ވެމްކޯއިން ބުނީ ހުރިހާ މުވައްޒަފުންނަށްވެސް މުސާރަ ދެވިފައިވާކަމަށް!

ވޭސްޓް މެނޭޖްމަންޓު ކޯޕަރޭޝަން (ވެމްކޯ) ގެ ހުރިހާ މުވައްޒަފުންނަށް މުސާރަ ދެވިފައިވާކަމަށް އެ ކުންފުނިން ބުނެފިއެވެ. 

ވެމްކޯގެ މުވައްޒަފުންނަށް މުސާރަ ނުލިބި ލަސްވަމުންދާ ކަމަށް މައުލޫމާތު ލިބިފައިވާތީ، މި ވާހަކަތައް ކަށަވަރުކުރުމަށް ރާއްޖެޓީވީން ވެމްކޯއާ ގުޅާލުމުން، އެ ކުންފުނިން ދިން ޖަވާބުގައި ބުނީ، ހުރިހާ މުވައްޒަފުންނަށްވެސް މިހާރު މުސާރަ ދެވިފައިވާ ކަމަށެވެ. އަދި މުސާރަ ނުލިބޭ ކަމަށް ބުނެ ފެތުރެމުންދާ ވާހަކަތަކަކީ ރަނގަޅު ވާހަކަތަކެއް ނޫން ކަމަށްވެސް ވެމްކޯއިން ބުނެފައިވެއެވެ.

ވެމްކޯއިން އެހެން ބުނިނަމަވެސް، ހޯމަ ދުވަހުގެ ނިޔަލަށްވެސް ބައެއް މުވައްޒަފުންނަށް މުސާރަ ނުލިބޭކަމަށް އެ މުވައްޒަފުންގެ ފަރާތުން ރާއްޖެއެމްވީއަށް މައުލޫމާތު ލިބިފައިވެއެވެ. އެގޮތުން ވެމްކޯގެ އިދާރީ މުވައްޒަފުންނަށް މުސާރަ ލިބުނުނަމަވެސް، ކުނި އުކުމާއި މަގުމަތީގައި ޙަރަކާތްތެރިވާ މުވައްޒަފުންނަށް މުސާރަ ލިބުން ވަރަށް ބޮޑަށް ލަސްވެގެން ދިޔަކަމަށް މައުލޫމާތު ލިބެއެވެ. 

ނިމުނު މެއި މަހުގެ މުސާރަ އާއި އިނާޔަތްތައް ޖަމާކުރަން ފަށާނީ މެއި މަހުގެ 28 ވާ ބުރާސްފަތި ދުވަހުން ފެށިގެން އެ މަހުގެ 31 ވަނަ ދުވަހާ ހަމައަށް ކަމަށް ފިނޭންސް މިނިސްޓްރީ އިން ބުނި ނަމަވެސް ވެމްކޯ ގެ ބައެއް މުވައްޒަފުންނަށް މެއި މަހުގެ މުސާރަ ލިބުން ވަރަށް ބޮޑަށް ލަސްވެފައިވާތީ އެ މުވައްޒަފުން ސޯޝަލް މީޑިއާގައިވެސް ކަންބޮޑުވުން ފާޅުކޮށްފައިވެއެވެ. އަދި ވެމްކޯގައި މަސައްކަތް ކުރާ މުވައްޒަފުންނަށް މުސާރަ ލިބުން ލަސްވުމުގެ ސަބަބުން އެ މުވައްޒަފުންނަށް ބޮޑެތި ތަކުލީފުތަކެއްވެސް ވަނީ ކުރިމަތިވެފައެވެ.

މިދިޔަ 5 މަސް ދުވަހު އެ ކުންފުނީގެ މުވައްޒަފުންގެ މުސާރައިގެ މައްސަލަ ދިމާވިކަމަށް ރިޕޯޓް ކޮށްފައިވާއިރު، އެ ކުންފުނީގެ މުވައްޒަފުންގެ މުސާރައިން ޕެންޝަންގެ ގޮތުގައި އުނިކުރާ ފައިސާ ރިޓަޔަރމަންޓް ޕެންޝަން ސްކީމަށް ޖަމާނުކޮށް 19 މަސް ދުވަސް ވެފައިވާ މައްސަލައެއްވެސް ވަނީ ފެންމަތިވެފައެވެ. އަދި އެ މައްސަލަ ރައްޔިތުންގެ މަޖިލީހަށްވެސް ވަނީ ހުށަހަޅާފައެވެ.

ވެމްކޯގެ މުވައްޒަފުންނަށް ޑިސެމްބަރު މަހުގެ މުސާރަ ދީފައިވަނީ ޖެނުއަރީ މަސް ފެށުނު ފަހުންނެވެ. ޖެނުއަރީ މަހުގެ މުސާރަ ދީފައިވަނީ ފެބްރުއަރީ މަސް ފެށުނު ފަހުންނެވެ. ފެބްރުއަރީ މަހުގެ މުސާރަ ވެސް މުވައްޒަފުންނަށް ޖަމާނުކޮށް ހުއްޓާ ހަބަރުތަކުގައި އެވާހަކަ ޖެހުމުން މުސާރަ ދީފައިވަނީ މިދިޔަ މާޗް މަހުގެ 10 ވަނަ ދުވަހު ހިސާބު އެވެ. މާޗު މަހުގެ މުސާރަ ވެސް ދިނީ މުވައްޒަފުން އެކަމުގެ ކަންބޮޑުވުން ފާޅުކޮށް، ޚަބަރުތަކުގައި ވެސް އެ ވާހަކަ ޖެހި ފަހުންނެވެ. އޭޕްރީލް މަހު ވެސް މުސާރަ ދިނީ އެ މެއި މަސް ފެށުނު ފަހުންނެވެ. 

މުސާރައިގެ އިތުރުން ރަމަޟާން މަހުގެ އިނާޔަތް ވެސް ވެމްކޯ މުވައްޒަފުންނަށް ދީފައިވަނީ ވެސް ޚަބަރުތަކުގައި ޖަހައި، އެތައް ބައެއްގެ ފާޑުކިޔުން އަމާޒުވުމުންނެވެ.