފް. | އޭޕީ
އެމެރިކާއާއި އީރާނާ ދެމެދު ސްވިޒަލޭންޑުގައި ބޭއްވުމަށް ހަމަޖެހިފައި އޮތް މަޝްވަރާތައް ފަސްކުރުމާ ގުޅިގެން، އެމެރިކާގެ ޚާއްޞަ މަންދޫބު ސްޓީވް ވިޓްކޮފް އެ ގައުމަށް ވަޑައިގަންނަވާ ކަމަށް އެމެރިކާގެ މީޑިއާތަކުން ހުކުރު ދުވަހު ރިޕޯޓުކޮށްފިއެވެ.
ނަން ހާމަކުރަން ބޭނުންނުވާ އެމެރިކާގެ އޮފިޝަލަކާ ހަވާލާދީ "އެކްސިއޯސް" އިން ރިޕޯޓުކޮށްފައިވާ ގޮތުގައި، ވިޓްކޮފް ހުކުރު ދުވަހު ހުންނެވީ ސްވިޒަލޭންޑަށް ވަޑައިގަތުމުގެ މަގުމަތީގައެވެ.
ސީ.އެން.އެން އިން ރިޕޯޓުކޮށްފައިވާ ގޮތުގައި، ވިޓްކޮފް މި ދަތުރުފުޅު ކުރައްވަނީ، އެމެރިކާއާއި އީރާނާ ދެމެދު ވެފައިވާ އިބްތިދާއީ ސުލްހައިގެ އެއްބަސްވުމާ ގުޅޭ ފަންނީ މަޝްވަރާތައް އަލުން ފަށައި، އެ މަސައްކަތް ކުރިއަށް ގެންދިއުމަށް ވޮޝިންޓަނާއި އީރާނުން މަސައްކަތް ކުރަމުންދާ ދަނޑިވަޅެއްގައެވެ.
އެމެރިކާގެ އޮފިޝަލަކާ ހަވާލާދީ ސީ.އެން.އެން އިން ބުނެފައިވަނީ، ޓްރަމްޕްގެ މަންދޫބު ޖެރެޑް ކުޝްނަރ ވެސް މި މަޝްވަރާތަކަށް ސްވިޒަލޭންޑަށް ވަޑައިގަންނަވާނެ ކަމަށް ބެލެވޭ ކަމަށެވެ. "އެކްސިއޯސް" އިން ރިޕޯޓުކޮށްފައިވާ ގޮތުގައި ކުޝްނަރ މިހާރު ހުންނެވީ ސްވިޒަލޭންޑުގައެވެ.
ސްޓީވް ވިޓްކޮފް އީރާނުގެ އެއްވެސް އޮފިޝަލަކާ ބައްދަލުކުރައްވާނެ ކަމެއް ނުވަތަ ނޫންކަމެއް އަދި ސާފެއް ނުވެއެވެ.
މި ދަތުރުފުޅުގައި އެމެރިކާގެ ނައިބު ރައީސް ޖޭ.ޑީ ވޭންސް ބައިވެރިވެވަޑައިގަންނަވާނެ ކަމަށް ކުރިން ބެލެވުނު ނަމަވެސް، އެމަނިކުފާނުގެ ދަތުރުފުޅު ފަސްކުރައްވާފައިވާކަން ވައިޓް ހައުސްއިން ބުރާސްފަތި ދުވަހުގެ ރޭ ވަނީ އިއުލާނުކޮށްފައެވެ.
ހުކުރު ދުވަހަށް ތާވަލުކުރެވުނު އެމެރިކާ-އީރާނު މަޝްވަރާތަކަކީ، މެދުއިރުމަތީގެ ހަނގުރާމަ ހުއްޓާލުމަށް ވެފައިވާ އެއްބަސްވުމުގެ މައްޗަށް ބިނާކޮށް، ދާއިމީ ސުލްހައެއް ގާއިމުކުރުމަށް އަމާޒުކޮށްގެން ބޭއްވުމަށް ހަމަޖެހިފައި އޮތް ބައްދަލުވުންތަކެކެވެ.
