އީރާން ހަނގުރާމަ އަކީ ވޭންސްގެ ސިޔާސީ މުސްތަޤުބަލަށް މުހިންމު މަސައްކަތެއް

އެމެރިކާ އިން އީރާންއާ ދެކޮޅަށް ކުރަމުން އައި ހަނގުރާމަ ދެ މަސް ދުވަހަށް ދެމިގެން ދިޔައިރު، ސުލްޙައިގެ އެއްބަސްވުމަކަށް އައުމަށް އެމެެރިކާގެ ނައިބު ރައީސް ޖޭޑީ ވޭންސް ކުރައްވަމުން ގެންދެވި މަސައްކަތަކީ އޭނާގެ ސިޔާސީ މުސްތަޤުބަލަށް ވަރަށް މުހިންމު މަސައްކަތެއް ކަމަށް ތަޖުރިބާކާރުން ބުނެފި އެވެ. 

އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން، އީރާން އާއެކު ކުރިއަށް ގެންދިޔަ މަޝްވަރާ ތަކުގައި އިސްކޮށް ހުންނެވީ ވޭންސް އެވެ. އީރާން އާއެކު މަޝްވަރާ ކުރުމަށް ވޭންސް ވަނީ ޕާކިސްތާންގެ ވެރި ރަށް އިސްލާމްއާބާދަށް ވެސް ވަޑައިގެންފައި އެވެ. މިދިޔަ ބުދަ ދުވަހު އެމެރިކާ އާއި އީރާން އިން ވަނީ ރަސްމީކޮށް ސުލްޙައިގެ އެއްބަސްވުމުގައި ސޮއި ކޮށްފައި އެވެ. 

މި އެއްބަސްވުމުގެ ދަށުން ވަގުތީ ގޮތުން ހަނގުރާމަ ހުއްޓާލި ނަމަވެސް، އީރާންގެ ނިއުކްލިއާ ޕްރޮގްރާމް އާއި، ސަރަހައްދީ ހަނގުރާމަވެރި ގުރޫޕު ތަކަށް އީރާން އިން ދޭ އެހީތެރިކަން އަދި އިޤްތިޞާދީ ގޮތުން މުހިންމު މަގެއް ކަމަށްވާ ހޮރްމޫޒް ކަނޑު އޮޅި ފަދަ މައިގަނޑު މައްސަލަތައް މުޅިން ޙައްލު ނުވެ އެވެ. މި މައްސަލަ ތަކަށް ޙައްލު ހޯދުމުގެ މަޝްވަރާ ތަކަށް 60 ދުވަހުގެ މުއްދަތެއް ވަނީ ލިބިފައި އެވެ. 

މި މަޝްވަރާ ތަކަކީ ހަނގުރާމައިގައި ބައިވެރިވާ ހުރިހާ ފަރާތް ތަކާއި، މެދު އިރުމަތީގެ މުޅި ސަރަހައްދުގެ އިތުރުން، ވޭންސްގެ ސިޔާސީ މުސްތަޤުބަލަށް ވެސް ރިސްކު ބޮޑު މަޝްވަރާ ތަކެކެވެ. ސަރަހައްދުގެ ޙާލަތު އަދިވެސް ބަދަލު ވަމުން އަންނައިރު، ބުރާސްފަތި ދުވަހުގެ ރޭ ސްވިޒަލެންޑަށް ކުރައްވަން އޮތް ދަތުރުފުޅު ވޭންސް ވަނީ ކެންސަލް ކުރައްވައިފަ އެވެ. ނަމަވެސް، އެމެރިކާގެ ރިޔާސީ ގަނޑުވަރު ވައިޓް ހައުސް އިން ބުނެފައި ވަނީ، މަޝްވަރާ ތަކުގެ ފުރަތަަމަ ފުރުސަތާ އެކު، އެމެރިކާގެ ޓީމު އޮތީ ފުރަން ތައްޔާރަށް ކަމަށެވެ. 

