ސަރުކާރުގެ މިޑްޓާމް ރިޕޯޓް: ފާހެއް ނުވޭ

ސަރުކާރުތައް ބަދަލުވެ، އައު ވެރިން އިންތިޚާބުވަނީ އެ ވެރިން ރައްޔިތުންނަށް ވެވަޑައިގަންނަވާ ވައުދުތަކެއްގެ މައްޗަށެވެ. ރައްޔިތުން ވޯޓު ދެނީ ކަންކަން ބަދަލުވެ، ރަނގަޅުވެ، ނުވަތަ ކަންކަން ފުރިހަމަވާނެ ކަމަށް އުއްމީދުކޮށްގެންނެވެ. މިހާރުގެ ސަރުކާރުގެ ދައުރުގެ ގާތްގަނޑަކަށް ދެބައިކުޅަ އެއްބައި ފާއިތުވެފައިވާއިރު، މިހާރު އުފެދޭ ސުވާލަކީ ސަރުކާރުން މި ދެންނެވި ވައުދުތައް ފުއްދާފައިވަނީ ކިހާ މިންވަރަކަށްތޯއެވެ؟

ބޯހިޔާވަހިކަމާއި، އިގްތިސާދީ ދިރުން އިއާދަކުރުމާއި، ވަޒީފާ އުފެއްދުމާއި، ސިއްހީ ދާއިރާ ކުރިއެރުވުމުގެ އިތުރުން ބޮޑެތި އުމްރާނީ މަޝްރޫއުތައް ސަރުކާރުގެ އެޖެންޑާގައި ހިމެނިފައި އެބައޮތެވެ. ނަމަވެސް އެ އެޖެންޑާއަށާއި މެނިފެސްޓޯއަށް އަމަލީ ސިފަ އައިސްފައިވާ މިންވަރު، މިފަހުން ބާއްވަމުންދާ އިންތިޚާބުގެ ނަތީޖާތަކުންވެސް ދަނީ ފެންނަމުންނެވެ. ރައްޔިތުން ސަރުކާރާމެދު ނުރުހޭ މިންވަރު ވޯޓުން ދަނީ ފެންނަމުންނެވެ.

ބޯހިޔާވަހިކަމަކީ ރައްޔިތުންނަށް މި ސަރުކާރުން ވެފައިވާ އެންމެ ބޮޑު އެއް ވައުދެވެ. ސަރުކާރުން ވައުދުވީ ގިނަ ދުވަސްތަކެއް ވަންދެން ހައްލުނުވެ އޮތް ބޯހިޔާވަހިކަމުގެ މައްސަލަތަކަށް ހައްލެއް ހޯދައިދީ، އަގުހެޔޮ ބޯހިޔާވަހިކަން ފޯރުކޮށްދޭނެ ކަމަށެވެ. ނުވިތާކަށް އެކި ނަންނަމުގައި ބިޔަ، ބޮޑެތި ބޯހިޔާވަހިކަމުގެ މަޝްރޫއުތައްވެސް އިއުލާނު ކުރިއެވެ.

އެ އިއުލާންތައް ކުރި ނަމަވެސް، ބޯހިޔާވަހިކަމަށް އެދިފައިވާ ގިނަ ފަރާތްތަކެއް އަދިވެސް ތިބީ އަމަލީ ނަތީޖާއެއްގެ އިންތިޒާރުގައެވެ. އެ އިންތިޒާރުގައި ރައްޔިތުން ތިބޭތާ އަހަރަކަށްފަހު އަހަރެއް ފާއިތުވަމުންދާއިރު، ސަރުކާރުގެ މިޑްޓާމްއާ ހިސާބަށް އައިއިރު އަދި ރައްޔިތަކަށް ދެވުނު ބޯހިޔާވަހިކަމެއް ނެތެވެ. ނުވިތާކަށް ކުރިން ނިންމާފައިވާ މަޝްރޫއުތަކުގެ ދަށުން ގޯއްޗާއި ފްލެޓު ޙަވާލު ކުރުންވެސް އެތައް ގުނައަކަށް ވަނީ ލަސްވެގެން ގޮސްފައެވެ.

މީގެ އިތުރުން، ފެންނަމުންދާ މަންޒަރުތަކަށް ބަލާއިރު، އިގްތިސާދީ ހަމަޖެހުން ގާއިމުކުރުމަކީވެސް ސަރުކާރަށް ކުރިމަތިވެފައިވާ ބޮޑު ގޮންޖެހުމެއްގެ ގޮތުގައި ދަނީ ފެންނަމުންނެވެ.

