ޓްރަމްޕްގެ އެންމެ ފަހުގެ މެޑިކަލް ޗެކަޕްގައި 22 ޑޮކްޓަރުންނަށް ދެއްކި، މިއީ ރެކޯޑު އަދަދެއް

އެމެރިކާގެ ރައީސް ޑޮނަލްޑް ޓްރަމްޕް އެންމެ ފަހުން ހެއްދެވި މެޑިކަލް ޗެކަޕްގައި 22 ޑޮކްޓަރުންނަށް ދައްކަވާފައިވާ ކަމަށް ހާމަވެއްޖެ އެވެ.

އެންމެ ފަހުން މިދިޔަ މެއި މަހުގެ ތެރޭގައި ޓްރަމްޕް ވަނީ މެޑިކަލް ޗެކަޕް ހައްދަވައިފަ އެވެ. އެއީ 13 މަސް ދުވަހުގެ ތެރޭގައި ޓްރަމްޕް ޗެކަޕް ހައްދަވަން ވަޑައިގެންނެވި ތިން ވަނަ ފަހަރެވެ. އެ ފަހަރު ޓްރަމްޕް 22 ޑޮކްޓަރުންނަށް ދައްކަވާފައިވާ ކަމަށް ހާމަވެފައިވާއިރު، މިއީ ކުރީގެ ޗެކަޕްތަކާ އަޅާ ބަލާއިރު ދެ ގުނަ އިތުރު އަދަދެއް ކަމަށް ފާހަގަ ކޮށްފައިވެ އެވެ. 

އެހެން ކަމުން މިއީ އެމެރިކާގެ ރައީސެއްގެ ޗެކަޕެއްގައި އެންމެ ގިނަ ޑޮކްޓަރުން ބައިވެރިވެފައިވާ ފަހަރު ކަމަށް ރިޕޯޓު ތަކުގައި ބުނެފައިވެ އެވެ. މިކަމާ ގުޅިގެން ވޮޝިންޓަން ޕޯސްޓަށް މައުލޫމާތު ދެމުން ޞިއްޙީ ދާއިރާގެ ތަޖުރިބާކާރުން ބުނީ، މި އަދަދަކީ އާދައިގެ އަދަދު ތަކެއް ނޫން ކަމަށެވެ. އަދި މިކަމުގެ ސަބަބުން ޓްރަމްޕްގެ ޞިއްޙީ ޙާލަތާ މެދު އިތުރު ކަންބޮޑުވުން ތަކެއް އޮތް ކަމަށް ވެސް ވަނީ ފާހަގަ ކޮށްފައި އެވެ. 

އެމެރިކާގެ ކުރީގެ ނައިބު ރައީސް ޑިކް ޗެނީގެ ޑޮކްޓަރު ޖޮނަތަން ރެއިނާ ވެސް ވިދާޅުވެފައި ވަނީ، 22 ޑޮކްޓަރުން ޗެކަޕްގައި ބައިވެރިވެފައި ވުމަކީ ގިނަ އަދަދެއް ކަމަށެވެ. އެކަމާ ގުޅޭ ގޮތުން އެމެރިކާގެ ރިޔާސީ ގަނޑުވަރު ވައިޓް ހައުސް އިން ބުނީ، 22 ޑޮކްޓަރުންގެ ތެރޭގައި އާންމު ޑޮކްޓަރުން ވެސް ހިމެނޭ ކަމަށެވެ. 

މެއި މަހު ހެއްދެވި ޗެކަޕަށް ފަހު ޓްރަމްޕްގެ ޑޮކްޓަރު ޝޯބް ބާބަބެއްލާ ވިދާޅުވެފައި ވަނީ، މިހާރު ވެސް ޓްރަމްޕް ހުންނެވީ ވަރަށް ރަނގަޅު ޞިއްޙީ ޙާލަތެއްގައި ކަމަށެވެ. އަދި ޓްރަމްޕްގެ ހިތުގެ މަސައްކަތާއި، ނޭވާލުމުގެ ނިޒާމާއި، ނާރުތަކުގެ މަސައްކަތް އަދި ހަށިގަނޑުގެ އާންމު މަސައްކަތްތައް ވަރަށް ރަނގަޅު ކަމަށް ވެސް ޑޮކްޓަރު ވަނީ ވިދާޅުވެފައި އެވެ. ޗެކަޕަށް ފަހު ޓްރަމްޕް ވެސް ވިދާޅުވެފައި ވަނީ، އޭނާގެ ޗެކަޕް ވަރަށް ފުރިހަމަ ކަމަށާއި، އޭނާ ހުންނެވީ ވަރަށް ފިޓުކޮށް ކަމަށެވެ. 

ޓްރަމްޕްގެ މި ފަހަރުގެ ޗެކަޕަށް ގިނަ ބައެއްގެ ސަމާލުކަން ލިބުނީ، ގާތް ގާތުގައި ޗެކަޕް ހައްދަވަން ވަޑައިގެންނެވުމުންނެވެ. އެގޮތުން މިދިޔަ އަހަރުގެ އޯގަސްޓު މަހުގެ ތެރޭގައި އަހަރީ ޗެކަޕް ހައްދަވާފައިވާއިރު، ކުއްލި އަކަށް މެއި މަހު ޗެކަޕް ހައްދަވަން ވަޑައިގެންނެވުމުން ގިނަ ބަޔަކު ކަންބޮޑުވުން ފާޅު ކޮށްފައިވެ އެވެ. 

ޓްރަމްޕްގެ އެންމެ ފަހުގެ މެޑިކަލް ޗެކަޕަށް ފަހު، ޑޮކްޓަރުން ތަައްޔާރު ކުރެއްވި ރިޕޯޓުގައި ވަނީ ބަރުދަން ލުއި ކުރުމަށް އިރުޝާދު ދެއްވާފައި އެވެ. އެގޮތުން އިސްކޮޅުގައި ހަ ފޫޓު ތިން އިންޗި ހުންނަ ޓްރަމްޕްގެ ބަރުދަނަކީ މިހާރު 108 ކިލޯ ގްރާމް ކަމަށް ފާހަގަ ކޮށްފައިވެ އެވެ. މިއީ މިދިޔަ އަހަރުގެ އޭޕްރީލް މަހު ހެދި މެޑިކަލްއާ އަޅާ ބަލާއިރު، 6.4 ކިލޯ ގްރާމްގެ އިތުރު ވުމެކެވެ.

އެހެންކަމުން ކެއުމަށް ބަދަލު ގެނައުމަށާއި، ކަސްރަތު އިތުރު ކުރުމަށް ޑޮކްޓަރު ވަނީ ލަފާ ދެއްވާފަ އެވެ. ނަމަވެސް ޓްރަމްޕްގެ އުމުރު އޭނާގެ އަސްލު އުމުރަށް ވުރެ 14 އަހަރު ހަގު ކަމަށް ޑޮކްޓަރު ފާހަގަ ކުރެއްވި އެވެ. މީގެ އިތުރުން ސިކުނޑީގެ ގާބިލުކަން ދެނެގަތުމަށް ހެދި ޓެސްޓުން ޓްރަމްޕް ވަނީ 30 އަކުން 30 މާކްސް ހޯއްދަވާފައި އެވެ.