ހަމަލާތައް ވަގުތުން ހުއްޓާލުމަށް އިޒްރޭލާއި އީރާނަށް ޓްރަމްޕް ގޮވާލައްވައިފި
އީރާނާއި އިޒްރޭލުން އެއްބަޔަކު އަނެއް ބަޔަކަށް ވަރުގަދަ މިސައިލް ހަމަލާތަކެއް ބަދަލުކުރަން ފެށުމާ ގުޅިގެން، މުޅި ސަރަހައްދަށް ބޮޑު ހަނގުރާމައެއް ފެތުރިދާނެ ކަމުގެ ބިރު ވަނީ ބޮޑުވެފައި. އިޒްރޭލުން އީރާނުގެ އަސްކަރީ މަރުކަޒުތަކަށް ހަމަލާދީފައިވަނީ، ލުބުނާނުގެ ހިޒްބުالله ޖަމާއަތަށް އަމާޒުކޮށް އިޒްރޭލުން ދެމުންދާ ހަމަލާތަކުގެ ބަދަލުހިފުމުގެ ގޮތުން އީރާނުން އިޒްރޭލަށް ހަމަލާދިނުމާ ގުޅިގެން. މި ހަމަލާތައް ދީފައިވަނީ ހަމަލާތައް މަދުކުރުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވާފައި ވަނިކޮށް، އެކަމަށް ބެންޖަމިން ނަތަންޔާހޫ ދެކޮޅު ހެއްދެވުމަށްފަހުގައި.
ވޮޝިންގޓަންގައި ހުންނަ ވައިޓް ހައުސްގައި 2026 ވަނަ އަހަރުގެ މޭ މަހުގެ 27 ވާ ބުދަ ދުވަހު ބޭއްވި ކެބިނެޓް ބައްދަލުވުމެއްގައި ރައީސް ޑޮނަލްޑް ޓްރަމްޕް ވާހަކަފުޅު ދައްކަވަނީ. | އޭޕީ
އިޒްރޭލާއި އީރާނުން އެއްބަޔަކު އަނެއްބަޔަކަށް "ހަމަލާދިނުން" ވަގުތުން ހުއްޓާލަންޖެހޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހު "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވެއްޖެއެވެ.
އިތުރު ހަމަލާތައް ނުދިނުމަށް ރައީސް ޑޮނަލްޑް ޓްރަމްޕް، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއަށް ދަންނަވާފައިވާ ކަމަށް ރިޕޯޓްތައް ބުނެފައިވަނިކޮށް، އިޒްރޭލުން ވަނީ އީރާނުގެ ހުޅަނގު ދެކުނުގައި ހުރި ޕެޓްރޯކެމިކަލް ކާރުޚާނާއަކަށާއި އަދި އެ ގައުމުގެ އެކި ސަރަހައްދުތަކުގައި ހުރި އަސްކަރީ އަމާޒުތަކަށް ހަމަލާދީފައިވާ ކަމަށް ބުނެފައެވެ.
ފަސް ހަފުތާގެ ހަނގުރާމައަށްފަހު ގާއިމުކުރި ނާޒުކު ސުލްހައިގެ އެއްބަސްވުމަށްފަހު، އީރާނާއި އިޒްރޭލުން ހޯމަ ދުވަހު ފުރަތަމަ ފަހަރަށް އެއްބަޔަކު އަނެއް ބައެއްގެ ސަރަހައްދުތަކަށް ހަމަލާދީފައިވާއިރު، މިކަމުގެ ސަބަބުން މުޅި ސަރަހައްދަށް ފެތުރިގެންދާނެ ހަނގުރާމައެއް ފެށިދާނެ ކަމުގެ ބިރު ވަނީ ބޮޑުވެފައެވެ.
އީރާނުން ރޭގަނޑުގެ ވަގުތެއްގައި އިޒްރޭލަށް ގިނަ އަދަދެއްގެ މިސައިލް ހަމަލާތަކެއް ފޮނުވާލާފައިވާއިރު، އިޒްރޭލުން ވަނީ އޭގެ ރައްދުގައި އީރާނުގެ އަސްކަރީ މަރުކަޒުތަކަށް ހަމަލާދީފައެވެ. އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ މި ހަމަލާތައް ދީފައިވަނީ، އެ ގައުމުގެ ބައިވެރިޔާ ރައީސް ޑޮނަލްޑް ޓްރަމްޕް ހަމަލާތައް މަދުކުރުމަށް ގޮވާލައްވާފައިވާ ގޮވާލެއްވުމަށް ފާޅުގައި ދެކޮޅު ހެއްދެވުމަށްފަހު ކަމަށް ބެލެވެއެވެ.
ތެހެރާނުން އިޒްރޭލަށް މި ހަމަލާތައް ދީފައިވަނީ، ބެއިރޫތުގެ ދެކުނު ސަރަހައްދުތަކުގައި ހުރި އީރާނުގެ މަދަދުލިބޭ ލުބުނާނުގެ ޝިއައީ ޖަމާއަތެއް ކަމަށްވާ ހިޒްބުالله ގެ އަމާޒުތަކަށް އިޒްރޭލުން ހަމަލާދިނުމާ ގުޅިގެންނެވެ. ލުބުނާނުގެ ވެރިރަށް ބެއިރޫތަށް ހަމަލާދީފިނަމަ އިޒްރޭލަށް ހަމަލާދޭނެ ކަމުގެ އިންޒާރު އީރާނުން މީގެ ކުރިން ތަކުރާރުކޮށް ވަނީ ދީފައެވެ.
