އީރާންގެ ބަނދަރުތަކަށް އެޅި ހުރަސްތައް އެމެރިކާއިން އުވާލައިފި
އެމެރިކާގެ ރައީސް ޑޮނަލްޑް ޓްރަމްޕްގެ އިރުޝާދާ އެއްގޮތަށް، އީރާނުގެ ބަނދަރުތަކަށް ވަދެ ނިކުމެވާ އުޅަނދުފަހަރަށް އެމެރިކާގެ އަސްކަރިއްޔާއިން ކުރިމަތިކުރި ހުރަސްތައް އުވާލައިފި. އެމެރިކާގެ ސެންޓްރަލް ކޮމާންޑުން ބުނި ގޮތުގައި، މި ބްލޮކޭޑް އުވާލި ނަމަވެސް ދެ ގައުމުގެ ދެމެދުގައިވާ އެއްބަސްވުންތައް ތަންފީޒުވަމުންދާކަން ކަށަވަރުކުރުމަށް އެ ސަރަހައްދުގައި އެމެރިކާގެ މަނަވަރުތައް ދެމިތިބޭނެ.
ސެންޓްކޮމް (ސެންޓްރަލް ކޮމާންޑް) ގެ ޒިންމާގެ ސަރަހައްދުގައި 2026 ވަނަ އަހަރުގެ މޭ މަހުގެ 17 ވަނަ ދުވަހު، ޔޫއެސްއެސް ނިއު އޯލިއަންސް (އެލްޕީޑީ 18) މަނަވަރުގެ ފްލައިޓް ޑެކުން އެމެރިކާގެ މެރިން ކޯގެ 31 ވަނަ މެރިން އެކްސްޕެޑިޝަނަރީ ޔުނިޓުގެ ސިފައިންގެ މީހަކު ފުރުމަށް ތައްޔާރުވަނީ. | ޔޫއެސް މެރިން ކޯޕްސް
އެމެރިކާގެ ރައީސް ޑޮނަލްޑް ޓްރަމްޕް ނެރެއްވި އަމުރަކާ ގުޅިގެން، އީރާނުގެ ބަނދަރުތަކާއި އައްސޭރިފަށުގެ ސަރަހައްދުތަކަށް ވަދެ ނިކުމެވާ އުޅަނދުފަހަރަށް ހުރަސްއެޅުމަށް އެމެރިކާގެ އަސްކަރިއްޔާއިން ކުރިއަށްގެންދިޔަ ބްލޮކޭޑް ނުވަތަ ބަންދުކުރުންތައް އުވާލައިފިއެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނީ، އަރަބި ކަނޑާއި އޮމާން ކަނޑުގައި ހުރި އީރާނުގެ ބަނދަރުތަކަށް ވަންނަ އަދި އެ ބަނދަރުތަކުން ނިކުންނަ އުޅަނދުފަހަރުގެ ދަތުރުފަތުރަށް އެމެރިކާގެ ސިފައިން މިހާރު ހުރަސް ނާޅާނެ ކަމަށެވެ.
އެކްސްގައި ކުރި ޕޯސްޓެއްގައި ސެންޓްކޮމް އިން ބުނެފައިވަނީ، ރައީސް ޑޮނަލްޑް ޓްރަމްޕްގެ އިރުޝާދާ އެއްގޮތަށް، އީރާނުގެ ބަނދަރުތަކާއި އައްސޭރިފަށުގެ ސަރަހައްދުތަކަށް ވަދެ ނިކުމެވާ ހުރިހާ ކަނޑުދަތުރުފަތުރަކަށް އަޅާފައިވާ ހުރަސްތައް އެމެރިކާގެ ސިފައިން މިއަދު އުވާލާފައިވާ ކަމަށެވެ.
މީގެ އިތުރުން ސެންޓްކޮމް އިން ބުނީ، އެމެރިކާގެ އަސްކަރިއްޔާއިން ބްލޮކޭޑް ތަންފީޒު ކުރުމަށް ކުރަމުންދިޔަ ހުރިހާ މަސައްކަތެއް މިހާރު ހުއްޓާލާފައިވާ ކަމަށެވެ. ނަމަވެސް، ދެ ގައުމުގެ ދެމެދުގައި ވެފައިވާ އެއްބަސްވުމުގެ ހުރިހާ ކަމެއް ފުރިހަމައަށް ތަންފީޒުވަމުންދާކަން ކަށަވަރު ކުރުމަށްޓަކައި، އެމެރިކާގެ ވަރުގަދަ މަނަވަރުތައް އެ ސަރަހައްދުގައި ދެމިތިބޭނެ ކަމަށްވެސް ސެންޓްކޮމް އިން ވަނީ ހާމަކޮށްފައެވެ.
