ޖޯޑަން ބަލިކޮށް، އޮސްޓްރިއާ އަށް ރަނގަޅު ފެށުމެއް
މުބާރާތުގެ ގުރޫޕު ސްޓޭޖުގައި އޮސްޓްރިއާގެ ދެ ވަނަ މެޗުގައި ނިކުންނާނީ އާޖެންޓީނާއާ ދެކޮޅަށް. އަދި ފަހު މެޗުގައި ކުޅޭނީ އަލްޖީރިއާއާ ދެކޮޅަށް.
މެެޗުގައި ލަނޑު ޖެހުމަށް ފަހު އޮސްޓްރިއާގެ ކުޅުންތެރިން އުފާ ފާޅު ކުރަނީ. | ރޮއިޓާސް
ފީފާ ވޯލްޑް ކަޕް ގުރޫޕު ޖޭގައި ޖޯޑަންއާ ދެކޮޅަށް ކުޅުނު މެޗުން މޮޅުވެ، އޮސްޓްރިއާ އިން ވެސް މުބާރާތުގެ ފެށުން ރަނގަޅު ކޮށްފި އެވެ.
ބުދަ ދުވަހުގެ ހެނދުނު ކުޅުނު މެޗު އޮސްޓްރިއާ އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި އޮސްޓްރިއާ އިން ލީޑު ނަގާފައި ވަނިކޮށް، ޖޯޑަން އިން ނަތީޖާ ހަމަހަމަ ވެސް ކުރި އެވެ. ނަމަވެސް، އިތުރު ދެ ލަނޑު ޖަހައިގެން އޮސްޓްރިއާ ވަނީ މެޗުން މޮޅުވެފައި އެވެ.
މެޗު ފަށައިގެން 21 ވަނަ މިނެޓުގައި އޮސްޓްރިއާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ރޮމާނޯ ޝްމިޑް އެވެ. އޭގެ ފަހުން މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި އަލީ އިޔާދު އުލްވާން ވަނީ ލަނޑު ޖަހައި ޖޯޑަން އަށް ނަތީޖާ ހަމަހަމަ ކޮށްދީފައި އެވެ.
ދެ ވަނަ ފަހަރަށް މެޗުގައި އޮސްޓްރިއާ އަށް ލީޑު ލިބުނީ 76 ވަނަ މިނެޓުގައި ޖޯޑަންގެ ޒަޔާޒް އަލް އަރަބް އަތުން ބައި ކޮޅަށް ވަތް ލަނޑުންނެވެ. މެޗުގައި އޮސްޓްރިއާގެ ފަހު ލަނޑަކީ، ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެ ޓީމަށް ލިބުނު ޕެނަލްޓީ ކާމިޔާބުކޮށް މާކޯ އާނައުޓޮވިޗް ޖެހި ލަނޑެކެވެ.
މުބާރާތުގެ ގުރޫޕު ސްޓޭޖުގައި އޮސްޓްރިއާގެ ދެ ވަނަ މެޗުގައި ނިކުންނާނީ އާޖެންޓީނާއާ ދެކޮޅަށެވެ. އަދި ފަހު މެޗުގައި ކުޅޭނީ އަލްޖީރިއާއާ ދެކޮޅަށެވެ.
