ސަރުކާރުން ފޮނުވާ ބިލެއް ރައްޔިތުންގެ މަޖިލީހުގެ ކޮމިޓީތަކުގައި އެކަށީގެންވާ މިންވަރަށް ދިރާސާނުކުރޭ: މައުރޫފް
ގުނަވަން ބަދަލުކުރުމުގެ ބިލު ފުރިހަމަނުވާތީ ރައީސުލްޖުމްހޫރިއްޔާ އަނބުރާ ފޮނުއްވާލެއްވުމާ ގުޅިގެން، މަޖިލީހުގެ ކޮމިޓީތަކުން ބިލްތައް އެކަށީގެންވާ މިންވަރަށް ދިރާސާނުކުރާ ކަމަށް ކެންދޫ ދާއިރާގެ މެންބަރު މައުރޫފު ޒާކިރު ވިދާޅުވެއްޖެ. މަޖިލީހުގެ ސުޕަރ މެޖޯރިޓީ އޮތް ނަމަވެސް، އިދިކޮޅު މެންބަރުންނަށް ބަހުސްކުރުމުގެ ފުރުސަތު ނުދީ ބިލްތައް އަވަސްއަރުވާލައިގެން ނިންމާލުމުގެ ނަތީޖާ މިއަދު ފެންނަމުންދާ ކަމަށް އޭނާ ފާހަގަކުރެއްވި. އެހެންކަމުން، ބިލްތައް ފާސްކުރުމުގައި ކަމާބެހޭ ފަރާތްތަކުގެ މަޝްވަރާ ހޯދައި، ޒިންމާދާރުކަމާއެކު މަސައްކަތް ކުރުމަށް މައުރޫފު ގޮވާލެއްވި.
ކެންދޫ ދާއިރާގެ މެންބަރު މައުރޫފު ޒާކިރު. | ރައްޔިތުންގެ މަޖިލިސް
ސަރުކާރުން ރައްޔިތުންގެ މަޖިލީހަށް ފޮނުވާ ބިލްތައް ކޮމިޓީތަކުގައި އެކަށީގެންވާ މިންވަރަށް ދިރާސާނުކުރާ ކަމަށާއި، ގުނަވަން ޓްރާންސްޕްލާންޓުގެ ބިލަކީ ވެސް އޭގެ މިސާލެއް ކަމަށް ކެންދޫ ދާއިރާގެ މެންބަރު މައުރޫފު ޒާކިރު ވިދާޅުވެއްޖެ އެވެ.
މައުރޫފު މިފަދައިން ވިދާޅުވީ އިންސާނުންގެ ގުނަވަން ޓްރާންސްޕްލާންޓު ކުރުމުގެ ބިލު ފުރިހަމަ ނުވާކަމަށް ވިދާޅުވެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ބިލު އަނބުރާ މަޖިލީހަށް ފޮނުއްވާލެއްވުމާ ގުޅިގެން މަޖިލީހުގައި އެ ބިލަށް ކުރި ބަހުސްގަ އެވެ.
މައުރޫފު ވިދާޅުވީ އެ ބިލު އަލުން ކޮމިޓީއަށް ފޮނުވައި އިތުރަށް ދިރާސާކުރުމަށްފަހު ރަނގަޅު އިސްލާހުތަކެއް ނުވަތަ ބަދަލުތަކެއް ގެނައުމަށްފަހުގައި އެ ބިލު ފާސްކުރަން ފެންނަ ކަމަށެވެ. އެހެންނަމަވެސް ރައީސުލްޖުމްހޫރިއްޔާ އެ ބިލު އަނބުރާ މަޖިލީހަށް ފޮނުއްވާލެއްވުމާ ގުޅިގެން ހަނދާނަށް އަންނަ ކަމެއް ހިއްސާކުރަން ބޭނުންވާ ކަމަށް އޭނާ ވިދާޅުވި އެވެ. މައުރޫފު ވިދާޅުވީ މިހާރުގެ މަޖިލީހުގެ ކޮމިޓީތަކުގައި ސަރުކާރުން ފޮނުވާ ބިލެއް ހަގީގަތުގައި އެކަށީގެންވާ މިންވަރަށް ދިރާސާނުކުރާ ކަމަށެވެ. އެ ބިލްތަކަށް މަޝްވަރާއެއް ނުކުރާ ކަމަށާއި ބަހުސްއެއް ނުކުރާ ކަމަށް އޭނާ ފާހަގަކުރެއްވި އެވެ.
