ހެޓްރިކްގެ ރެކޯޑާ އެކު، ވޯލްޑް ކަޕްގައި އެންމެ ގިނަ ލަނޑު ޖެހި ރެކޯޑާ ވެސް މެސީ ހަމަކޮށްފި

ފީފާ ވޯލްޑް ކަޕްގެ ގުރޫޕު ޖޭގައި އަލްޖީރިއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން އާޖެންޓީނާ މޮޅުވެއްޖެ އެވެ.

އެމެރިކާާގެ ކެންސަސް ސިޓީ ސްޓޭޑިއަމްގައި ބުދަ ދުވަހުގެ ހެނދުނު ކުޅުނު މެޗު އާޖެންޓީނާ އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި އާޖެންޓީނާ އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގައި އެވެ. 

މެޗު ފަށައިގެން އަށް ވަނަ މިނެޓުގައި އަލްޖީރިއާ އިން ވަނީ ލަނޑެއް ޖަހައިފަ އެވެ. ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު، އޮފްސައިޑުގައި ހުރުމުން އެ ލަނޑު ބަލައިގެންފައި ނުވެ އެވެ. 

އޭގެ ފަހުން މެޗުގެ 17 ވަނަ މިނެޓުގައި އާޖެންޓީނާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އާޖެންޓީނާ އަށް ޖަހައިދިނީ ކެޕްޓަން ލިއޮނަލް މެސީ އެވެ. އަލްޖީރިއާގެ ހާފު ތެރެއިން ރޮޑްރީގޯ ޑި ޕޯލް ދިން ބޯޅަ، މެސީ ވަނީ ގޯލުގެ މަތީ ކަނަށްވާ ގޮތަށް ފޮނުވާލައިފަ އެވެ.

އާޖެންޓީނާ އިން މެޗުގައި ރަނގަޅަށް ކުޅުނުއިރު، އެ ޓީމުން ވަނީ އިތުރު ލަނޑު ޖަހަން ވެސް ފުރުސަތު ހޯދައިފަ އެވެ. މެޗުގެ 60 ވަނަ މިނެޓުގައި މެސީ ވަނީ އާޖެންޓީނާގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. އޭގެ 16 މިނެޓު ފަހުން މެސީ ވަނީ އިތުރު ލަނޑެއް ޖަހައި މެޗުގައި އޭނާގެ ހެޓްރިކް ހަމަ ކޮށްފައި އެވެ. މިއީ ވޯލްޑް ކަޕެއްގައި މެސީ ހެޓްރިކް ހެދި ފުރަތަމަ ފަހަރެވެ.

އެއާ އެކު މެސީ ވަނީ ވޯލްޑް ކަޕްގައި އެންމެ ގިނަ ލަނޑު ޖަހާފައިވާ ޖަރުމަނުގެ މިރޮސްލާވް ކްލޯސާގެ ރެކޯޑާ ހަމަ ކޮށްފައި އެވެ. ކްލޯސާ އާއި މެސީ ވެސް ވަނީ ވޯލްޑް ކަޕްގައި 16 ލަނޑު ޖަހައިފަ އެވެ. މި ރެކޯޑު މުގުރާލުމަށް މެސީ އަށް ދެން ބޭނުން ވަނީ އެންމެ ލަނޑެކެވެ. ދެ ވަނައިގައި 15 ލަނޑާ އެކު ބްރެޒިލްގެ ރޮނާލްޑޯ ނަޒާރިއޯ އޮތްއިރު، ތިން ވަނައިގައި ފްރާންސްގެ ކެޕްޓަން ކީލިއަން އެމްބާޕޭ އާއި ޖަރުމަނުގެ ތޯމަސް މުލާ އޮތީ 14 ލަނޑާ އެކު އެވެ.

މީގެ އިތުރުން މި މެޗުގައި ހެދި ހެޓްރިކާ އެކު، އުމުރުން 38 އަހަރުގެ މެސީ ވެގެން ގޮސްފައި ވަނީ ވޯލްޑް ކަޕްގައި ހެޓްރިކް ހެދި އެންމެ އުމުރުން ދުވަސްވީ ކުޅުންތެރިޔާ އަށެވެ. މީގެ ކުރިން މި ރެކޯޑު އޮތީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ އަތުގައި އެވެ. އެއީ 2018 ވަނަ އަހަރުގެ ވޯލްޑް ކަޕްގައި ސްޕެއިން ކޮޅަށް އޭނާ ހެދި ހެޓްރިކާ އެކު އެވެ.

މި މެޗަކީ އާޖެންޓީނާގެ ޤައުމީ ޓީމަށް މެސީ ކުޅެދިން 200 ވަނަ މެޗެވެ. މެސީ އަކީ އާޖެންޓީނާ ޤައުމީ ޓީމަަށް އެންމެ ގިނަ މެޗު ކުޅެދީފައިވާ ކުޅުންތެރިޔާ އަށްވާއިރު، އޭނާ އަކީ އާޖެންޓީނާ ޤައުމީ ޓީމަށް އެންމެ ގިނަ ލަނޑު ވެސް ޖަހައިދީފައިވާ ކުޅުންތެރިޔާ އެވެ.

އާޖެންޓީނާ އަކީ މުބާރާތުގެ އެންމެ ފަހުގެ ޗެމްޕިއަނުންނެވެ. 2022 ވަނަ އަހަރު ޤަތަރުގައި އޮތް ވޯލްޑް ކަޕް އާާޖެންޓީނާ އިން ކާމިޔާބު ކުރީ ފައިނަލްގައި ފްރާންސް ބަލި ކުރުމަށް ފަހު އެވެ. އެއީ 1986 ވަނަ އަހަރު މެކްސިކޯގައި އޮތް ވޯލްޑް ކަޕް ކާމިޔާބު ކުރި ފަހުން، އާޖެންޓީނާ އަށް ވޯލްޑް ކަޕް ކާމިޔާބު ކުރެވުނު އަހަރެވެ. އާޖެންޓީނާ އިން ވަނީ 1978 ވަނަ އަހަރާއި، 1986 ވަނަ އަހަރު އަދި 2022 ވަނަ އަހަރު ވޯލްޑް ކަޕް ކާމިޔާބު ކޮށްފައި އެވެ.