ދައުލަތުގެ މާލީ ހާލަތު ވަރުގަދަކުރުމަށާއި، އިންވެސްޓްމަންޓްތައް އިތުރުކުރުމަށާއި، ދަރަނި މެނޭޖުކުރުމަށް ކުރަމުންދާ މަސައްކަތްތަކާމެދު ބޮޑެތި ސުވާލުތަކެއް ވަނީ އުފެދިފައެވެ. އެ މަސައްކަތްތަކުގެ ނަތީޖާ ނުނިކުންނާތީ ރައްޔިތުން ތިބީ މާޔޫސްވެފައެވެ. ދިރިއުޅުމުގެ ޚަރަދުތައް ބޮޑުވުމާއި، މާލީ ފިއްތުންތަކާއި، ދައުލަތުގެ ޚަރަދުތައް ދެމެހެއްޓެނިވި ގޮތެއްގައި ހިފެހެއްޓުމާ މެދު އޮތް ކަންބޮޑުވުންތައް އަދިވެސް ހުރީ ހަމަ އެ ގޮތުގައެވެ.

ޚަރަދުތައް ކުޑަކުރުމުގެ ގޮތުން ސަރުކާރުން ވަނީ ފިޔަވަޅުތަކެއް ތައާރަފުކޮށްފައެވެ. ނަމަވެސް، ސަރުކާރުގެ އާ މަގާމުތަކަށް މީހުން އައްޔަންކުރުމާއި އިތުރު މަގާމުތައް އުފެއްދުން ކުރިއަށްދާއިރު، ޚަރަދު ކުޑަކުރުމަށް ކުރާ މަސައްކަތްތަކުގައި ފެންނަން އޮތީ ދެފުއް ދެގޮތް ކަމާއި، ބަހާއި އަމަލު ދިމާނުވުމެވެ.

މިއަދުގެ ޒުވާނުންނަށްވެސް ވަޒީފާގެ ކުރިމަގާއި، އުޖޫރައާއި، އަދި ފަންނީ ގޮތުން ކުރިއަށްދިއުމަށް ހުރި ފުރުސަތުތަކާ މެދު ބޮޑެތި ކަންބޮޑުވުންތައް އެބަހުއްޓެވެ.

ޚާއްސަ ދާއިރާތަކުން ކިޔަވައިގެން ތިބި ގިނަ ދަސްވެނިންތަކެއް ވަޒީފާގެ ފުރުސަތުތައް މަދުވުމުގެ ޝަކުވާ ކުރަމުންދާއިރު، މިހާރު ކިޔަވަމުންދާ ޒުވާން ދަރިވަރުންނަށްވެސް ރާއްޖެއިން ބޭރުގައި އެތައް ތަކުލީފުތަކެއް ދަނީ ކުރިމަތިވަމުންނެވެ.

މީގެ އިތުރުން، ބޭސް ނުލިބުމުގެ މައްސަލައާއި، އަސާސީ ސިއްޙީ ޚިދުމަތްތަކުގެ ފެންވަރު ދަށްކަމުގެ ޝަކުވާތަކުގެ އިތުރުން، ސްޕެޝަލިސްޓުން ލިބުމުގެ ދަތިކަމާއި، ފަރުވާ ހޯދުމުގައި ހުރި ލަސްތަކާއި، ރާއްޖޭން ބޭރުން ފަރުވާ ހޯދުމަށް ހިނގާ ޚަރަދުތަކުގެ އިތުރުން ސިއްހީ ޚިދުމަތްތައް ހޯދުމުގައި ހުރި ދަތިތަކާ ގުޅޭގޮތުންވެސް އާންމުންގެ ކަންބޮޑުވުންތައް ދަނީ ފާޅުވަމުންނެވެ.

ޖުމުލަކޮށް ދަންނަވާނަމަ ސަރުކާރުގެ ދައުރުގެ މެދުތެރެއިން ފެންނަން އޮތީ ނަތީޖާއެއް ނުނެރެވި، އެކިއެކި ބަހަނާތައް ދައްކައި، ބޭކާރު ކަންކަމުގައި ދައުލަތުގެ މުދަލާއި ވަސީލަތްތައް ބޭނުން ކުރަމުންދާ މަންޒަރެވެ. އެހެންކަމުން ހަގީގަތުގައި މި ސަރުކާރުން މިޑްޓާމް ރިޕޯޓުގައި ފާހެއް ނުވިއެވެ.