ދެން އަޅުގަނޑު ވެސް އަލަށް ރައްޔިތުންގެ މަޖިލީހަށް އިންތިޚާބުވެގެން މި ދައުރުގެ ތެރޭގައި ދާއިރުގައި އަޅުގަނޑު ސަރުކާރުން ފޮނުވާ ބިލެއް ރައްޔިތުންގެ މަޖިލީހުގެ ކޮމިޓީތަކުގައި ޙަޤީޤަތުގައި އިއްޒަތްތެރި ރައީސް، އެކަށީގެންވާ މިންވަރަށް ދިރާސާނުކުރޭ. އެކަމަކަށް މަޝްވަރާއެއް ނުކުރޭ. އެކަމަކަށް ބަހުސެއް ނުކުރޭ. އެޓަރނީ ޖެނެރަލަށް ނުވަތަ ސަރުކާރުގެ ކަމާ ބެހޭ ކޮންމެވެސް ފަރާތަކަށް ގުޅާލާފައި ނިންމައިލެވޭތޯ އަވަހަށް ބަލަނީ. މިއަދު އަޅުގަނޑުމެންނަށް މި ފެންނަނީ އޭގެ ނަތީޖާ ދެއުޅިއެއްނުވާ ވާހަކަ ނަސީބެއް ރައީސުލްޖުމްހޫރިއްޔާ މި ބިލު ރަނގަޅަށް ބަލާލިކަން އެހެންނޫންނަމަ އަޅުގަނޑުމެންނަށް ޖެހުނީހީ ބިލު ފާސްނުވަނީސް ގަވާއިދު ހަދައި ތަންފީޒް ކޮށްގެން ބައެއްގެ ގުނަވަންނަގާކަށްނު . އެ ހާލަތުގައި މި އޮތީ މި ބިލު. މިއީ ޙަޤީޤަތުގައި އިއްޒަތްތެރި ރައީސް، މިހާރު މި ރައްޔިތުންގެ މަޖިލީހުގެ ކޮމިޓީތަކަކީ އަދި ސުޕަރ މެޖޯރިޓީއާއި އަޣްލަބިއްޔަތު އޮތްކަމުގައި ވިޔަސް ވެސް، އެ ބިލަށް، އެ ކޮމިޓީތަކަށް ހުށަހެޅޭ މައްސަލަތައް ރަނގަޅަށް ކަމާ ބެހޭ ފަރާތްތަކާއެކު މަޖިލީހުގެ ކޮމިޓީތަކަށް އެކަންޏެއް ވެސް ނޫން.ކެންދޫ ދާއިރާގެ މެންބަރު މައުރޫފު ޒާކިރު
މިހާރުގެ މަޖިލީހުގެ ކޮމިޓީތަކަކީ ސުޕަރ މެޖޯރިޓީއާއި އަޣްލަބިއްޔަތު އޮތްކަމުގައި ވިޔަސް ވެސް އެ ކޮމިޓީތަކަށް ހުށަހެޅޭ މައްސަލަތައް ރަނގަޅަށް ކަމާބެހޭ ފަރާތްތަކާއެކު ދިރާސާނުކުރާ ކަމަށް މައުރޫފު ވިދާޅުވި އެވެ.
މަޖިލީހުގެ ފްލޯ ވެސް މިހާރަކަށް އައިސް ހިންގަނީ ގަވާއިދާ ޚިލާފަށް ކަމަށް އޭނާ ވިދާޅުވި އެވެ. މިސާލަކަށް ބިލަކަށް ބަހުސްކުރަން ތައްޔާރުވެލާއިރަށް މަޖިލީހުގެ ރައީސް ކުރައްވާ ކަމަކީ އިދިކޮޅުން އެއްޗެއް ބުނަން ފުރުސަތު ނުދީ އެ ބިލުގެ ބަހުސް ހުއްޓައިލާފައި މަޖިލިސް ކުރުކޮށްލާފައި އަނެއްކާ އަނެއް ބިލަށް ދިއުން ކަމަށް މައުރޫފު ވިދާޅުވި އެވެ.
