މި އަހަރުގެ މިހާތަނަށް ހިމަބިހީގެ 7 ކޭސް ފެނުނު އިރު 74 ކޮންޓެކްޓުން ފާހަގަކުރެވިއްޖެ
މިއަހަރުގެ މިހާތަނަށް ރާއްޖެއިން ހިމަބިހީގެ 7 ކޭސް ފެނިފައިވާތީ، ހުންއައިސް ހަށިގަނޑުން ބިހި ނަގާނަމަ ލަސްނުކޮށް ޑޮކްޓަރަށް ދެއްކުމަށް އެޗްޕީއޭއިން އިލްތިމާސްކޮށްފި. މި ބަލިން ރައްކާތެރިވުމަށް ވެކްސިން ފުރިހަމަކުރުން މުހިންމުއިރު، ބަލި ފެތުރުން ހުއްޓުވުމަށްޓަކައި ކޮންޓެކްޓުން ދެނެގަނެ ވެކްސިން ދިނުމުގެ މަސައްކަތް އެ އެޖެންސީން މިހާރު ދަނީ ކުރަމުން. ވައިގެ ޒަރީއާއިން ފަސޭހައިން ފެތުރޭ މި ބައްޔަކީ ފުރާނައަށް ނުރައްކާވެދާނެ ބައްޔަކަށްވާތީ، ހޮސްޕިޓަލް ފަދަ ތަންތަނަށް ޒިޔާރަތްކުރާއިރު މާސްކް އެޅުމަށްވެސް އެޗްޕީއޭއިން ވަނީ އަންގާފަ.
މީސްލްސް | ހެލްތު ޕްރޮޓެކްޝަން އެޖެންސީ
މި އަހަރުގެ މިހާތަނަށް ހިމަބިހީގެ 7 ކޭސް ފެނުނު އިރު 74 ކޮންޓެކްޓުން ފާހަގަކުރެވިފައިވާ ކަމަށް ހެލްތު ޕްރޮޓެކްޝަން އެޖެންސީ އިން ބުނެފި އެވެ.
ހެލްތު ޕްރޮޓެކްޝަން އެޖެންސީ އިން ބުނީ މިއަހަރުގެ މިހާތަނަށް ހިމަބިހި ނުވަތަ މީސްލްސްގެ 7 ޕޮޒިޓިވް ކޭސް ރިޕޯޓު ކުރެވިފައިވާ ކަމަށެވެ. އަދި މި ކޭސްތަކުގެ 74 އަށްވުރެ ގިނަ ކޮންޓެކްޓުން ފާހަގަކުރެވިފައިވާ ކަމަށެވެ.
އެޗްޕީއޭއިން ބުނީ ހުންއައިސް، ގައިގައި ރަތް ބިިހިތަކެއް ނަގައިފިނަމަ ލަސްނުކޮށް ޑޮކްޓަރަށް ދެއްކުމަށް ވަނީ އެދިފަ އެވެ. އަދި ހޮސްޕިޓަލަށް ޒިޔާރަތްކުރާނަމަ މާސްކް އެޅުމަށް ވަނީ އެދިފަ އެވެ،
ހިމަބިހި ކޭސްއެއް ފެނިއްޖެނަމަ އާންމުކޮށް އަމަލުކުރާ އުސޫލުގެ މަތިން، ބަލި ޖެހުނު ގޮތް ދެނެގަތުމަށް ކޭސް އިންވެސްޓިގޭޝަން ހެދުމާއި، ކޮންޓެކްޓުން ދެނެގަތުމާއި ކޮންޓެކްޓުންނަށް ވެކްސިން ދިނުން މިހާރު ދަނީ ކުރަމުންނެވެ.
ހިިިމަބިއްސަކީ ވައިރަހެއްގެ ސަބަބުން ނޭވާލާ ނިޒާމަށް ޖެހޭ، ވަރަށް ފަސޭހައިން ގަޔަށް އަރާ ބައްޔެކެވެ. މި ބަލި ޖެހިފައިވާ މީހަކު ނޭވާލާއިރު ނުވަތަ ކެއްސާ ކިނބިހި އަޅާއިރު، ވައިގެ ތެރެއިން މި ބަލި ވަރަށް ފަސޭހައިން ފެތުރެ އެވެ. އަދި ބަލިޖެހިފައިވާ މީހަކު ހުރި ކޮޓަރިއެއްގެ ވައިގެ ތެރޭގައި މި ވައިރަހުގެ ޒައްރާތައް ދެ ގަޑިއިރު ވަންދެން ހުރެ އެވެ.
