ދެ ވަނަ ދައުރަކަށް ވާދަ ކުރެއްވުމަކީ ބައިޑަން ހެއްދެވި ވަރަށް ބޮޑު ގޯހެއް: ހިލަރީ ކްލިންޓަން
18 ޖޫން 2026 | ބުރާސްފަތި 09:34ކްލިންޓަން ވިދާޅެފައި ވަނީ، އެއް ދައުރުގައި ވެރިކަން ކުރައްވައި ރައްޔިތުންނަށް ޚިދުމަތް ކުރެއްވުމަށް ފަހު، އަންނަ ޖީލަށް ބާރުތައް ދޭން ބައިޑަން ނިންމެވި ނަމަ މާ ރަނގަޅުވީސް ކަމަށް. އަދި މާ ބޮޑު ވާދަވެރިކަމެއް އެ ޙާލަތުގައި އުފެދުނީސް ކަމަށް ވެސް ކްލިންޓަން ވިދާޅުވި.
އެމެރިކާގެ ކުރީގެ ރައީސް ޖޯ ބައިޑަން އާއި ކުރީގެ ސެކްރެޓަރީ އޮފް ސްޓޭޓް ހިލަރީ ކްލިންޓަން. | ރޮއިޓާސް
އެމެރިކާގެ ކުރީގެ ރައީސް ޖޯ ބައިޑަން، 2024 ވަނަ އަހަރު އޮތް ރިޔާސީ އިންތިޚާބުގައި ދެ ވަނަ ދައުރަކަށް ވާދަ ކުރެއްވުމަކީ ހެއްދެވި ވަރަށް ބޮޑު ގޯހެއް ކަމަށް އެމެރިކާގެ ކުރީގެ ސެކްރެޓަރީ އޮފް ސްޓޭޓް ހިލަރީ ކްލިންޓަން ވިދާޅުވެއްޖެ އެވެ.
ނިއު ޔޯކް ސިޓީގައި ނިއު ޔޯކާ މަޖައްލާގެ އެޑިޓަރު ޑޭވިޑް ރެމްނިކްއާ ވާހަކަ ދައްކަވަމުން ކްލިންޓަން ދެއްކެވި މި ވާހަކަ ތަކަކީ ބައިޑަންގެ ނިންމުމާ ބެހޭ ގޮތުން އޭނާ ހާމަ ކުރެއްވި އެންމެ ބާރު ގަދަ ފާޑު ކިޔުމެވެ.
2024 ގެ ރިޔާސީ އިންތިޚާބަށް ބައިޑަން ނުކުމެ ވަޑައިގަތުމަކީ ބޮޑު ގޯހެއް ކަމަށް ރެމްނިކް ސުވާލު ކުރުމުން ކްލިންޓަން ވިދާޅުވީ، އެއީ ބޮޑު ގޯހެއް ކަމަށާއި އެއީ އޭނާގެ ނަފްސަށާއި އޭނާގެ އާއިލާ އަދި ޤައުމަށް ވެސް ބޮޑު ގޯހެއް ކަމަށެވެ.
މީގެ އިތުރުން ކްލިންޓަން ވިދާޅެފައި ވަނީ، އެއް ދައުރުގައި ވެރިކަން ކުރައްވައި ރައްޔިތުންނަށް ޚިދުމަތް ކުރެއްވުމަށް ފަހު، އަންނަ ޖީލށް ބާރުތައް ދޭން ބައިޑަން ނިންމެވި ނަމަ މާ ރަނގަޅުވީސް ކަމަށެވެ. އަދި މާ ބޮޑު ވާދަވެރިކަމެއް އެ ޙާލަތުގައި އުފެދުނީސް ކަމަށް ވެސް ކްލިންޓަން ވިދާޅުވި އެވެ.
އެއާ އެކު ކްލިންޓަން ވިދާޅުވީ، އެފަދަ ޙާލަތެއްގައި ނައިބު ރައީސް ނުވަތަ ގަވަރުނަރެއް ނުވަތަ ސެނެޓަރެއް ނުވަތަ އެހެން މީހަކު ކުރިއަށް ނެރުއްވި ނަމަވެސް، އިންތިޚާބުގައި ޑޮނަލްޑް ޓްރަމްޕް ބަލި ކުރައްވަން ފަސޭހަވީސް ކަމަށެވެ. އެހެންވެ، އެއީ ބައިޑަންގެ ފަރާތުން ހިނގި ވަރަށް ބޮޑު ގޯހެއް ކަމަށް ކްލިންޓަން ވަނީ ވިދާޅުވެފައި އެވެ.
ކްލިންޓަންގެ ވާހަކަތަކާ ގުޅިގެން، އެކަމަށް ރައްދު ދެއްވުމަށް ބައިޑަންގެ ތަރުޖަމާނު ޓީޖޭ ޑަކްލޯ ވަނީ ދެކޮޅު ހައްދަވައިފަ އެވެ. އެންމެ ފުރަތަމަ ބައިޑަން ވަނީ 2024 ވަނަ އަހަރުގެ އިންތިޚާބުގައި ވާދަ ކުރައްވަން ނިންމަވައިފަ އެވެ. ނަމަވެސް، ރިޔާސީ ބަހުސްގައި ޓްރަމްޕްއާ ދެކޮޅަށް، ބައިޑަންގެ ފަރާތުން ފެނުނު ދަށް ޕާފޮމަންސްގެ ސަބަބުން އެތައް ފާޑު ކިޔުން ތަކެއް އަމާޒުވެ، އެންމެ ފަހުން ބައިޑަން ވަނީ ރިޔާސީ ރޭހުން ވަކިވެ ވަޑައިގެންފައި އެވެ.
ރިޔާސީ ރޭހުން ބައިޑަން ވަކިވެ ވަޑައިގެންނެވިއިރު، އޭނާގެ އުމުރާއި، ޞިއްޙީ ޙާލަތާ ގުޅޭ ގޮތުން އޮތީ ގިނަ ބަހުސް ތަކެއް އުފެދިފައި އެވެ. އެކަމުގެ ސަބަބުން ބައިޑަން ނިސްބަތްވެ ވަޑައިގަންނަވާ ޑިމޮކްރެޓިކް ޕާޓީގެ ތެރެއިން ވެސް ބައިޑަން އަށް އެތައް ޕްރެޝަރެއް ކުރިމަތިވި އެވެ. ރިޔާސީ ރޭހުން ބައިޑަން ވަކިވެ ވަޑައިގެންނެވުމާ އެކު، އިންތިޚާބުގައި ވާދަ ކުރެއްވި އޭނާގެ ނައިބު ރައީސް ކަމަލާ ހެރިސް އެވެ. ނަމަވެސް، އިންތިޚާބުގައި ޓްރަމްޕްއާ ވާދަ ކުރައްވައި ކަމަލާ އަށް ވަނީ ނާކާމިޔާބާ ކުރިމަތިލާން ޖެހިފައި އެވެ.
މަސްދަރު: ސީބީއެސް
