ކޭންގެ ދެ ލަނޑާ އެކު، އިންގްލެންޑުން ކްރޮއޭޝިއާ ބަލިކޮށްފި
18 ޖޫން 2026 | ބުރާސްފަތި 03:04މެޗުގައި އިންގްލެންޑުން ދެ ފަހަރެއްގެ މަތިން ލީޑު ނެގިއިރު ވެސް، ކްރޮއޭޝިއާ އިން ނަތީޖާ ހަމަހަމަ ކުރި. ނަމަވެސް، ދެ ވަނަ ހާފުގައި އިތުރު ދެ ލަނޑު ޖަހައިގެން އިންގްލެންޑު ވަނީ މެޗުން މޮޅުވެފައި.
މެޗުގައި ލަނޑު ޖެހުމަށް ފަހު އިންގްލެންޑުގެ ކޭން އުފާ ފާޅު ކުރަނީ. | ރޮއިޓާސް
މިހާރު ކުރިއަށްދާ ފީފާ ވޯލްޑް ކަޕް ގުރޫޕު އެލްގައި ކްރޮއޭޝިއާއާ ދެކޮޅަށް ކުޅުނު މެޗުން މޮޅުވެ، އިންގްލެންޑުން ފެށުން ރަނގަޅު ކޮށްފި އެވެ.
އެމެރިކާގެ ޑަލާސް ސްޓޭޑިއަމްގައި ބުދަ ދުވަހުގެ ރޭ ދަންވަރު ކުޅުނު މެޗު އިންގްލެންޑުން ކާމިޔާބު ކުރީ 4-2 އިންނެވެ. މެޗުގައި އިންގްލެންޑުން ދެ ފަހަރެއްގެ މަތިން ލީޑު ނެގިއިރު ވެސް، ކްރޮއޭޝިއާ އިން ނަތީޖާ ހަމަހަމަ ކުރި އެވެ. ނަމަވެސް، ދެ ވަނަ ހާފުގައި އިތުރު ދެ ލަނޑު ޖަހައިގެން އިންގްލެންޑު ވަނީ މެޗުން މޮޅުވެފައި އެވެ.
މެޗު ފަށައިގެން 12 ވަނަ މިނެޓުގައި އިންގްލެންޑަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދިނީ ކެޕްޓަން ހެރީ ކޭން އެވެ. ނަމަވެސް، މެޗުގެ 36 ވަނަ މިނެޓުގައި މާޓިން ބަޓުރީނާ ވަނީ ލަނޑު ޖަހައި ކްރޮއޭޝިއާ އަށް ނަތީޖާ ހަމަހަމަ ކޮށްދީފައި އެވެ.
ކްރޮއޭޝިއާ އިން ނަތީޖާ ހަމަހަމަ ކުރިތާ ހަ މިނެޓު ފަހުން ކޭން ވަނީ ދެ ވަނަ ލަނޑެއް ޖަހައި އަނެއްކާ ވެސް އިންގްލެންޑަށް ކުރި ހޯދައިދީފައި އެވެ. އެ ލަނޑު ޖަހަން ކޭން އަށް ފުރުސަތު ތަނަވަސްކޮށްދިނީ ޑެކްލަން ރައިސް އެވެ. މެޗުގެ ފުރަތަމަ ހާފުގެ ފަހު ވަގުތުގައި ޕީޓާ މޫސާ ވަނީ ކްރޮއޭޝިއާ އަށް ނަތީޖާ ހަމަހަމަ ކޮށްދީފައި އެވެ.
މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ޖޫޑް ބެލިންހަމް ވަނީ އިންގްލެންޑުގެ ތިން ވަނަ ލަނޑު ޖަހައި ލީޑު ނަގައިދީފައި އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް، މާކަސް ރަޝްފޯޑު ވަނީ އިންގްލެންޑުގެ ހަތަރު ވަނަ ލަނޑު ޖަހައި އިތުރަށް ލީޑު ފުޅާ ކޮށްފައި އެވެ.
މުބާރާތުގައި އިންގްލެންޑުގެ ދެ ވަނަ މެޗުގައި ނިކުންނާނީ ގާނާއާ ދެކޮޅަށެވެ. އަދި ފަހު މެޗުގައި ކުޅޭނީ ޕެނަމާއާ ދެކޮޅަށެވެ.