މިއީ ވަރަށް ބޮޑުވަރުވާ ބައްޔަކަށް ވާއިރު، މިއީ ރައްކާތެރިކަމުގެ ފިޔަވަޅު އަޅައިފިނަމަ ބަލިން ސަލާމަތްވެވޭނެ ބައްޔެކެވެ. ނަމަވެސް، މި ބަލީގެ ސަބަބުން ފުރާނައަށް ނުރައްކާވާ ފަދަ ސިއްހީ މައްސަލަތައް ކުރިމަތިވުމުގެ ފުރުސަތު އޮވެ އެވެ.
އާންމުގޮތެއްގައި ބަލީގެ އަލާމާތްތައް ފެންނަން ފަށަނީ ވައިރަހަށް ހުށަހެޅޭތާ 7 ދުވަހާއި 14 ދުވަހާ ދެމެދުގެ މުއްދަތެއްގަ އެވެ. މި އަލާމާތްތައް ފެންނަނީ މައިގަނޑު ދެ މަރުހަލާއަކަށް ބެހިގެންނެވެ.
ފުރަތަމަ ފެންނަ އަލާމާތްތަކުގެ ތެރޭގައި ގަދައަށް ހުންއައުމާއި، މެދުނުކެނޑި ކެއްސުމާއި، އަރިދަފުސް ފޭބުމާއި، ލޯ ރަތްވެ ފެންއައުމުގެ އިތުރުން އަނގައިގެ އެތެރޭގައި ކުދި ހުދު ތިކިތަކެއް (ކޮޕްލިކްސް ސްޕޮޓްސް) ޖެހުން ހިމެނެ އެވެ.
ބަލިޖެހޭތާ މަދު ދުވަސްކޮޅެއްގެ ތެރޭގައި ހަށިގަނޑުން ރަތް ބިހިތަކެއް ނަގަން ފަށަ އެވެ. އާންމުގޮތެއްގައި މި ބިހިތައް ފުރަތަމަ ފެންނަނީ މޫނުމަތިންނާއި ކަންފަތް ކައިރިންނެވެ. އޭގެ ފަހުން މުޅި ހަށިގަނޑަށް މި ބިހިތައް ފެތުރިގެންދެ އެވެ.
މި ބަލި ޖެހޭ ގިނަ މީހުން ބަލިން ފަސޭހަވި ނަމަވެސް، ބައެއް ހާލަތްތަކުގައި ނުރައްކާތެރި ސިއްހީ މައްސަލަތައް ކުރިމަތިވެ އެވެ. ހާއްސަކޮށް ފަސް އަހަރުން ދަށުގެ ކުޑަކުދިންނާއި، މާބަނޑު މީހުންނާއި، ބަލިތަކުގެ ސަބަބުން ދިފާއީ ނިޒާމު ބަލިކަށިވެފައިވާ މީހުންނަށް މި ނުރައްކާ ބޮޑެވެ. އާންމުކޮށް ދިމާވާ މައްސަލަތަކުގެ ތެރޭގައި ކަންފަތުގައި އިންފެކްޝަން އުފެދުމާއި ބަނޑު ދިޔާވުން ހިމެނެ އެވެ. އަދި މިއަށްވުރެ ނުރައްކާތެރި ހާލަތްތަކުގައި ނިއުމޯނިއާ ޖެހުމާއި ސިކުނޑި ދުޅަވުން (އެންސެފަލައިޓިސް) ފަދަ ކަންކަން މެދުވެރިވެ އެވެ.
ހިމަބިހި ވައިރަސްއަށް ހާއްސަ ވަކި ފަރުވާއެއް ނުވަތަ ބޭހެއް ނޯވެ އެވެ. މި ބަލީގައި ދެވޭ ފަރުވާއަކީ ބަލީގެ އަލާމާތްތައް ކުޑަކުރުމާއި އަރާމުކުރުމެވެ. މި ބަލިން ރައްކާތެރިވުމަށް އޮތް އެންމެ ފަހި މަގަކީ އެމް.އެމް.އާރް (ހިމަބިހި އަދި ރުބެއްލާ) ވެކްސިން ޖެހުމެވެ. މިއީ ބަލިން ރައްކާތެރިކޮށްދޭ، ރައްކާތެރިކަން ކަށަވަރުވެފައިވާ ވަރަށް ފައިދާހުރި ވެކްސިނެކެވެ.
