ހަނގުރާމައިގައި ހަލާކުވި އީރާނުގެ ޕެޓްރޯކެމިކަލް ޔުނިޓްތަކުގެ 89 އިންސައްތަ އަލުން މަސައްކަތް ފަށައިފި
18 ޖޫން 2026 | ބުރާސްފަތި 11:43އިސްރާއީލުން ދިން ހަމަލާތަކުގައި ގެއްލުންވި އީރާނުގެ ޕެޓްރޯކެމިކަލް ކާރުޚާނާތަކުގެ 89 އިންސައްތަ އަލުން އޮޕަރޭޝަނަށް ގެނެސް، އުފެއްދުންތައް އުފައްދަން ފަށާފައިވާ ކަމަށް އެ ގައުމުގެ ޕެޓްރޯކެމިކަލް ހޯލްޑިން ގްރޫޕުން ހާމަކޮށްފި. މި ހަމަލާތަކާ ގުޅިގެން އުފެއްދުންތެރިކަމަށް ބުރޫއެރުމުން، އެތެރޭގެ ބޭނުންތަކަށް އިސްކަންދިނުމުގެ ގޮތުން މިދިޔަ އޭޕްރީލް މަހުން ފެށިގެން އެ ގައުމުން ވަނީ ޕެޓްރޯކެމިކަލް އެކްސްޕޯޓްކުރުން މަނާކޮށްފައި.
އީރާނުގެ ބަންދަރު އައްބާސްގައި ހުންނަ ޕާޝިއަން ގަލްފް ސްޓާ ކޮމްޕެނީ (ޕީ.ޖީ.އެސް.ޕީ.ސީ) ގެ ގޭސް ކޮންޑެންސޭޓް ރިފައިނަރީގެ އައު ފޭސް 3 ފެސިލިޓީގެ މަންޒަރެއް. | ގެޓީ އިމޭޖަސް
އިސްރާއީލާއި އެމެރިކާއާއެކު ހިނގި ކުރިމަތިލުންތަކުގައި ހަލާކުވެ، މަސައްކަތް ހުއްޓިފައިވާ އީރާނުގެ ޕެޓްރޯކެމިކަލް ޔުނިޓްތަކުގެ ގާތްގަނޑަކަށް 89 އިންސައްތަ އަލުން އޮޕަރޭޝަނަށް ގެނެސްފައިވާ ކަމަށް އެ ގައުމުގެ އެންމެ ބޮޑު ޕެޓްރޯކެމިކަލް ހޯލްޑިން ގްރޫޕުގެ އިސްވެރިޔާ ބުރާސްފަތި ދުވަހު ވިދާޅުވެއްޖެއެވެ. މިކަން ހާމަކޮށްފައިވަނީ އީރާނިއަން ސްޓޫޑަންޓް ނިއުސް އެޖެންސީންނެވެ.
ޕެޓްރޯކެމިކަލް އިންޑަސްޓްރީޒް ކުންފުނީގެ ޗީފް އެގްޒެކެޓިވް މުހައްމަދު ޝަރިއަތުމަދާރީ ވިދާޅުވީ، ހަލާކުވި ތަންތަން އަލުން އާރާސްތުކުރުމަށް ކުރި ހަލުވި މަސައްކަތްތަކާއެކު، މެދުކެނޑިފައިވާ ފެސިލިޓީތަކުން މިހާރު އަލުން އުފެއްދުންތައް އުފައްދަން ފަށާފައިވާ ކަމަށެވެ. އަދި ބައެއް ޔުނިޓްތަކުން ކަނޑައެޅިފައިވާ މިންވަރަށް ވުރެ އިތުރަށް ވެސް އުފެއްދުންތައް އުފައްދަމުންދާއިރު، ބައެއް ޔުނިޓްތަކުން އަދި ފުރިހަމަ ކެޕޭސިޓީގައި މަސައްކަތް ފަށާފައި ނުވާކަމަށް އޭނާ ފާހަގަކުރެއްވިއެވެ.
ޕެޓްރޯކެމިކަލް ކާރުޚާނާތަކަށް ބޭނުންވާ ސާމާނު ފޯރުކޮށްދޭ ޔުޓިލިޓީ ކުންފުނިތަކަށް އިސްރާއީލުން ދިން ހަމަލާތަކާ ގުޅިގެން، އީރާނުގެ ޕެޓްރޯކެމިކަލް ސިނާއަތުގެ އުފެއްދުންތަކަށް ބުރޫއެރުމުން، އެ ގައުމުގެ އެތެރޭގެ ބޭނުންތަކަށް ބޭނުންވާ މިންވަރު ކަށަވަރުކުރުމަށްޓަކައި ޕެޓްރޯކެމިކަލް އެކްސްޕޯޓް ކުރުން އީރާނުން މިދިޔަ އޭޕްރީލް މަހު ވަނީ މަނާކޮށްފައެވެ.