ބުރާސްފަތި ދުވަހު ވައިޓް ހައުސްގައި އޮތް ނޫސްވެރިންގެ ބައްދަލުވުމުގައި ވޭންސް ވަނީ، ސުލްޙައިގެ ފައިނަލް އެއްބަސްވުމަކަށް އެމެރިކާ އިން އުންމީދު ކުރާ ކަންތައްތައް ބަޔާން ކުރައްވައިފަ އެވެ. ބައެއް ތަޖުރިބާކާރުން ބުނާ ގޮތުގައި، އެމެރިކާގެ ތާރީޚުގައި އިޒްރޭލް އަށް ދެވުނު އެންމެ ބޮޑު ބަހުގެ ހަމަލާ އަދި އެންމެ ބޮޑު ފާޑު ކިޔުމުގެ ބަސްތައް ވެސް އަމާޒު ކޮށްފައި ވަނީ ވޭންސް އެވެ. އެއާ އެކު، ރިޔާސީ އިންތިޚާބުގައި ވާދަ ކުރައްވާނެތޯ ކުރި ސުވާލު ތަކަށް ވެސް ވޭންސް ޖަވާބު ދެއްވި އެވެ. 

ވޭންސް ވިދާޅުވެފައި ވަނީ، އީރާން އިން އެ ޤައުމުގެ އަމަލު ތަކަށް ބަދަލު ނުގެންނަ ނަމަ، އެ ޤައުމުގެ ސިފައިންނާއި ނިއުކްލިއާ ޕްރޮގްރާމް ވެސް ހަލާކު ކޮށްލާނެ ކަމަށެވެ. އެހެން ނަމަވެސް، އީރާން އިން އެ ޤައުމުގެ އަމަލުތައް ބަދަލު ކުރާ ނަމަ، އީރާން އަށް ބަދަލު ތަކެއް ގެނެވޭނެ ފަދަ ގުޅުން ތަކެއް މެދު އިރުމަތީގެ ބައިވެރިންނާ އެކު ޤާއިމު ކުރެވޭނެ ކަމަށެވެ. 

ވެރިކަން ކުރާ ރިޕަބްލިކަން ޕާޓީގެ ގިނަ ބޭފުޅުން ވެސް ވަނީ، އީރާން އެއްބަސްވުމުގައި ވޭންސް އަދާ ކުރައްވާ މުހިންމު ދައުރު ފާހަގަ ކުރައްވައިފަ އެވެ. އެ ޕާޓީގެ ފޮރިން ސިޔާސަތުގެ މައިގަނޑު ލީޑަރުންގެ ތެރޭގައި ހިމެނޭ ސައުތު ކެރޮލައިނާގެ ސެނެޓަރު ލިންޑްސީ ގްރެހަމް ވަނީ، ވޭންސް އަކީ ސުލްޙައިގެ އެއްބަސްވުމުގެ "އާކިޓެކްޓް" ކަމަށް ވިދާޅުވެފައި އެވެ. އަދި ފައިނަލް އެއްބަސްވުމެއް އެކުލަވާލެވުމާ އެކު، ވޭންސްގެ ފަރާތުން އެ އެއްބަސްވުން ސެނެޓަށް ހުށަހަޅަން ޖެހޭނެ ކަމަށް ވެސް އޭނާ ވިދާޅުވި އެވެ. 

ގިނަ ބަޔަކު ޤަބޫލު ކުރާ ގޮތުގައި 2028 ވަނަ އަހަރު އޮންނަ އެމެރިކާގެ ރިޔާސީ އިންތިޚާބުގައި ރިޕަބްލިކަން ޕާޓީގެ ފަރާާތުން ވާދަ ކުރައްވާނީ ވޭންސް އެވެ. އަދި ވޭންސް ގެންދަވަނީ އެކަމުގެ ޝައުޤުވެރިކަން އޮތް ކަމަށް އެކި ފަރާތް ތަކަށް ދަންނަވަމުން ކަމަށް ވެސް ރިޕޯޓު ތަކުގައި ބުނެފައިވެ އެވެ.