އީރާނުން އިޒްރޭލަށް ދިން ހަމަލާތަކާ އެކު ތެލުގެ އަގު އުފުލިއްޖެ

އޭޕްރީލް މަހު އެމެރިކާ މެދުވެރިވެ އިޒްރޭލާއި އީރާނާ ދެމެދު ގާއިމުކުރި ހަނގުރާމަ ހުއްޓާލުމުގެ އެއްބަސްވުމަށްފަހު، ފުރަތަމަ ފަހަރަށް އީރާނުން އިޒްރޭލަށް މިސައިލް ހަމަލާތަކެއް ދިނުމާ ގުޅިގެން، ހޯމަ ދުވަހުގެ ހެނދުނު އޭޝިއާގެ ބާޒާރުގައި ތެލުގެ އަގު އުފުލިއްޖެއެވެ.

މި ހަމަލާތަކާއެކު ދުނިޔޭގެ ބާޒާރުގައި ތެލުގެ އަގު ހުންނަ މިންގަނޑު ކަމަށްވާ ބްރެންޓް ކްރޫޑްގެ އަގު 2.6 އިންސައްތަ މައްޗަށް ގޮސް، ފީފާއެއްގެ އަގު ވަނީ 95.50 ޑޮލަރަށް (71.60 ޕައުންޑް) އަރާފައެވެ. އަދި އެމެރިކާގެ ބާޒާރުގައި ސާފުނުކުރާ ތެލުގެ އަގު 2.5 އިންސައްތަ މައްޗަށް ގޮސް، ފީފާއެއްގެ އަގު ވަނީ 92.75 ޑޮލަރަށް އުފުލިފައެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ވަނީ މި ހަމަލާތަކަކީ މުޅި ހަފުތާއަށް ދެމިގެންދާނެ ވަރުގަދަ ހަމަލާތަކެއްގެ ފެށުން ކަމަށް ބުނެ އިންޒާރު ދީފައެވެ.

އިޒްރޭލުގެ އަސްކަރިއްޔާއިން އަމުރު ލިބުނުހާ އަވަހަކަށް "ދުޝްމަނުންނަށް" ހަމަލާދޭނެ ކަމަށް ބުނަމުންދިޔަ ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް އިޒްރޭލަށް ބަދަލު ނުހިފުމަށް ބާރުއަޅުއްވާނެ ކަމަށް ނޫސް އެޖެންސީއެއް ކަމަށްވާ "އެކްސިއޯސް" އިން ވަނީ ރިޕޯޓްކޮށްފައެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއަށް ނިސްބަތްކުރައްވައި ޓްރަމްޕް "އެކްސިއޯސް" އަށް ވިދާޅުވީ، "އަޅުގަނޑު މިހާރު މިދަނީ ބީބީއަށް ގުޅައި، ބަދަލު ނުހިފުމަށް ބުނަން" ކަމަށެވެ.

ރައީސް ޓްރަމްޕާ ހަވާލާދީ އެ ނޫހުން އިތުރަށް ބުނެފައިވަނީ، އީރާނާއެކު ފަހުގެ އެއްބަސްވުމަކަށް އައުމާ ވަރަށް ގާތްވެފައިވާ ކަމަށާއި، އެއީ ވަރަށް ރަނގަޅު އެއްބަސްވުމަކަށް ވާނެ ކަމަށެވެ. އަދި މިހާރު ހިނގަމުންދާ ކަންތައްތަކުގެ ސަބަބުން އެ އެއްބަސްވުން ރޫޅިގެންދާން ބޭނުންފުޅުނުވާ ކަމަށްވެސް ޓްރަމްޕް ވިދާޅުވިއެވެ.

އިޒްރޭލާއި އީރާނާ ދެމެދު ހަނގުރާމަ ހުއްޓާލުމުގެ އެއްބަސްވުމެއް އޭޕްރީލް 17 އިން ފެށިގެން އަމަލުކުރަމުންދިޔަ ނަމަވެސް، ދެ ގައުމުންވެސް ވަނީ ތަކުރާރުކޮށް އެ އެއްބަސްވުމާ ޚިލާފުވެފައެވެ.

ފެބްރުއަރީ 28 ވަނަ ދުވަހު އެމެރިކާއާއި އިޒްރޭލުން ގުޅިގެން އީރާނަށް ދިން ހަމަލާތަކަށްފަހު ތެލުގެ އަގު ވަރަށް ބޮޑަށް އުފުލިފައިވާއިރު، އޭގެ ފަހުން ގާއިމުކުރި ހަނގުރާމަ ހުއްޓާލުމުގެ މުއްދަތުގައިވެސް އަގުތަކަށް ބޮޑެތި ބަދަލުތަކެއް އަންނަނީ އުފެދެމުންނެވެ.

މި ހަމަނުޖެހުމުގެ ސަބަބުން ދުނިޔޭގެ ހަކަތައިގެ ބާޒާރަށް ދިގުމުއްދަތަކަށް ކުރާނެ އަސަރުތަކާ މެދު ވިޔަފާރިވެރިން ވިސްނަމުންދާއިރު، ވޭތުވެދިޔަ ހަފުތާގައި ތެލުގެ އަގު ހުރީ 95 ޑޮލަރުގެ ރޭންޖުގައެވެ.

އެމެރިކާއާއި އިޒްރޭލުން ދިން ހަމަލާތަކުގެ ބަދަލުހިފުމުގެ ގޮތުން، ވިޔަފާރީގެ މުހިންމު މަގަކަށްވާ ހޮރްމޫޒް ކަނޑުއޮޅި ހުރަސްކުރާ އުޅަނދުތަކަށް ހަމަލާދޭނެ ކަމުގެ އިންޒާރު އީރާނުން ދިނުމާ ގުޅިގެން، ގަލްފް ސަރަހައްދުން ތެލާއި ގޭސް ބޭރުކުރުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.