އީރާނާ ދެކޮޅަށް ދިން ހަމަލާތަކުގައި މަސްކްގެ އާޓިފިޝަލް އިންޓެލިޖެންސް ޓޫލް "ގްރޮކް" ބޭނުންކޮށްފި

އީލޮން މަސްކްގެ އާޓިފިޝަލް އިންޓެލިޖެންސް (އޭއައި) ޓޫލް "ގްރޮކް" އީރާނާ ދެކޮޅަށް ދިން ހަމަލާތަކުގައި ބޭނުންކޮށްފައިވާކަން، އެމެރިކާ ސަރުކާރުން ހާމަކޮށްފި ކަމަށް އޭއެފްޕީ ނިއުސް އެޖެންސީން އަންގާރަ ދުވަހު ބުނެފިއެވެ. މިކަން ހާމަވެފައިވަނީ އެ އެޖެންސީއަށް ފެނިފައިވާ ގާނޫނީ ލިޔެކިޔުންތަކަކުންނެވެ.

ޖޫން މަހުގެ 15 ވަނަ ދުވަހު ހުށަހެޅި މި ބްރީފިންގް އަކީ، މަސްކްގެ ކުންފުނި "އެކްސްއޭއައި" (xAI) ގެ ބޮޑު ޑޭޓާ ސެންޓަރެއްގައި ބޭނުންކުރާ ގޭސް ޓާބައިންތަކާ ދެކޮޅަށް ތިމާވެށީގެ މައްސަލައެއްގައި ކުރާ ދައުވާއަކުން ދިފާއުވުމަށް ހުށަހެޅި ލިޔުމެކެވެ.

އެމެރިކާގެ ޖަސްޓިސް ޑިޕާޓްމަންޓުން ކޯޓުގައި ބުނެފައިވަނީ، މި ދައުވާއަކީ އެމެރިކާގެ ގައުމީ ސަލާމަތާއި، އިގްތިސާދީ އަދި ހަކަތައިގެ ރައްކާތެރިކަމަށް އޮތް ނުރައްކަލެއް ކަމަށެވެ. އެއީ މި ދައުވާގެ ސަބަބުން، ވޯ ޑިޕާޓްމަންޓުގެ އަސްކަރީ އޮޕަރޭޝަންތަކަށް އެހީތެރިވެދޭ އޭއައި އީޖާދުތަކަށް ބޭނުންވާ ކަރަންޓު ކަނޑާލަން ޖެހިދާނެތީ ކަމަށް އެ އިދާރާއިން ބުނެފައިވެއެވެ.

މި ދައުވާއާ ދެކޮޅަށް ދައުލަތުގެ ވަކީލުން ހުށަހެޅި ހެކިތަކުގެ ތެރޭގައި، ޕެންޓަގަންގެ އޭއައި ޗީފް ކެމަރަން ސްޓެންލީ ދީފައިވާ ބަޔާނެއް ހިމެނެއެވެ. ހުވާގެ މަތީގައި ހުރެ އޭނާ ދިން ބަޔާނުގައި ބުނެފައިވަނީ، އެމެރިކާ އަސްކަރިއްޔާގެ އޭއައި އެހީގައި އަމާޒުތައް ކަނޑައަޅާ ޕްރޮގްރާމް ކަމަށްވާ "ޕްރޮޖެކްޓް މޭވަން" ގައި މިހާރުވެސް ގްރޮކް ބޭނުންކުރަމުންދާ ކަމަށެވެ. މި ޕްރޮގްރާމްގައި މީގެ ކުރިން ބޭނުންކުރަމުން އައީ "އެންތްރޮޕިކް" ކުންފުނީގެ "ކްލޯޑް" މޮޑެލްއެވެ.

ސްޓެންލީގެ ބަޔާނުގައިވާ ގޮތުން، މި ޕްރޮޖެކްޓުގެ "މޭވަން ސްމާޓް ސިސްޓަމްސް" (އެމްއެސްއެސް) މެދުވެރިކޮށް، "އޮޕަރޭޝަން އެޕިކް ފިއުރީ" ގެ ތެރޭގައި 96 ގަޑިއިރުގެ ތެރޭގައި 2،000 ތަފާތު އަމާޒަކަށް 2،000 އަށްވުރެ ގިނަ ހަތިޔާރު ފޮނުވާލުމަށް އެމެރިކާގެ ސިފައިންނަށް މަގުފަހިވެފައިވެއެވެ.

މަސްކްގެ ޓެކްނޮލޮޖީއަށް ތައުރީފު ކުރައްވަމުން ސްޓެންލީ ވިދާޅުވީ، "ގްރޮކް ގަވަރމަންޓް މޮޑެލް" ގެ ސަބަބުން އަސްކަރީ އޮޕަރޭޝަންތަކުގެ ހަލުވިމިނާއި ފުރިހަމަކަން ވަރަށް ބޮޑަށް އިތުރުވެފައިވާ ކަމަށެވެ.

