މޮޑެލް ކުރާ މީހެއް ނޫން ކަމަށް ބުނެ، އުރުގުއޭގެ ކޯޗު ރަސްމީ ފޮޓޯ ޝޫޓުގައި ހުރީ އިސް ޖަހައިގެން
17 ޖޫން 2026 | ބުދަ 05:58ބިއެލްސާ ބުނެފައި ވަނީ، އެކަމާ ގުޅޭ ގޮތުން އިތުރު އެއްވެސް ތަފްސީލެއް ދޭން އޭނާ ބޭނުން ނުވާ ކަމަށް. އޭނާ އަށް ފޮޓޯ ނެގުނީ އެ ގޮތަށް ކަމަށް ފާހަގަކޮށް ބިއެލްސާ ބުނީ، އޭނާ އަކީ މޮޑެލް ކުރާ މީހެއް ނޫން ކަމަށް. އެއާ އެކު އޭނާ ބުނީ ކޮންމެ ކަމެއް ވެސް އޮޅުން ފިލުވައި ދޭން ވަކި މިންވަރެއް އޮންނާނެ ކަމަށް.
އުރުގުއޭގެ ކޯޗު ބިއެލްސާ. | ސޯޝަލް މީޑިއާ
ފީފާ ވޯލްޑް ކަޕްގެ ރަސްމީ ފޮޓޯ ޝޫޓުގައި އުރުގުއޭގެ ކޯޗު، މާސެލޯ ބިއެލްސާ އިސް ޖަހައިގެން ހުރުމުގެ ސަބަބުން ގިނަ ބައެއްގެ ސަމާލުކަން އޭނާ އަށް ލިބިއްޖެ އެވެ.
ވޯލްޑް ކަޕްގައި ބައިވެރިވާ ހުރިހާ ޓީމު ތަކުގެ ކުޅުންތެރިންނާއި، އޮފިޝަލުންގެ ފޮޓޯ ނެގުމަކީ ފާއިތުވި 10 އަހަރުގެ ތެރޭގައި ފީފާ އިން ވަރަށް ބޮޑު އިސްކަމެއް ދީގެން ކުރަމުން އަންނަ ކަމެކެވެ. އެ ފޮޓޯ ޝޫޓުގައި ގިނަ ކުޅުންތެރިންނާއި ކޯޗުން ބައިވެރިވާއިރު، ކެމެރާގެ ކުރިމަތީގައި އެ މީހުން ތަފާތު ޙަރަކާތްތައް ދައްކަ އެވެ.
ނަމަވެސް، އުރުގުއޭގެ ކޯޗު ބިއެލްސާ ކެމެރާ އަށް ހުއްޓުނީ ތަފާތު ގޮތަކަށެވެ. އުމުރުން 70 އަހަރުގެ ބިއެލްސާ ކެމެރާ ކުރިމަތީގައި ހުރީ އިސް ޖަހައިގެންނެވެ. އެކަމަށް ގިނަ ބައެއްގެ ސަމާލުކަން ލިބުނުއިރު، ސޯޝަލް މީޑިއާގައި ވެސް ބިއެލްސާގެ އެ ފޮޓޯ އަންނަނީ ދައުރު ކުރަމުންނެވެ.
މުބާރާތުގައި އުރުގުއޭ އިން ކުޅުނު ފުރަތަމަ މެޗުގައި ވަނީ ސައުދީ އަރަބިއްޔާއާ 1-1 އިން އެއްވަރުވެފައި އެވެ. އެ މެޗަށް ފަހު އޮތް ނޫސްވެރިންގެ ބައްދަލުވުމުގައި ނޫސްވެރިން ވަނީ ބިއެލްސާއާ އެ ސުވާލު ކޮށްފައި އެވެ. އެގޮތުން އެއީ ވަކި ކަމަކަށް ދެކޮޅު ހެދުމުގެ ގޮތުން ކުރި ކަމެއްތޯ، ނުވަތަ އިހުތިޖާޖު ކުރުމުގެ ގޮތުން ކޮށްފައިވާ ކަމެއްތޯ ނޫސްވެރިން ވަނީ ސުވާލު ކޮށްފައި އެވެ.
އެ ސުވާލަކަށް ޖަވާބު ދެމުން ބިއެލްސާ ބުނެފައި ވަނީ، އެކަމާ ގުޅޭ ގޮތުން އިތުރު އެއްވެސް ތަފްސީލެއް ދޭން އޭނާ ބޭނުން ނުވާ ކަމަށެވެ. އޭނާ އަށް ފޮޓޯ ނެގުނީ އެ ގޮތަށް ކަމަށް ފާހަގަކޮށް ބިއެލްސާ ބުނީ، އޭނާ އަކީ މޮޑެލް ކުރާ މީހެއް ނޫން ކަމަށެވެ. އެއާ އެކު އޭނާ ބުނީ ކޮންމެ ކަމެއް ވެސް އޮޅުން ފިލުވައި ދޭން ވަކި މިންވަރެއް އޮންނާނެ ކަމަށެވެ.
މީގެ އިތުރުން ނޫސްވެރިންނަށް އަމާޒުކޮސް ބިއެލްސާ ބުނެފައި ވަނީ، އައިނު އަޅައިގެން ހުންނަނީ ކީއްވެގެންތޯ، ނުވަތަ މީހެއްގެ ލޮލަށް ބަލަނީ ކީއްވެގެންތޯ ސުވާލު ކުރުމަަކީ ހަމަޖެހޭ ކަމެއް ނޫނެވެ.
ބިއެލްސާ އަކީ އެތައް ބައެއްގެ އިޙުތިރާމް ހޯދާފައިވާ ކޯޗެކެވެ. މިއީ އޭނާ ވޯލްޑް ކަޕްގައި ޤައުމީ ޓީމަކަށް އިރުޝާދު ދޭ ތިން ވަނަ ފަހަރެވެ. މީގެ ކުރިން ބިއެލްސާ ވަނީ އޭނާގެ އަމިއްލަ ޤައުމު ކަމަށްވާ އާޖެންޓީނާގެ އިތުރުން، ޗިލީ އަށް ވެސް ވޯލްޑް ކަޕްގައި އިރުޝާދު ދީފައި އެވެ. ބިއެލްސާ އަކީ އޭނާގެ އަމިއްލަ އުސޫލު ތަކެއް ގެން ގުޅޭ، އަދި ކަންކަމުގައި އުސޫލަށް ވަރަށް ބޮޑަށް ތަބާވާ މީހެއްގެ ގޮތުގައި ފާހަގަވެފައިވާ މީހެކެވެ.
