ރާއްޖޭގައި މިހާރު މިއޮތީ ދެއިރު ދެދަޅައަށް އުސޫލުތަކާއި، ގަވާއިދުތައް ބަދަލުކުރާ ސަރުކާރެއް، އެއް އަމާޒަކަށް ކުރިއަށް ގެންދާ ސިޔާސަތެއް ނެތް: ޑރ.ޑީޑީ
4 މެއި 2026 | ހޯމަ 08:19މި ސަރުކާރުން ގާނޫނުތަކާއި ގަވާއިދުތަކަށް ބޮޑެތި ބަދަލުތަކެއް ގެންނަން ފެށި ނަމަވެސް، އެ އުސޫލުތައް ދެމެހެއްޓެނިވި ގޮތެއްގައި ތަންފީޒު ނުކުރެވޭކަން ޑރ. ޑީޑީ ފާހަގަކުރެއްވި. ސިޔާސީ މަގުސަދުތަކެއް ހާސިލުކުރުމަށް ބޯހިޔާވަހިކަމުގެ ސިޔާސަތުތައް ފަދަ މުހިންމު އުސޫލުތައް އަވަސްއަވަހަށް ބަދަލުކުރަމުންދާތީ އޭނާ ވަނީ ކަންބޮޑުވުން ފާޅު ކުރައްވާފައި. އަދި އެއް އަމާޒަކަށް ވާސިލުވުމުގެ ހަރުދަނާ ސިޔާސަތެއް މި ސަރުކާރުގައި ނެތް ކަމަށް ވިދާޅުވެ އޭނާ ވަނީ ފާޑުވިދާޅުވެފައި.
ރާއްޖެޓީވީގެ ފަލަސުރުހީ ޕްރޮގްރާމްގައި އެމްޑީޕީގެ ކުރީގެ ރައީސް ޑރ. އިބްރާހިމް ދީދީ ވާހަކަދައްކަވަނީ. | ރާއްޖެއެމްވީ
ދިވެހިރާއްޖޭގައި މިހާރު މިއޮތީ ދެއިރު ދެދަޅައަށް އުސޫލުތަކާއި، ގަވާއިދުތައް ބަދަލުކުރާ ސަރުކާރެއް ކަމަށާއި، އެއް އަމާޒަކަށް ކުރިއަށް ގެންދާ ސިޔާސަތެއް މިސަރުކާރުގެ ނެތް ކަމަށް އެމްޑީޕީގެ ކުރީގެ ރައީސް ޑރ. އިބްރާހިމް ދީދީ (ޑރ.ޑީޑީ) ވިދާޅުވެއްޖެ އެވެ.
އާދިއްތަ ދުވަހުގެ ރޭގެ ފަލަސުރުހީ ޕްރޮގްރާމްގައި ޑރ. ޑީޑީ ވިދާޅުވީ، ރައީސް މުއިއްޒުގެ ސަރުކާރު އައުމާއެކު ހަރުދަނާ އުސޫލުތަކާއި، ގާނޫނު އަސާސީއަށް ބޮޑެތި ބަދަލުތަކެއް ގެނައުމުގެ މަސައްކަތްތައް ފެށިގެން ދިޔަ ކަމަށެވެ.
ނަމަވެސް އައު އުސޫލެއް ހެދުމަށްފަހު މާ ގިނަ ދުވަހު އެއަށް އަމަލު ނުކުރެވޭ ކަމަށާއި، ދުވަސްކޮޅަކުން އަނެއްކާ ވެސް ކުރީގައި އޮންނަ ގޮތަށް ބަދަލުވާ ކަމަށް އޭނާ ވިދާޅުވި އެވެ.
ޑރ. ޑީޑީ ވިދާޅުވީ ރައްޔިތުންނަށް ލުއިކޮށްދޭން ނުވަތަ ރައްޔިތުންގެ އެދުމުގެ މަތީން ބަދަލެއް ގަނައުމުގައި މައްސަލައެއް ނެތް ކަމަށެވެ. ނަމަވެސް އެ ގެންނަ އިސްލާހުތައް އަވަސްއަވަހަށް ބަދަލުވާތީ، އެކަމާމެދު ސުވާލު އުފެދޭ ކަމަށް އޭނާ ވިދާޅުވި އެވެ.
