މިގައުމުގައި ނެތީ ގާނޫނާއި ގަވާއިދެއް ނޫން، ގާނޫނުތައް ތަންފީޒު ކުރާނެ އިހުލާސްތެރި ވެރީން!

ދިވެހިރާއްޖެއަކީ ނިސްބަތުން ބަލާއިރު ދުނިޔޭގެ އެހެން ގައުމުތަކާ އަޅާބަލާއިރު އެންމެ ގިނަ ގާނޫނުތަކާއި ގަވާއިދުތައް ލިޔެވިފައިވާ އެއް ގައުމެވެ. ކޮންމެ ކަމަކަށް ޚާއްސަ ގާނޫނެއް، ކޮންމެ މައްސަލައަކަށް ހައްލެއް ކަރުދާހުގައި އޮވޭ ބުންޏަސް ދޮގަކަށް ނުވާނެ އެވެ. ނަމަވެސް މިއަދު ގައުމުގެ ހާލަތު އޮތް ގޮތުން އުފެދޭ އެންމެ ބޮޑު ސުވާލަކީ، މިހާ ގިނަ ގާނޫނުތަކެއް ހުރެމެ، ގައުމުގެ ކަންކަން އިސްލާހު ނުވަނީ ކީއްވެގެންތޯ އެވެ؟ ޖަވާބަކީ ވަރަށް ސާފެވެ. މި ގައުމުގައި މަދުވަނީ ގާނޫނުތަކެއް ނޫނެވެ. މަދުވަނީ އެ ގާނޫނުތައް ނަގަހައްޓައި، ވަކި މީހަކަށް ބެލުމެއް ނެތި ތަންފީޒު ކުރާނެ އިހުލާސްތެރި ވެރިންނެވެ.

ރައްޔިތުންގެ މަޖިލީހުގެ ޒިންމާ އާއި ހަގީގީ ހާލަތަށް ނަޒަރު ހިންގާލާއިރު، ރައްޔިތުންގެ ހައްގުގައި އެންމެ ބޮޑަށް ވަކާލާތު ކުރަން ޖެހޭ ތަނަކީ ރައްޔިތުންގެ މަޖިލީހެވެ. މަޖިލީހުގެ މައިގަނޑު ދެ ޒިންމާއަކީ ގާނޫނު ހެދުމާއި، ސަރުކާރުން ގާނޫނުތައް ތަންފީޒުކުރާ މިންވަރު ބަލައި ޒިންމާދާރު ކުރުވުމެވެ. ނަމަވެސް މިއަދު ފެންނަނީ މުޅިން ތަފާތު މަންޒަރެކެވެ. 20 ވަނަ ރައްޔިތުންގެ މަޖިލީހަށް ބަލާއިރު، ސަރުކާރު ހިންގާ ޕީއެންސީގެ ބޮޑު މެޖޯރިޓީއެއް އޮތް ނަމަވެސް، ރައްޔިތުންގެ އަސާސީ ހައްގުތަކަށްވުރެ ބޮޑަށް އިސްކަންދެނީ ސަރުކާރުން ބޭނުންވާ ގޮތަށް ކަންކަން ނިންމުމަށެވެ.

މަޖިލީހުގެ ބަހުސްތަކަށް ބަލާއިރު، ގިނަ ފަހަރަށް ފެންނަނީ ބިލްތަކުގެ ފެންވަރާއި އޭގެ ސަބަބުން ރައްޔިތުންނަށް ކުރާނެ ފައިދާއާ ބެހޭގޮތުން ވާހަކަ ދެއްކުމުގެ ބަދަލުގައި، އެއް މެންބަރަކު އަނެއް މެންބަރަކަށް ފުރައްސާރަ ކުރުމާއި ޒާތީ ވާހަކަ ދައްކަވާ މަންޒަރެވެ. ސިޔާސީ މަންފާއަކަށްޓަކައި މުޅިން ނުގުޅޭ ވާހަކަތައް ދައްކައި، ގައުމީ މަސްލަހަތަށްވުރެ ޕާޓީގެ މަސްލަހަތު އިސްކުރާ މަންޒަރެވެ.

