އިޒްރޭލުން ލުބުނާނަށް ދޭ ހަމަލާތަކުގެ ރައްދުގައި އީރާނުން އިޒްރޭލަށް ހަމަލާދީފި

އިޒްރޭލުން ލުބުނާނަށް ދެމުންދާ ހަމަލާތަކަކީ ހަނގުރާމަ ހުއްޓާލުމުގެ އެއްބަސްވުމާ ޚިލާފަށް ދެމުންދާ ހަމަލާތަކެއް ކަމަށް ބުނެ، އޭގެ ރައްދުގައި އީރާނުގެ ސިފައިން އާދީއްތަ ދުވަހު އިޒްރޭލުން ހިފާފައިވާ ސަރަހައްދުތަކަށް ގިނަ އަދަދެއްގެ މިސައިލް ހަމަލާތަކެއް ފޮނުވާލައިފިއެވެ.

އިޒްރޭލުގެ މީޑިއާތަކުން ރިޕޯޓްކޮށްފައިވާ ގޮތުގައި، މި ހަމަލާތަކާ ގުޅިގެން އިޒްރޭލުން ހިފާފައިވާ ގޯލާން ހައިޓްސް، ޓައިބީރިއަސް، ސަފޭދު، ނާޒަރެތު، ހައިފާ އަދި އެ ނޫންވެސް ގިނަ ސިޓީތަކެއްގައި ވަނީ ނުރައްކަލުގެ ސައިރަން އަޅާފައެވެ.

އިޒްރޭލުގެ އަސްކަރިއްޔާއިން ބުނެފައިވަނީ ވައިގެ ދިފާއީ ނިޒާމުތައް އޮތީ ވަރަށް މަތީ އެލާޓެއްގައި ކަމަށެވެ. އަދި ސަލާމަތީ ހާލަތަށް ރިއާޔަތްކޮށް، ކުރިއަށް އޮތް ދުވަހު ހުރިހާ ސުކޫލުތަކާއި ތައުލީމީ މަރުކަޒުތައް ބަންދުކުރުމަށް އެ ގައުމުގެ އެޑިއުކޭޝަން މިނިސްޓްރީން ވަނީ ނިންމާފައެވެ.

އީރާނުން މި އަސްކަރީ ހަރަކާތް ހިންގާފައިވަނީ ޒަޔަނިސްޓް އިޒްރޭލުން ލުބުނާނަށް ދެމުންދާ އުދުވާނީ ހަމަލާތަކުގެ ރައްދުގައެވެ. މީގެ ތެރޭގައި ބައިނަލްއަގުވާމީ ގޮތުން މަނާކޮށްފައިވާ ފޮސްފަރަސް ބޮން ބޭނުންކުރުމާއި، ބެއިރޫތުގެ ދެކުނު ސަރަހައްދެއް ކަމަށްވާ ދާހިޔާއަށް އަމާޒުކޮށް ދެމުންދާ ހަމަލާތައް ހިމެނެއެވެ.

މި ރައްދު ހަމަލާތަކަށް ފަހު، އީރާނުގެ ސިފައިންގެ މަރުކަޒީ ކޮމާންޑް ކަމަށްވާ ޚާތަމުލް އަންބިޔާ ހެޑްކުއާޓާޒްއިން ވަނީ، އިޒްރޭލުން ލުބުނާނަށް ދޭ ހަމަލާތައް ކުރިއަށް ގެންދާނަމަ، މިއަށްވުރެ ވަރުގަދަ އަދި ހިތާމަކުރަންޖެހޭ ފަދަ "ފަނާކުރަނިވި ހަމަލާތަކެއް" ދޭނެ ކަމުގެ އިންޒާރު ދީފައެވެ.

އީރާނުގެ މަރުކަޒީ އަސްކަރީ ކޮމާންޑުން ނެރުނު ބަޔާނެއްގައި، އެމެރިކާގެ ސީދާ އެހީތެރިކަމާއެކު އަދި ބައިނަލްއަގުވާމީ މުޖުތަމައު ހަނު އޮތް އޮތުމުގެ ނާޖާއިޒު ފައިދާ ނަގައި، އިޒްރޭލުން ހަނގުރާމަ ހުއްޓާލުމުގެ އެއްބަސްވުމާ ހިލާފުވަމުންދާ ދިއުމާއި ލުބުނާނުގެ ރައްޔިތުންނާ ދެކޮޅަށް ހިންގާ ލާއިންސާނީ އަމަލުތައް ވަނީ ކުށްވެރިކޮށްފައެވެ. އެ ބަޔާނުގައި އިތުރަށް ފާހަގަކޮށްފައިވާ ގޮތުގައި، އިޒްރޭލުން ދަނީ މަނާ ހަތިޔާރުތައް ކަމަށްވާ ފޮސްފަރަސް ބޮން ބޭނުންކޮށްގެން ލުބުނާނުގެ ދެކުނުގެ އާންމު ރައްޔިތުންނާ ދެކޮޅަށް ހަނގުރާމައިގެ ކުށްތައް ހިންގަމުންނެވެ.

