އެޕްސްޓީންއާ ގުޅިގެން އެއްވެސް މީހަކަށް އަނިޔާވެރި ވެފައި ނުވާނެ: ބިލް ގޭޓްސް

އެމެރިކާގެ ޖިންސީ ކުށްވެރިިޔާ ޖެފްރީ އެޕްސްޓީންއާ ގުޅިގެން އެއްވެސް މީހަކަށް އަނިޔާވެރި ވެފައި ނުވާނެ ކަމަށް، މައިކްރޯސޮފްޓްގެ ކޯ ފައުންޑަރ ބިލް ގޭޓްސް ވިދާޅުވެއްޖެ އެވެ. 

ބިލް ގޭޓްސް މިހެން ވިދާޅުވީ، އެމެރިކާގެ ޤާނޫނު ހަދާ މަޖިލީހުގެ މެމްބަރުން ކުރެއްވި ސުވާލު ތަކަށް ޖަވާބު ދެއްވަމުންނެވެ. ބިލް ގޭޓްސް ވިދާޅުވީ، އޭނާ އާއި އެޕްސްޓީންއާ އޮތް ގުޅުމުގެ ތެރެއިން އެއްވެސް މީހަކަށް އަނިޔާވެރި ވެފައި ނުވާނެ ކަމަށެވެ. 

އެމެރިކާގެ ހައުސް އޯވަސައިޓް ކޮމެޓީ އިން ސިއްރު ކޮށްގެން ކުރިއަށް ގެންދިޔަ މި އަޑު އެހުމަށް ތައްޔާރު ކުރި ބަޔާނުގައި ބިލް ގޭޓްސް ވިދާޅުވީ، އެއްވެސް ކަހަލަ ޖިނާއީ ކުށެއްގައި އެޕްސްޓީން ބައިވެރިވެފައިވާ ކަމުގެ ނުވަތަ އުޅެފައިވާ ކަމުގެ އެއްވެސް ނިޝާނެއް ފެނިފައި ނުވާ ކަމަށެވެ.

ހަމަ އެހެންމެ، އެފަދަ އެއްވެސް ކަމެއްގެ މައުލޫމާތު ވެސް ލިބިފައި ނުވާ ކަމަށް ވެސް ބިލް ގޭޓްސް ވަނީ ވިދާޅުވެފައި އެވެ. ބިލް ގޭޓްސްގެ މި ބަޔާން ވަނީ އޭނާގެ އަމިއްލަ ވެބްސައިޓުގައި އާންމު ކޮށްފައި އެވެ. 

މީގެ އިތުރުން ބިލް ގޭޓްސް ވިދާޅުވީ، އެޕްސްޓީންގެ މިލްކިއްޔާތުގައި އޮތް އެއްވެސް ރަށަކަށް ވެސް، އަދި އެމެރިކާގެ ފްލޮރިޑާގައި ހުންނަ އޭނާގެ އެއްވެސް ގެޔަކަށް ދުވަހަކު ވެސް ގޮސްފައި ނުވާނެ ކަމަށެވެ. އަދި ބިލް ގޭޓްސް ވަނީ އޭނާގެ ފަރާތުން އެއްވެސް މީހަކަށް ޖިންސީ ގޯނާއެއް އަދި ޖިންސީ އަނިޔާއެއް ލިބިފައި ނުވާނެ ކަމުގެ ޔަޤީންކަން ވެސް ދީފައި އެވެ. 

މި އަޑު އެހުމަކީ އެޕްސްޓީން އާއި ދުނިޔޭގެ ނުފޫޒު ގަދަ ޝަޚުސިއްޔަތު ތަކާ އޮތް ގުޅުން ބެލުމަށް އެމެރިކާގެ ކޮންގްރެސް އިން ކުރިއަށް ގެންދާ ތަހުގީގެކެވެ. މީގެ ކުރިން ބިލް ގޭޓްސް ވަނީ، އެޕްސްޓީންއާ ބައްދަލު ކުރެވިފައި ވާތީ އެކަމާ ހިތާމަ ކުރައްވާ ކަމަށް ވެސް ވިދާޅުވެފައި އެވެ.