ކަޅު ނަސްލުގެ މީހުންގެ ހައްގުތަކަށް މަސައްކަތްކުރާ ޖަމިއްޔާއެއް ކަމަށްވާ އެންއޭއޭސީޕީ (NAACP) އިން އެކްސްއޭއައި އާ ދެކޮޅަށް ދައުވާ ކުރަނީ، "ކްލީން އެއާ އެކްޓް" އާ ޚިލާފަށް ހުއްދަ ނެތި ގިނަ އަދަދެއްގެ ޓާބައިންތައް ހިންގަމުންދާ ކަމަށް ތުހުމަތުކޮށެވެ.

އެ ޖަމިއްޔާއިން ބުނާ ގޮތުގައި މި ޓާބައިންތަކުގެ ސަބަބުން ކަޅު ނަސްލުގެ މީހުން ގިނައިން ދިރިއުޅޭ ސަރަހައްދުތަކުގެ ވައި ނުސާފުވެއެވެ. ނަމަވެސް އެކްސްއޭއައި އިން ބުނަނީ އެއީ ވަގުތީ ގޮތުން ބޭނުންކުރާ، އެއްތަނުން އަނެއްތަނަށް އުފުލޭ ޓާބައިންތަކެއް ކަމަށްވާތީ، އާންމު ގަވާއިދުތައް އެއަށް ނުހިނގާނެ ކަމަށެވެ.

ފެބްރުއަރީ މަހުގެ ފަހުކޮޅު އެމެރިކާ ސަރުކާރުން ވަނީ އެންތްރޮޕިކް ކުންފުންޏާއެކު އޮތް އެއްބަސްވުންތައް އުވާލާފައެވެ. އެއީ ފުރިހަމައަށް އޮޓޮމޭޓްކޮށްގެން ދޭ ހަމަލާތަކުގައާއި އެމެރިކާގެ ރައްޔިތުންނަށް ފާރަލުމުގެ މަސައްކަތުގައި އެ ކުންފުނީގެ ޓޫލްތައް ބޭނުންކުރުމަށް އެންތްރޮޕިކް އިން އިންކާރު ކުރުމާ ގުޅިގެންނެވެ.

މީގެ ސަބަބުން ޕެންޓަގަނުން ވަނީ އޭއައިގެ މަސައްކަތްތައް ކުރިއަށް ގެންދިއުމަށްޓަކައި އެންތްރޮޕިކްގެ ވާދަވެރި ކުންފުނިތައް ކަމަށްވާ ގޫގުލް، އޯޕަންއޭއައި އަދި އެކްސްއޭއައި ފަދަ ކުންފުނިތަކުގެ އެހީތެރިކަން ހޯދަން ފަށާފައެވެ.

ގޫގުލްގެ 600 އަށްވުރެ ގިނަ މުވައްޒަފުން ވަނީ ސިއްރު އަސްކަރީ އޮޕަރޭޝަންތަކަށް އެ ކުންފުނީގެ އޭއައި ފޯރުކޮށްނުދިނުމަށް ގޮވާލާފައެވެ. އަދި އެހެން ބައެއް ފަރާތްތަކުންވެސް ވަނީ އޭއައިގެ ސަބަބުން ކުރިމަތިވެދާނެ ނުރައްކާތަކާ މެދު ކަންބޮޑުވުން ފާޅުކޮށްފައެވެ.

އެމެރިކާގެ އަސްކަރިއްޔާ އޭއައި އަށް ބަދަލުވުމުގެ މަރުހަލާ ކުރިއަށްދާއިރު، އީރާނުގެ ހަނގުރާމައިގައި އަދިވެސް "ކްލޯޑް" ބޭނުންކުރަމުންދާކަން މާޗް މަހު ސަރުކާރަށް ވަނީ އެއްބަސްވާން ޖެހިފައެވެ.

ރައީސް ޑޮނަލްޑް ޓްރަމްޕްގެ އަރިސް ބޭފުޅެއް ކަމަށްވާ މަސްކް ވަނީ، ފެބްރުއަރީ މަހު އެކްސްއޭއައި ކުންފުނި އޭނާގެ ޖައްވީ އިދާރާ "ސްޕޭސް އެކްސް" ގެ ދަށަށް ބަދަލުކޮށްފައެވެ. ސްޕޭސް އެކްސް އިން ވަނީ ޖޫން 12 ވަނަ ދުވަހު ތާރީޚީ ގޮތުން އެންމެ ބޮޑު އައިޕީއޯ (IPO) ކުރިއަށް ގެންގޮސްފައެވެ.