ޚާއްސަ އެހީއަށް ބޭނުންވާ ފަރާތްތަކަށް ދޫކުރާ މާލީ އިނާޔަތް ބަރާބަރަށް ޖަމާނުވާ މައްސަލަ މަޖިލީހަށް ހުށަހަޅައިފި
ޚާއްސަ އެހީއަށް ބޭނުންވާ ފަރާތްތަކަށް ދައުލަތުން ދޭ މާލީ އިނާޔަތް ގަވާއިދުން ނުލިބޭތީ، އެންސްޕާ ޖަވާބުދާރީ ކުރުވުމަށް އެދި ރައްޔިތުންގެ މަޖިލީހަށް ވަނީ މައްސަލަ ހުށަހަޅާފައި. މި އިނާޔަތަކީ ގިނަ ބައެއްގެ ޒަރޫރީ ބޭނުންތަކާ ގުޅިފައިވާ ފައިސާއަކަށް ވުމުން، އެ ފައިސާ ޖަމާވުން ލަސްވުމުގެ ސަބަބުން އާއިލާތަކަށް ބޮޑެތި ދަތިތަކެއް ކުރިމަތިވަމުންދާކަން މެންބަރު ކުޑޫ ފާހަގަކުރެއްވި. އެހެންކަމުން ކޮންމެ މަހަކުވެސް ކަނޑައެޅޭ ވަކި ސުންގަޑިއަކަށް ފައިސާ ލިބޭނެ ދާއިމީ ނިޒާމެއް ކަށަވަރުކޮށް ދިނުމަށް ސަރުކާރަށް ވަނީ ގޮވާލާފައި.
ނޫސްވެރިންގެ ބައްދަލުވުމެއްގައި ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ) ވާހަކަ ދައްކަވަނީ. | ރާއްޖެއެމްވީ
ޚާއްސަ އެހީއަށް ބޭނުންވާ ފަރާތްތަކަށް ދައުލަތުން ދޫކުރާ މާލީ އިނާޔަތް ބަރާބަރަށް ޖަމާވަމުން ނުދާތީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާއި ސަރުކާރުުގެ ކަމާބެހޭ އިދާރާތައް ޖަވާބުދާރީ ކޮށްދިނުމަށް އެދި ރައްޔިތުންގެ މަޖިލީހަށް މައްސަލައެއް ހުށަހަޅައިފި އެވެ.
ގަލޮޅު އުތުރު ދާއިރާގެ އެމްޑީޕީގެ މެންބަރު މުޙައްމަދު އިބްރާހީމް (ކުޑޫ) ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ބުދަ ދުވަހު ފޮނުއްވި ސިޓީއެއްގައި ވަނީ، ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 45 ވަނަ މާއްދާގެ ދަށުން ނުކުޅެދުންތެރިކަން ހުންނަ ފަރާތްތަކަށް ޚާއްސަ އެހީތެރިކަމާއި ރައްކާތެރިކަން ފޯރުކޮށްދިނުމަކީ ދައުލަތުގެ މައްޗަށް ލާޒިމް ކޮށްފައިވާ ކަމެއްކަން ފާހަގަކޮށްފަ އެވެ. އަދި ނުކުޅެދުންތެރިކަން ހުންނަ ފަރާތްތަކުގެ ހައްގުތައް ރައްކާތެރިކުރުމާއި، މާލީ އެހީތެރިކަން ފޯރުކޮށްދިނުމުގެ ގާނޫނުގެ 19 ވަނަ މާއްދާގެ (ހ) ގެ ދަށުން ކޮންމެ ނުކުޅެދުންތެރިކަމެއް ހުންނަ މީހަކަށްމެ ދައުލަތުން ދޭ މާލީ އެހީއެއް ނުވަތަ އިނާއަތެއް ލިބުމުގެ ހައްގު ގާނުނުން ކަށަވަރުކޮށްދޭ ކަމަށެވެ.
ނަމަވެސް ފަހަކަށް އައިސް ޚާއްސަ އެހީއަށް ބޭނުންވާ ފަރާތްތަކަށް ދައުލަތުން އެންސްޕާ މެދުވެރިކޮށް ދޫކުރާ މާލީ އިނާއަތް ކަނޑައެޅިފައިވާ ތާރީހަށް ބަރާބަރަށް ޖަމާވަމުން ނުދާކަން ފާހަގަކުރެވޭ ކުރެވޭ ކަމަށް ސިޓީގައި ބުނެފައިވެ އެވެ.
މީގެ އިތުރުން ސިޓީގައި ވަނީ، މި އިނާޔަތަކީ ޚާއްސަ އެހީއަށް ބޭނުންވާ ގިނަ ފަރާތްތަކެއް ބޭސްފަރުވާ އަށާއި، ފަރުދީ ޒަރޫރީ ބޭނުންތައް ފުއްދުމަށް ބަރޯސާވާ ހަމައެކަނި މާލީ ވަސީލަތް ކަމަށްވުމުން ފައިސާ ޖަމާވުން ލަސްވުމުގެ ސަބަބުން އެފަރާތްތަކާއި އެފަރާތްތަކުގެ އާއިލާތައް ދަނީ ނުހަނު ބޮޑެތި މާލީ އަދި ނަފްސާނީ ދަތިތަކާ ކުރިމަތިވަމުންދާ ކަމަށެވެ.
އެހެންކަމުން ރައްޔިތުންގެ މަޖިލީހުގެ ކަމާ ގުޅުން ހުރި ކޮމިޓީއެއް މެދުވެރިކޮށް އެންސްޕާ އާއި ކަމާބެހޭ އިދާރާތައް ޖަވާބުދާރީ ކުރުވުމަށާއި، ކޮންމެ މަހެއްގައި ވެސް ކަނޑައެޅޭ ވަކި ސުންގަޑިއަކަށް އެ ފައިސާ ބަރާބަރަށް ޖަމާކޮށްދޭނެ ދާއިމީ ނިޒާމެއް ސަރުކާރުން ކަށަވަރުކޮށްދިނުމަށް ބާރުއެޅުމަށް ސިޓީގައި ގޮވާލައްވާފައިވެ އެވެ.
