ހާލަންޑުގެ މޮޅު ކުޅުމާ އެކު، އިރާޤު ބަލިކޮށް ނޯވޭ އަށް ރަނގަޅު ފެށުމެއް

ފީފާ ވޯލްޑް ކަޕްގެ ގުރޫޕް އައިގައި އިރާޤާ ދެކޮޅަށް ކުޅުނު މެޗުން މޮޅުވެ، ނޯވޭ އިން މުބާރާތުގެ ފެށުން ރަނގަޅު ކޮށްފި އެވެ.

އެމެރިކާގެ ބޮސްޓޮން ސްޓޭޑިއަމްގައި ބުދަ ދުވަހުގެ ފަތިހު ކުޅުނު މެޗު ނޯވޭ އިން ކާމިޔާބު ކޮށްފައި ވަނީ 4-1 އިންނެވެ. މެޗުގައި ނޯވޭ އިން ލަނޑު ޖަހައި ކުރި ހޯދާފައި ވަނިކޮށް، އިރާޤުން ނަތީޖާ ހަމަހަމަ ވެސް ކުރި އެވެ. ނަމަވެސް، އިތުރު ތިން ލަނޑު ޖަހައިގެން ނޯވޭ ވަނީ މެޗުން މޮޅުވެފައި އެވެ.

މެޗު ފަށައިގެން 29 ވަނަ މިނެޓުގައި ނޯވޭ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އާލިން ހާލަންޑު އެވެ. ނަމަވެސް، އޭގެ ދިހަ މިނެޓު ފަހުން އިރަޤުގެ ކެޕްޓަން އައިމަން ޙުސެއިން ވަނީ ލަނޑު ޖަހައި އެ ޓީމަށް ނަތީޖާ ހަމަހަމަ ކޮށްދީފައި އެވެ.

ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ހާލަންޑު ވަނީ ދެ ވަނަ ލަނޑެއް ޖަހައި އަނެއްކާ ވެސް ނޯވޭ އަށް ލީޑު ނަގައިދީފައި އެވެ. އޭގެ ފަހުން މެޗުގެ 76 ވަނަ މިނެޓުގައި މާޓިން އޮޑެގާޑް ތަނަވަސްކޮށްދިން ފުރުސަތެއްގައި ނޯވޭގެ ތިން ވަނަ ލަނޑު ޖެހީ ލެއޯ އޮސްޓިގާޑް އެވެ. އަދި މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ނޯވޭގެ ހަތަރު ވަނަ ލަނޑަކީ އިރާޤުގެ އައިމަން ޙުސެއިން އަތުން ބައި ކޮޅަށް ވަތް ލަނޑެކެވެ. 

މިއީ ގިނަ އަހަރު ތަކަކަށް ފަހު ނޯވޭ އިން ވޯލްޑް ކަޕްގައި ވާާދަ ކުރާ ފުރަތަމަ ފަހަރެވެ. 1998 ވަނަ އަހަރު ފްރާންސްގައި އޮތް ވޯލްޑް ކަޕްގެ ފަހުން، މިދިޔަ އެއްވެސް މުބާާރާތަކަށް ނޯވޭ ކޮލިފައިވެފައި ނުވެ އެވެ.