ނިއުކްލިއާ އިންސްޕެކްޓަރުންނަށް އީރާން އަށް ވަދެވޭނެ: އެމެރިކާގެ ނައިބު ރައީސް

އެމެރިކާ އާއި އީރާންއާ ދެމެދު ހަނގުރާމަ ނިންމުމަށް އެކުލަވާލި އެއްބަސްވުމުގެ ދަށުން، ނިއުކްލިއާ އިންސްޕެކްޓަރުން އީރާން އަށް "ފުރިހަމަ އަށް" ވަދެވޭނެ ކަމަށް އެމެރިކާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.

ހޯމަ ދުވަހު އެންބީސީ ނިއުސް އަށް ދެއްވި އިންޓަވިއުއެއްގައި ވޭންސް ވިދާޅުވީ، އެއްބަސްވުމުގެ މައިގަނޑު ބައެއްގެ ގޮތުގައި ބައިނަލްއަގުވާމީ އެޓޮމިކް އެނާޖީ އޭޖެންސީ އާއި އެމެރިކާ އިން އީރާން އަށް އެހީތެރިވެދީ، އީރާންގައި ހުރި މަތީ ފެންވަރުގެ ނިއުކްލިއާ މާއްދާ ނައްތާލުމަށް މަސައްކަތް ކުރާނެ ކަމަށެވެ. އެމެރިކާ އާއި އީރާންއާ ދެމެދު ވަނީ މި ކަމާ ގުޅޭ ހޭލުންތެރި ކަމުގެ ލިޔުމެއްގައި ސޮއި ކޮށްފައި ކަމަށް އޭނާ ވިދާޅުވި އެވެ.

މި އެއްބަސްވުމަށް އައުމަށް ދެ ޤައުމުން ކުރިއަށް ގެންދިޔަ މަޝްވަރާ ތަކުގެ ތެރޭގައި ވެސް، އަލުން ހަނގުރާމަ ފެށިދާނެ ކަމުގެ ބިރު ބޮޑުވެގެން ދިޔަ އެވެ. ނަމަވެސް، އުނދަގޫ މަރުހަލާ އަކަށް ފަހު ދެ ޤައުމުން ވެސް ހުކުރު ދުވަހު ރަސްމީކޮށް އެއްބަސްވުމުގައި ސޮއި ކުރާނެ ކަމަށް މިހާރު ވަނީ ހާމަ ކޮށްފައި އެވެ. 

މީޑިއާ ތަކުގައި ބުނެފައިވާ ގޮތުން، މި އެއްބަސްވުމުގައި ބައެއް ކަންކަން ނުހިމެނޭނެ އެވެ. އެގޮތުން ދެ ޤައުމަށް ވެސް ޙައްލު ހޯދުމަށް އެންމެ ބޮޑަށް އުނދަގޫ ވެފައިވާ ކަންކަން، ފަހަތަށް ޖައްސާލާފައިވާ ކަމަށް ވަނީ ބުނެފައި އެވެ. ހޯމަ ދުވަހާާ ހަަމައަށް އައިިއިރު ވެސް، އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން ސާފު މައުލޫމާތެއް ލިބިފައި ނުވެ އެވެ. 

މިވަގުތު ޖީ7 ގެ ބައްދަލުވުމުގައި ބައިވެރިވެ ވަޑައިގެންނެވުމަށް ފްރާންސްގައި ހުންނެވި އެމެރިކާގެ ރައީސް ޑޮނަލްޑް ޓްރަމްޕް ވެސް ވިދާޅުވެފައި ވަނީ، އެއްބަސްވުމުގައި ސޮއި ކުރުން ހުކުރު ދުވަހު އޮންނާނެ ކަމަށެވެ. އަދި ސުލްޙަ އަށް އާދެވިފައިވާ ކަމަށް ވެސް ޓްރަމްޕް ވަނީ ވިދާޅުވެފައި އެވެ.