އީރާނަށް ހަމަލާދިނުމަށްޓަކައި ޔޫރަޕްގައި ހުރި އަސްކަރީ މަރުކަޒުތައް ބޭނުންކުރުމުގެ ހުއްދަ އެމެރިކާގެ ސިފައިންނަށް ނުދިނުމަކީ ލަދުވެތި ކަމެއް: ޑިފެންސް ސެކްރެޓަރީ ހެގްސެތު

އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ބުރާސްފަތި ދުވަހު ނޭޓޯގެ ބައިވެރި ގައުމުތަކަށް ވަރަށް ބޮޑަށް ފާޑުވިދާޅުވެ، ޔޫރަޕްގައި ތިބޭ އެމެރިކާގެ ސިފައިންގެ ހާލަތު ބެލުމަށް ޕެންޓަގަނުން ހަ މަސް ދުވަހުގެ މުރާޖައާއެއް ކުރިއަށްގެންދާނެކަން އިއުލާން ކުރައްވައިފިއެވެ. މި މުރާޖައާ ބިނާވެގެންވަނީ ޔޫރަޕްގެ ގައުމުތަކުގެ އަމިއްލަ ސަލާމަތާއި ރައްކާތެރިކަމުގެ ޒިންމާ އެ ގައުމުތަކުން އުފުލުމުގައި ކިހާ އަވަސް މިނެއްގައި މަސައްކަތް ކުރޭތޯ ބެލުމުގެ މައްޗަށެވެ.

ބްރަސަލްސްގައި ބޭއްވި ނޭޓޯގެ ބައްދަލުވުމުގައި ވާހަކަދައްކަވަމުން ހެގްސެތު ވިދާޅުވީ، މިއީ ހަގީގީ މުރާޖައާއަކަށް ވާނެ ކަމަށެވެ. އަދި މި މުރާޖައާގެ ބޭނުމަކީ ޔޫރަޕްގެ ދިފާއީ ކަންކަމުގައި އިސް ދައުރެއް އަދާކޮށް، އެކަމުގެ މައިގަނޑު ޒިންމާ އުފުލުމަށް ނޭޓޯއިން އަވަސް ފިޔަވަޅުތަކެއް އަޅަމުންދާކަން ކަށަވަރު ކުރުން ކަމަށް އޭނާ ވިދާޅުވިއެވެ.

އީރާނަށް ހަމަލާދިނުމަށްޓަކައި ޔޫރަޕްގައި ހުރި އަސްކަރީ މަރުކަޒުތައް ބޭނުންކުރުމުގެ ހުއްދަ އެމެރިކާގެ ސިފައިންނަށް ނުދިނުމުން، ހެގްސެތު ވަނީ ޔޫރަޕްގެ ބައިވެރި ގައުމުތަކަށް ވަރަށް ބޮޑަށް ފާޑުވިދާޅުވެފައެވެ. އަދި އެއީ "ލަދުވެތި" އަމަލެއްގެ ގޮތުގައި އޭނާ ސިފަކުރެއްވިއެވެ.

މީގެ އިތުރުން ހެގްސެތު ވިދާޅުވީ، އެއްވެސް ސުވާލެއް އުފެދިގެން ނުވާނެ ފަދަ ކަންކަމުގައި، އެމެރިކާގެ ސިފައިންނަށް ބޭސްތަކާއި ވައިގެ ސަރަހައްދު ބޭނުންކުރުމުގެ ހުއްދަ ނުދީ ހިފެހެއްޓުމަކީ، އެމެރިކާގެ ދަރިން ނުރައްކަލުގެ ތެރެއަށް ހުށަހެޅުން ކަމަށެވެ.