އެގޮތުން ބޯހިޔާވަހިކަން ފޯރުކޮށް ދިނުމަށް ސަރުކާރުން ގެންގުޅޭ އުސޫލު އިރުއިރުކޮޅުން ބަދަލުވާތީ އެކަމުގެ ކަންބޮޑުވުން ޑރ.ޑީޑީ ފާޅުކުރެއްވި އެވެ.
ދެން އެ ބަދަލުކުރެއްވީ ކުރީގައި ހުރި ރައްޔިތުންގެ ޝަކުވާތަކަށް އަޑުއައްސަވާފައި އެއަށް ރަނގަޅު ހައްލެއް ހޯދަންތޯ؟ މައްސަލައެއް ނެތް. އެހެންކަމަށްވަންޏާ އެކަމަކު ތި ވިދާޅުވިހެން މިއަދު ބަދަލުކުރައްވާ އުސޫލު މާދަމާ އަނެއްކާ އެބަ ބަދަލުކުރައްވާ. އެހެންވީމާ، ސިޔާސީގޮތުން ކޮންމެ މަގުސަދެއް ހާސިލުކުރައްވަންތޯ އެ އުޅުއްވަނީ؟ ނުވަތަ މި ދޭތެރެއިން އެ އުސޫލަށް ބަދަލުކުރެއްވީ މިދިޔަ ލޯކަލް ކައުންސިލުން އިންތިޚާބަށް އަމާޒުކޮށް، އޭގެ ބޭނުން ހިފަންތޯ؟ ދެން މިހާރު އަނެއްކާ އެ ބަދަލުކުރައްވަނީ 2028 އަމާޒުކުރަންތޯ؟ މިއީ ދިވެހި ރައްޔިތުންނަށް ހަމަ އިންތިހާއަށް ކަންބޮޑުވާ މައްސަލައެއް. ކުރީ ސަރުކާރުތަކުން އަޅުގަނޑުމެންނަށް ފެނިގެންގޮސްފައެއް ނެތް. އެގޮތަށް އުސޫލުތަކެއް ބަދަލުކުރައްވަން ބަދަލުކުރަމުން ގެންދެވިތަނެއް. އެއީ ރައީސް ސޯލިހުގެ ސަރުކާރަށް ބެލިއަސް އަދި އޭގެ ކުރީގެ ސަރުކާރުތަކަށް ބެލިއަސް. މި ދޭއިރު ދެ ދަޅައަށް ކުރާ ކަމެއްހެން އުސޫލުތަކެއް ބަދަލުކުރަމުން ގެންދަވާފައެއް ނެތް އިނގޭތޯ. އެހެންވީމާ، ރައީސް މުއިއްޒުގެ ވިސްނުން މި ހުންނަނީ ދޭއިރު ދެ ދަޅައަށް އެކަން ކުރާ އުސޫލުން ބާވައޭ އަޅުގަނޑު ހިތަށްއަރަނީ. އެއްވެސް ކަހަލަ ހަރުދަނާ، ޒިންމާދާރުކަމެއް، އެއް އަމާޒަކަށް ކުރިއަށް ގެންދަވާ ސިޔާސަތެއް ހަމަ އެއްވެސް ދިމާލަކުން ފެނިގެނެއް ނުދޭން އިނގޭތޯ.އެމްޑީޕީގެ ކުރީގެ ރައީސް ޑރ. އިބްރާހިމް ދީދީ
ޑރ. ޑީޑީ ވިދާޅުވީ މިސަރުކާރުން ގަވާއިދާއި އުސޫލުތައް ބަދަލު ކުރުމުގައި ސިޔާސީ ގޮތުން ހާސިލް ކުރަން ބޭނުންވާ އެހެން މަގުސަދެއް އޮންނަ ކަމަށެވެ. އެކަން މިހާރު ރައްޔިތުންނަށް އެނގޭ ކަމަށާއި، އެކަންކަން ބަލައިނުގަންނަ ކަމަށް އޭނާ ވިދާޅުވި އެވެ.