ކަނޑައެޅިގެން މިހާރު އިއްޒަތްތެރި ރައީސް ކަންތައް ކުރައްވާ ގޮތް އެއީ. އެހެންވީމާ، މަޖިލީހުގެ ފްލޯއެއް ނޫން މިހާރު ވާ ގޮތަކީ. އިއްޒަތްތެރި ރައީސް، ސުޕަރ މެޖޯރިޓީ އޮތެއް ކަމަކު މަޖިލީހުގެ ތަޅުމުގައި މައިނޯރިޓީއަށް ބަހުސްކުރަން ފުރުޞަތު ދޭންޖެހޭ. މަޖިލީހުގެ ތަޅުމުގައި މައިނޯރިޓީއަށް ބަހުސްކުރަން ފުރުޞަތު ދޭންޖެހޭނެ. އަޅުގަނޑުމެން އެޗެއް ބުނެދާނެތީ، އެންމެ ދިހަބާރަ މެންބަރުންނޭ މިތާ މި ތިބީ. އަޅުގަނޑުމެން ބަހުސްކޮށްލަން ފުރުޞަތަށް ނުދީ، ހަމަ އިރުކޮޅަކުން ބަހުސްގެ މައުޟޫޢު ބަދަލުކޮށްލައި، މަޖިލިސް ނިންމާލާނެ. މިއީ ކޮން އުސޫލެއްތޯ؟ ހަޖަމުކުރަން ދަސްކުރަންޖެހޭނެ. ވާހަކަ އަޑުއަހަން ދަސްކުރަންޖެހޭނެ އިއްޒަތްތެރި ރައީސް. އޭގެ ނަތީޖާއެއް ނޫންތޯ މިއަދު މި ފެންނަނީ. ނަސީބެއް ނޫން ރައީސުލްޖުމްހޫރިއްޔާ މި ރަނގަޅަށް ބެލިކަން ނަސީބެއްނު މި ބެލިކަން އެހެންނޫންނަމަ. ރައްޔިތުންގެ މަޖިލީހުގެ މެންބަރުން މިކަމުގެ ޒިންމާ އިއްޒަތްތެރި ރައީސް ނަންގަވަންޖެހޭނެ.ކެންދޫ ދާއިރާގެ މެންބަރު މައުރޫފު ޒާކިރު
މިއީ ކޮން އުސޫލެއްތޯ ސުވާލުކުރައްވައި މައުރޫފު ވިދާޅުވީ ހަޖަމުކުރަން ދަސްކުރަންޖެހޭ ކަމަށާއި ވާހަކަ އަޑުއަހަން ދަސްކުރަންޖެހޭ ކަމަށެވެ. އެގެ ނަތީޖާއެއް ނޫންތޯ މިއަދު މިފެންނަނީ, ރައީސުލްޖުމްހޫރިއްޔާ އެ ބިލު ރަނގަޅަށް ބެއްލެލިކަން އެއީ ނަސީބެއް ކަމަށް އޭނާ ވިދާޅުވި އެވެ.
ކޮމިޓީތަކުގައި ރަނގަޅަކަށް ދިރާސާއެއް ނުކުރާ ކަމަށާއި ކަމާބޭފަރާތްތަކެއް ހާޒިރެއް ނުކުރާ ކަމަށް އޭނާ ވިދާޅުވި އެވެ. ކޮމިޓީއެއްގައި އަނގައިން ބުނާ މީހަކު ނޫޅޭ ކަމަށާއި ތަޅުމުގެ ފްލޯގައި ހުއްދަދީފިއްޔާ ނޫނީ އަނގައިން ބުނާ މީހަކު ނޫޅޭ ކަމަށް މައުރޫފު ވިދާޅުވި އެވެ.