ރާއްޖޭގެ ގާނޫނުތަކަކީ ވިޔަފާރި އުސޫލުން ވިއްކާ އެއްޗަކަށް ވާނަމަ، އެންމެ ބޮޑު އަގު ލިބޭނެ އެކައްޗަކީ ރާއްޖޭގެ ގާނޫނު ފޮތްތައް ކަމަށް ވެސް ހުދު މަޖިލިސް މެންބަރުން ވެސް ގެންދަވަނީ ވިދާޅުވަމުންނެވެ. ސަބަބަކީ އެ ގާނޫނުތަކަކީ ބޭނުން ނުކޮށް އާލަތްތަކެއްގެ ގޮތުގައި ހުރި އެއްޗެހި ކަމަށްވާތީ އެވެ. ގާނޫނުތަކުގެ ބޭނުން ނުކުރެވެނީ ތަންފީޒީ މަރުހަލާގައި ތިއްބެވި ބޭފުޅުންގެ ކޮރަޕްޝަނާއި ނުފޫޒުގެ ސަބަބުންނެވެ. ގާނޫނު ހަދަނީ ވަކި ބަޔަކަށް ފައިދާވާ ގޮތަށް ނުވަތަ ވަކި ބަޔަކު ސަލާމަތްވާނެ ގޮތަށް ކަމަށް ވެސް މެންބަރުން ތުހުމަތު ކުރައްވަ އެވެ. 

މީގެ އިތުރުން ގާނޫނު ތަންފީޒު ކުރުމުގެ ދޯހަޅިކަން ހުރި މިންވަރު ގައުމުގެ ހުރިހާ ދިމާލަކުން ފެންނާނެ އެވެ.

އެގޮތުން ގާނޫނު ތަންފީޒު ނުވާކަމުގެ އެންމެ ސާދާ މިސާލަކީ ބިދޭސީންގެ މައްސަލަ އެވެ. ފިހާރަތަކުގެ ސޭޓުންނަށް ބިދޭސީން ތިބުން ގާނޫނުން މަނާކޮށްފައި އޮތް ނަމަވެސް، މާލޭގެ ކޮންމެ ފިހާރައަކަށް ބަލާލި ކަމުގައިވިޔަސް ފެންނަނީ ބިދޭސީ ސޭޓުންނެވެ. ހަމައެހެންމެ، އާންމު ތަންތަނުގައި ސިނގިރޭޓް ބުއިމާއި ވަކިން ސިނގިރޭޓް ވިއްކުން މަނާކޮށްފައި އޮތް ނަމަވެސް، އެކަން ކުރަނީ ހާމަކަން ބޮޑު ގޮތެއްގަ އެވެ. ނަމަވެސް މި ފަދަ މައްސަލަތަކާ ދެކޮޅަށް ނުކުންނާނެ މުއައްސަސާއެއް ވެރިއެއް ނެތެވެ.

ގިނަ ބަޔަކު ގަބޫލުކުރާ ގޮތުގައި މި ގައުމުގައި ހަމައެކަނި ހަރުދަނާކޮށް ތަންފީޒު ކުރެވެނީ ޓްރެފިކް ގާނޫނެވެ. ސައިކަލުގެ ލައިސެންސް އޮތްތޯ ބެލުމާއި ޖޫރިމަނާ ކުރުމުގައި ފުލުހުން ވަރަށް ހަރަކާތްތެރި އެވެ. ނަމަވެސް ގައުމުގެ އިގްތިސާދާއި، އިޖުތިމާއީ އަދާލަތާއި، ބޮޑެތި ވައްކަންތަކާ ގުޅޭ ގާނޫނުތައް ތަންފީޒު ކުރުމުގައި ފެންނަނީ ފަސްޖެހޭ މަންޒަރެވެ.

ކަންމިހެން އޮތްއިރު، ގައުމުގެ ކަންކަން އިސްލާހު ކުރުމަށްޓަކައި އިތުރު ގާނޫނުތަކެއް ހެދުމުގެ ބަދަލުގައި މިއަދު ބޭނުންވަނީ ހުރި ގާނޫނުތައް ތަންފީޒު ކުރާނެ ހިތްވަރު ހުރި ވެރިންނެވެ. މުއައްސަސާތައް ބާރުވެރިކޮށް، ކޮރަޕްޝަނުން ސަލާމަތްވެފައިވާ، އިހުލާސްތެރިކަމާއެކު ގައުމަށް ޚިދުމަތް ކުރާނެ ބޭފުޅުން މަގާމުތަކަށް އައުމެވެ. ގާނޫނަކީ ހަމައެކަނި ފޮތެއްގައި ލިޔެފައި އޮންނަ އެއްޗަކަށް ވާހާ ހިނދަކު، ގައުމަށް ލިބޭނެ ހަގީގީ ކުރިއެރުމެއް ނެތެވެ. ގައުމު ސަލާމަތް ކުރެވޭނީ ގާނޫނުގެ ކުރިމަތީގައި އެންމެން ހަމަހަމަކޮށް، އަމާނާތްތެރިކަމާއެކު ގާނޫނު ތަންފީޒު ކުރާނެ ވެރިންތަކެއް ތިބެގެންނުންތޯ އެވެ.