ވަލީ އަހުދު މުޙައްމަދު ރިޔާސަތު ބެލެހެއްޓެވި ކެބިނެޓު ބައްދަލުވުމުން، އީރާން އާއި އެމެރިކާގެ އެއްބަސްވުމަށް މަރުޙަބާ ކިޔައިފި

ސައޫދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން ރިޔާސަތު ބެލެހެއްޓެވި ކެބިނެޓުގެ ބައްދަލުވުމުގައި އެމެރިކާ އާއި އީރާންއާ ދެމެދު ހަނގުރާމަ ހުއްޓާލައި، ދާއިމީ އެއްބަސްވުމަކަށް ވާސިލުވުމަށް މަޝްވަރާތައް ފަށަން ވެވުނު އެއްބަސްވުމަށް މަރުހަބާ ކިޔައިފި އެވެ.

ވަޒީރުންގެ މަޖިލީހުން ވަނީ، ހަނގުރާމައިގެ ކުރިން އޮތް ޙާލަތަށް ހޮރްމޫޒް ކަނޑު އޮޅި އައުމުގެ މުހިންމުކަން ވެސް ވަރަށް ބޮޑަށް ފާހަގަ ކުރައްވައިފަ އެވެ. އަދި ސަރަހައްދީ ޤައުމު ތަކުގެ ސަލާމަތީ މަސްލަހަތުތައް ބަލައި، އެ ޤައުމު ތަކުގެ ދާޚިލީ ކަންކަމަށް އިޙުތިރާމް ކުރުމަށް ފަހު، ސަރަހައްދާއި ދުނިޔޭގެ ސަލާމަތާއި ރައްކާތެރިކަން ވަރުގަދަ ކުރުމަށް މަގުފަހިވާ ގޮތަކަށް ސުލްޙަ ޤާއިމު ވުމަށް އުންމީދު ކުރާ ކަމަށް ވެސް ވަނީ ބުނެފައި އެވެ. 

މީގެ އިތުރުން އިންޓަނޭޝަނަލް މަނިޓަރީ ފަންޑުން ސައޫދީ އަރަބިއްޔާއާ އެކު 2026 ވަނަ އަހަރަށް ކުރި އާޓިކަލް ފޯ މަޝްވަރާތައް ނިންމާލުމަށް ފަހު، އެ ފަންޑުގެ ތަޖުރިބާކާރުން ނެރުނު ބަޔާނަށް ވެސް ވަޒީރުންގެ މަޖިލީހުން މަރުޙަބާ ކިޔާފައިވެ އެވެ. އެ ބަޔާނުގައި ސައޫދީ އިގްތިޞާދުގެ ވަރުގަދަ ކަމާއި، ސަރަހައްދީ ކަންކަމާ ކުރިމަތިލާން އޮތް ގާބިލުކަން ފާހަގަކޮށް، ވިޝަން 2030 ގެ ދަށުން ކުރިއަށްދާ އިޞްލާހީ މަސައްކަތް ތަކާއި، ވަރުގަދަ އިގްތިޞާދީ އަސާސް ތަކާއި، ފުދުންތެރި ރިޒާވް އާއި، ތަފާތު އިންފްރާސްޓްރަކްޗާ ތަކުގެ ސަބަބުން އެކަން ކާމިޔާބުވާ ކަން ފާހަގަ ކޮށްފައިވެ އެވެ.

އެމެރިކާ އާއި އީރާންއާ ދެމެދު ކުރިއަށް ދިޔަ ހަނގުރާމައާ ގުޅިގެން މީގެ ކުރިން ވެސް ސައުދީ އިން ވަނީ އެކި ބަޔާންތައް ނެރެފަ އެވެ. ޚާއްސަކޮށް، އެމެރިކާ އަށް ރައްދު ދިނުމުގެ ގޮތުން ގަލްފުގެ ޤައުމު ތަކުގައި ހުރި އެމެރިކާގެ އަމާޒު ތަކަށް އީރާން އިން ދިން ހަމަލާތައް ސައުދީ އިން ވަރަށް ބޮޑަށް ކުށްވެރި ކޮށްފައިވެ އެވެ. އަދި ސައުދީ އިން ވަނީީ އެކި ފަހަރު މަތިން އީރާން އަށް އިންޒާރު ވެސް ދީފައި އެވެ.