"މުޖުރިމް އެމެރިކާގެ ފުރިހަމަ ތާއީދާއި ފަހިކޮށްދޭ ފުރުސަތާއެކު، އަދި ބައިނަލްއަގުވާމީ އިދާރާތަކުން ހަނު ތިބޭ ތިބުމުގެ ތެރެއިން، އަނިޔާވެރި ޒަޔަނިސްޓް ސަރުކާރުން ދަނީ ހަނގުރާމަ ހުއްޓާލުމުގެ އެއްބަސްވުމާ ތަކުރާރުކޮށް ހިލާފުވެ، ލުބުނާނުގެ ނިކަމެތި ރައްޔިތުންނާ ދެކޮޅަށް ހިންގާ ޖަރީމާތައް އިތުރުކުރަމުން،" އެ ބަޔާނުގައި ވެއެވެ.

ޚާތަމުލް އަންބިޔާ ހެޑްކުއާޓާޒްގެ ކޮމާންޑަރު ވިދާޅުވީ، އީރާނުން ތަކުރާރުކޮށް އިންޒާރު ދީފައިވަނިކޮށް، "ކުޑަކުދިން މަރާ ޒަޔަނިސްޓް ސަރުކާރުން" މިހާރު ވަނީ ހުރިހާ ރަތް ރޮނގުތަކެއް ހުރަސްކޮށްފައި ކަމަށެވެ. އެގޮތުން ލުބުނާނުގެ ދެކުނުން ފެށިގެން ބެއިރޫތުގެ ދާހިޔާ ސަރަހައްދާ ހަމައަށް ހަމަލާތައް ފުޅާކޮށްފައިވާކަން އޭނާ ފާހަގަކުރެއްވިއެވެ.

އިޒްރޭލުގެ ޖަރީމާތައް ދާހިޔާ ސަރަހައްދަށް ފުޅާކޮށްފިނަމަ، އިޒްރޭލުން ހިފާފައިވާ ސަރަހައްދުތަކުގެ އެތެރެއަށް ރައްދު ހަމަލާދޭނެ ކަމުގެ އިންޒާރު އީރާނުގެ ސިފައިން މީގެ ކުރިންވެސް ވަނީ ދީފައެވެ.

"ބެއިރޫތުގެ ދާހިޔާ ސަރަހައްދުގައި ހިންގާ ޖަރީމާތައް ފުޅާކޮށްފިނަމަ، ހިފާފައިވާ ސަރަހައްދުތަކުގެ އެތެރޭގައިވާ އަމާޒުތަކަށް ހަމަލާދޭނެ ކަމުގެ އިންޒާރު އަހަރެމެން ކުރިންވެސް ވާނީ ދީފައި،" ބަޔާނުގައި ބުނެފައިވެއެވެ.

އީރާނުގެ އަސްކަރީ ކޮމާންޑުން ވަނީ އިޒްރޭލުގެ އަސްކަރިއްޔާއަށް އެންމެ ފަހުގެ އިންޒާރު ދީ، ލުބުނާނުގެ ދެކުނަށާއި ދާހިޔާއަށް ދޭ ހަމަލާތައް ވަގުތުން ހުއްޓާލުމަށް ގޮވާލާފައެވެ. އަދި އެ ސަރަހައްދުތަކަށް ދޭ ހަމަލާތައް އިތުރަށް ފުޅާކޮށްފިނަމަ، ނުވަތަ އީރާނުގެ ރައްދު ހަމަލާތަކަށް އިޒްރޭލުން އަސްކަރީ ގޮތުން ރައްދު ދީފިނަމަ، ވަރުގަދަ ހަމަލާތަކަކާ ކުރިމަތިލާން ޖެހޭނެ ކަމަށް ވަނީ ބުނެފައެވެ.

"އެ ސަރަހައްދަށް ދޭ ހަމަލާތައް ފުޅާކޮށްފިނަމަ ނުވަތަ އީރާނުގެ ފިޔަވަޅުތަކަށް ރައްދު ދީފިނަމަ، މިއަށްވުރެ ވަރުގަދަ އަދި ހިތާމަކުރަންޖެހޭ ފަދަ ހަމަލާތަކަކާ އެ ސަރުކާރުން ކުރިމަތިލާން ޖެހޭނެ. އަދި އެ ސަރުކާރާއި އެ ސަރުކާރަށް ވާގިވެރިވާ ފަރާތްތަކާ ދެކޮޅަށް ފަނާކުރަނިވި ހަމަލާތައް ފަށާނަން،" ބަޔާން ނިންމާލަމުން ބުނެފައިވެއެވެ.