އެމެރިކާއިން އީރާނާ ދެކޮޅަށް ކުރިއަށްގެންދިޔަ ކަނޑުގެ ބްލޮކޭޑް ރަސްމީކޮށް ނިމުމަކަށް އައުމާއެކު، އީރާނުގެ ތެޔޮ ޓޭންކަރުތަކާއި މުދާ އުފުލާ ބޯޓުތައް ދަތުރުކުރަން ފަށައިފި
ޕާކިސްތާނާއި ގަތަރު މެދުވެރިވެގެން އެމެރިކާއާއި އީރާނާ ދެމެދު އެކުލަވާލި އާ ފަހުމުނާމާއާއެކު، އީރާނާ ދެކޮޅަށް އެމެރިކާއިން ހިންގަމުންދިޔަ ކަނޑުގެ ބްލޮކޭޑް ރަސްމީކޮށް ނިމުމަކަށް ގެނެސްފި. މި އެއްބަސްވުމުގެ ދަށުން ހުރިހާ ދިމާއަކުން ކުރިމަތިލުންތައް ހުއްޓާލުމަށް ލާޒިމްކޮށްފައިވާއިރު، މީގެ ތެރޭގައި އިޒްރޭލުން ލުބުނާނަށް ދޭ ހަމަލާތައް ދާއިމީކޮށް ހުއްޓާލުންވެސް ހިމެނޭ. މި ނިންމުމާ ގުޅިގެން، އެތައް މަސްތަކެއް ވަންދެން ހުއްޓިފައި އޮތް އީރާނުގެ ތެޔޮ ޓޭންކަރުތަކާއި މުދާ އުފުލާ ބޯޓުތައް މިހާރު ދަނީ ބައިނަލްއަގުވާމީ ކަނޑުގެ ސަރަހައްދުގައި އެއްވެސް ހުރަހެއް ނެތި ދަތުރުކުރަމުން.
އީރާނުގެ ދެކުނުގެ ބަންދަރު އައްބާސްގެ އައްސޭރިފަށުގައިވާ ހުރްމުޒް ކަނޑުއޮޅީގައި، މުދާ އުފުލާ ގިނަ އަދަދެއްގެ ބޯޓުފަހަރު ތާށިވެފައި އޮތް މަންޒަރު ފެންނަ ފޮޓޯއެއް - 01 ޖޫން 2026. | އީޕީއޭ
އެމެރިކާއިން އީރާނާ ދެކޮޅަށް ކުރިއަށްގެންދިޔަ ކަނޑުގެ ބްލޮކޭޑް ނުވަތަ ހުރަސްއެޅުންތައް ރަސްމީކޮށް ނިމުމަކަށް އައުމާއެކު، އީރާނުގެ ތެޔޮ ޓޭންކަރުތަކާއި މުދާ އުފުލާ ބޯޓުތައް ދަތުރުކުރަން ފަށައިފިއެވެ. އީރާނުގެ ތެޔޮ އުފުލާ މަދުވެގެން ތިން ޓޭންކަރަކާއި ޒަރޫރީ މުދާ އުފުލާ ދެ ބޯޓެއް، އެމެރިކާގެ ކަނޑުގެ ސިފައިން ހުރަސްއަޅަމުންދިޔަ ސަރަހައްދުތައް ކާމިޔާބުކަމާއެކު ހުރަސްކޮށްފައިވާކަން އިތުބާރު ހުރި މަސްދަރުތަކާ ހަވާލާދީ ޕްރެސް ޓީވީން ވަނީ ކަށަވަރުކޮށްދީފައެވެ.
މި އުޅަނދުތައް ހުރަސްކޮށްފައިވަނީ ހޯމަ ދުވަހުގެ އިރުއޮއްސުނު ވަގުތުގައެވެ. މިއީ އީރާނާއި އެމެރިކާއާ ދެމެދު އަލަށް އެކުލަވާލި ފަހުމުނާމާގެ ދަށުން ލިބުނު ފުރަތަމަ އަމަލީ ކާމިޔާބީގެ ގޮތުގައި ބެލެވެއެވެ.
އީރާނުގެ އުޅަނދުފަހަރާ ދެކޮޅަށް އެމެރިކާއިން ޣައިރު ގާނޫނީ ގޮތެއްގައި ހިންގަމުންދިޔަ ކަނޑުގެ ހުރަސްއެޅުންތަކުގެ ސަބަބުން، މި އުޅަނދުތައް ދަތުރު ނުކުރެވި މަސްތަކެއް ވަންދެން ހުއްޓިފައި އޮތް ކަމަށް ކަނޑުދަތުރުފަތުރުގެ ދާއިރާގެ މަސްދަރުތަކުން މައުލޫމާތު ދީފައިވާ ކަމަށް އީރާނުގެ ދައުލަތުގެ މީޑިއާ ޕްރެސް ޓީވީއިން ރިޕޯޓުކޮށްފައިވެއެވެ. ނަމަވެސް މިހާރު އެ އުޅަނދުތައް ބައިނަލްއަގުވާމީ ކަނޑުގެ ސަރަހައްދުގައި އެއްވެސް ހުރަހެއް ނެތި ދަތުރުކުރަމުންދާ ކަމަށް އެ ފަރާތްތަކުން ބުނެއެވެ.
މި އުޅަނދުތަކަށް ދަތުރުކުރުމުގެ ފުރުސަތު ލިބިފައި މިވަނީ، ޕާކިސްތާނާއި ގަތަރު މެދުވެރިވެގެން އެކުލަވާލި ފަހުމުނާމާގައި ސޮއިކުރިތާ 24 ގަޑިއިރު ވެސް ނުވަނީހެވެ. މި އެއްބަސްވުމުގެ ދަށުން، ހުރިހާ ދިމާއަކުން ކުރިމަތިލުންތައް ހުއްޓާލުމުގެ ބައެއްގެ ގޮތުގައި، އީރާނާ ދެކޮޅަށް އެމެރިކާއިން ކުރިއަށްގެންދާ ޣައިރު ގާނޫނީ ކަނޑުގެ ބްލޮކޭޑް ވަގުތުން ހުއްޓާލުމަށް ވަނީ ލާޒިމްކޮށްފައެވެ.
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ސެކްރެޓޭރިއަޓުން ހޯމަ ދުވަހުގެ ކުރީކޮޅު ކަށަވަރުކޮށްދީފައިވާ ގޮތުގައި، މަޖުބޫރުކޮށްގެން ކުރިއަށްގެންދިޔަ ހަނގުރާމަ ނިމުމަކަށް ގެނައުމުގެ ފަހުމުނާމާގެ އިބާރާތްތައް ތެހެރާނާއި ވޮޝިންގްޓަނުން މިހާރު ވަނީ ފައިނަލްކޮށްފައެވެ. މީގެ ތެރޭގައި ލުބުނާން ހިމެނޭހެން ހުރިހާ ފްރަންޓެއްގައި އެމެރިކާއާއި އިޒްރޭލުން ހިންގާ ހަމަލާދިނުންތައް ވަގުތުން އަދި ދާއިމީކޮށް ހުއްޓާލުމާއި، އީރާނާ ދެކޮޅަށް އޮތް ކަނޑުގެ ބްލޮކޭޑް ނިމުމަކަށް ގެނައުން ހިމެނެއެވެ.
