މިދިޔަ އަހަރާއި އަޅާ ބަލާ ނަމަ 19 މޭއި އާއި ހަމައަށް ރާއްޖެ އައި ފަތުރުވެރިންގެ އަދަދު ލައްކައެއްހާ ތަނުން ވަނީ މަދުވެފައި : އަމީރު
މާލީ ހާލަތާ މެދު ކަންބޮޑުވާން ނުޖެހޭ ކަމަށް ބުނެ ސަރުކާރުން ސިޔާސީ ވާހަކަ ދެއްކުމުގެ ބަދަލުގައި، ހަގީގީ މައުލޫމާތު ރައްޔިތުންނަށް ހާމަކުރަން ޖެހޭ ކަމަށް އޭނާ ފާހަގަކުރެއްވި. އަދި ދައުލަތުގެ ކަންކަން ސިއްރުވެރި ގޮތަކަށް ކުރިއަށް ގެންދިއުމުގެ ސަބަބުން ކުރިމަތިވެދާނެ ގެއްލުންތަކާ މެދު އަމީރު ވަނީ އިންޒާރު ދެއްވާފަ.
ކުރީގެ ފިނޭންސް މިނިސްޓަރ އިބްރާހިމް އަމީރު ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަނީ 20.05.2026 | ސްކްރީން އިމޭޖް
މިދިޔަ އަހަރާއި އަޅާ ބަލާ ނަމަ 19 މޭއި އާއި ހަމައަށް ރާއްޖެ އައި ފަތުރުވެރިންގެ އަދަދު ލައްކައެއްހާ ތަނުން ވަނީ މަދުވެފައި ކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން އަމީރު ވަނީ ފަތުރުވެރިކަން ދަށްވަމުންދާ މިންވަރު ރާއްޖެ އަށް ޒިޔާރަތްކުރާ ފަތުރުވެރިންގެ އަދަދުތަކުން ފެންނަން ހުރި ކަމަށް ވިދާޅުވެފަ އެވެ. އެގޮތުން ބަލާ ނަމަ، ތަފާސްހިސާބަށް ބަލާ ނަމަ މިދިޔަ ދެ އަހަރާއި އަޅާ ބަލާ އިރު ދުވާލެއްގެ މައްޗަށް އަންނަ ފަތުރުވެރިންގެ އަދަދު 1600 އިން މަދުވެފައިވާ ކަމަށް އަމީރު ވިދާޅުވި އެވެ.
ރާއްޖޭގެ އިގްތިސާދާއި މެދު ކަންބޮޑުވާން ޖެހޭ ކަމެއް ނެތް ކަމަށް ސަރުކާރުން މި ވަގުތު ބުނުމަކީ އެންމެ ބޮޑު ކަންބޮޑުވުން ކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެ އެވެ.
ރާއްޖޭގެ އިގްތިސާދުގެ ހަމަ އެކަނި އަލި ކަމަކަށް އޮތީ ފަތުރުވެރިކަން ކަމަށް ވާއިރު އެ ސިނާއަތް ދަށް ވެގެން ދާން ދޫކޮށްލައިގެން ނުވާނެ ކަމަށް އަމީރު ވިދާޅުވި އެވެ. މިދިޔަ އަހަރާއި އަޅާ ބަލާނަމަ ލައްކަ އަކަށް ވުރެ ގިނަ ފަތުރުވެރިން މަދު ވެފައިވާ ކަމަށާއި އެކަމުގެ ގެއްލުން އެ ސިނާއަތަށް އިންތިހާ އަށް ކުރާނެ ކަމަށް އަމީރު ވަނީ ވިދާޅުވެފަ އެވެ.
އަމީރު ވިދާޅުވީ މެދުއިރުމަތީގެ ހަނގުރާމަ އާއި ގުޅިގެން މުޅި ދުނިޔޭގެ އިގްތިސާދަށް ލޮޅުން އަރާ އިރު ސަރުކާރުން އެންމެ އެކަށީގެންވާ މިންވަރަށް ކަންކަމަށް ތައްޔާރުވަމުން ނުދާކަމަށާއި ރައްޔިތުންނަށް ރަނގަޅު މައުލޫމާތު ފޯރުކޮށްދިނުން މުހިންމު ކަމަށް އަމީރު ވިދާޅުވި އެވެ.
"އަޅުގަނޑުމެންނަށް މި ފެނިގެން ދަނީ ރައްޔިތުންނަށް ވާނުވާ ނޭނގި ވަރަށް ސިއްރުން ކަންކަން ކުރަމުންދާތަން." އަމީރު ވިދާޅުވި އެވެ.
އަމީރު ވަނީ ފަތުރުވެރިކަމުގެ ދާއިރާގެ އިތުރުން ކޮންސްޓްރަކްޝަން ކުންފުނިތަކާއި ކުދި ވިޔަފާރިތައް ވެސް ދަނީ ބަނގުރޫޓު ވުމާއި ދިމާލަށް ކަމަށް ފާހަގަކުރައްވާފަ އެވެ. އެހެންކަމުން އަދި ދަރަނި ދެއްކުމާއި މުސާރަ ދިނުން ދަށް ނުވި ނަމަވެސް މުޅި އިގްތިސާދު އޮތީ ވަރަށް ދަށް ހާލަތުގައި ކަމަށް އަމީރު ވިދާޅުވި އެވެ.
ރާއްޖޭގެ މާލީ ހާލަތާއި މެދު ކަންބޮޑުވާން ނުޖެހޭ ކަމަށް ސަރުކާރުން ބުނާތީ އެކަމަށް އަމީރު ވަނީ ފާޑު ވިދާޅުވެފަ އެވެ. މި ވަގުތު ރާއްޖޭގެ ދަރަނިތައް ދައްކާ، ކުންފުނިތަކުގެ މުސާރަ ދެވުނު ނަމަވެސް ދުނިޔޭގެ އިގްތިސާދީ ހާލަތާއި ގުޅިގެން ޤައުމުތަކުން އަޅަމުންދާ ފަދަ ފިޔަވަޅުތަކެއް ރާއްޖެ އިން އަޅަމުންދާ މަންޒަރު ނުފެންނަ ކަމަށް އަމީރު ވިދާޅުވި އެވެ. އަދި ކަންކަން ރަނގަޅު ކަމަށާއި ހާސްވާން ޖެހޭ ކަމެއް ނެތް ކަމަށް ބުނެ ދައްކަނީ ސިޔާސީ ވާހަކަތައް ކަމަށާއި އެކަމުގެ ގެއްލުމާއި ކުރިމަތިލާން ޖެހޭނީ ފަހުން ކަމަށް އަމީރު ވަނީ ވިދާޅުވެފަ އެވެ.
