ތެޔޮ ޓޭންކަރަކަށް މިސައިލް ހަމަލާއެއްގައި ދެ ފަޅުވެރިން ގެއްލިއްޖެ

އޮމާންގެ އައްސޭރިފަށުން ދަތުރުކުރި ތެޔޮ ޓޭންކަރަކަށް، އެމެރިކާއިން ދިން ކަމަށް ބެލެވޭ މިސައިލް ހަމަލާއެއްގައި ދެ ފަޅުވެރިއަކު ގެއްލި، އެކަކަށް އަނިޔާވެފައިވާ ކަމަށް ކަނޑުދަތުރުފަތުރާ ބެހޭ އިދާރާތަކުން ބުދަ ދުވަހު ބުނެފިއެވެ.

ބްރިޓިޝް މެރިޓައިމް ސެކިއުރިޓީ ގްރޫޕް "އަމްބްރޭ" އިން ބުނި ގޮތުގައި، މި ހަމަލާއަކީ އީރާނުގެ ބަނދަރުތައް ބަންދުކުރުމަށް އެމެރިކާއިން ހިންގާ އޮޕަރޭޝަންތަކުގެ ތެރެއިން ދީފައިވާ ހަމަލާއެއް ކަމަށް ބެލެވެއެވެ.

އަމްބްރޭއިން އިތުރަށް ފާހަގަކުރި ގޮތުގައި، މީގެ ކުރިންވެސް މިފަދަ ހަމަލާތައް ދިނުމުގެ ކުރިން، އުޅަނދުގެ ފަހަތުކޮޅަށް ހަމަލާދޭނެ ކަމުގެ އިންޒާރުދީ، ފަޅުވެރިން އުޅަނދުގެ ކުރީކޮޅަށް އެއްވުމަށް އަންގައެވެ.

ކަނޑުގެ ސަލާމަތީ ކަންކަން ބަލަހައްޓާ ދެވަނަ މަސްދަރަކުންވެސް ވަނީ، އެ އުޅަނދަށް ހަމަލާދީފައިވަނީ އެމެރިކާގެ މިސައިލަކުން ކަމަށް ބެލެވޭ ކަމަށް ބުނެފައެވެ.

މި ހާދިސާއާ ގުޅޭގޮތުން އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.

ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫ.ކޭ.އެމް.ޓީ.އޯ) އިން ބުނި ގޮތުގައި، ޕަލާއޫގެ ދިދަ ޖަހާފައިވާ ކެމިކަލް އަދި ތެޔޮ އުފުލާ މި ޓޭންކަރުގެ އިންޖީނު ރޫމުގައި އަލިފާން ރޯވެފައިވަނީ އޮމާންގެ ސޮހާރު ބަނދަރުގެ އިރުއުތުރުން 20 ނޯޓިކަލް މައިލް ބޭރުންނެވެ.

ބްރިޓިޝް މެރިޓައިމް ރިސްކް މެނޭޖްމަންޓް ގްރޫޕް "ވެންގާޑް" އިން ބުނި ގޮތުގައި ހަމަލާ އަމާޒުވި އުޅަނދަކީ "ސެޓެބެލޯ" އެވެ. އަދި އެ އުޅަނދުން އެހީއަށް އެދި ފޮނުވި ސިގްނަލަށް އޮމާންގެ ކަނޑުގެ ސިފައިން އިޖާބަދީފައިވާ ކަމަށްވެސް އެ ގްރޫޕުން ބުނެފައިވެއެވެ.

މެރިން ޓްރެފިކް ޝިޕް-ޓްރެކިންގ ޕްލެޓްފޯމުން ދައްކާ ގޮތުގައި، މުދާ ބަރުކޮށްފައިވާ މި ޓޭންކަރު އެންމެ ފަހުން ފެނިފައިވަނީ ޖޫން މަހުގެ 1 ވަނަ ދުވަހު އޮމާންގެ އައްސޭރިފަށުންނެވެ.

ދުނިޔޭގެ ތެލާއި ގޭސް އުފުލާ މައިގަނޑު މަގު ކަމަށްވާ ހުރްމޫޒް ކަނޑުއޮޅިން ދަތުރުކުރާ އުޅަނދުތަކަށް އީރާނުން ހުރަސްއަޅަން ފެށުމާ ގުޅިގެން، އީރާނާ ގުޅުންހުރި އުޅަނދުތައް ހުއްޓުވުމުގެ މަސައްކަތް އެމެރިކާއިން ފަށާފައިވަނީ އޭޕްރިލް މަހުގެ 13 ވަނަ ދުވަހުއެވެ.

އެމެރިކާގެ ސެންޓްރަލް ކޮމާންޑުން ބުނި ގޮތުގައި، ޖޫން މަހުގެ 8 ވަނަ ދުވަހާ ހަމައަށް އެމެރިކާގެ ސިފައިން ވަނީ އުސޫލުތަކާ ޚިލާފުވި 7 އުޅަނދެއްގެ ދަތުރު ހުއްޓުވައި، 134 އުޅަނދެއްގެ މިސްރާބު ބަދަލުކުރުވައި، އަދި އިންސާނީ އެހީ ފޯރުކޮށްދޭ 42 އުޅަނދަކަށް ދަތުރުކުރުމުގެ ހުއްދަ ދީފައެވެ.

މި އޮޕަރޭޝަންތަކުގެ ތެރޭގައި މިހާތަނަށް އެއްވެސް މީހަކު މަރުވި ކަމުގެ ރިޕޯޓެއް ލިބިފައެއް ނުވެއެވެ.

އެމެރިކާގެ އަސްކަރިއްޔާއިން ބުނި ގޮތުގައި، އީރާނާ ދެކޮޅަށް އަޅާފައިވާ ފިޔަވަޅުތަކާ ޚިލާފަށް އީރާނުގެ ބަނދަރަކަށް ދަތުރުކުރަން އުޅުނު "މެރިވެކްސް" ނަމަކަށް ކިޔާ ހުސް ތެޔޮ ޓޭންކަރެއްގެ ދަތުރު، ހޯމަ ދުވަހު އޮމާން ކަނޑުގެ ސަރަހައްދުން އެމެރިކާ ސިފައިން ވަނީ ހުއްޓުވާފައެވެ.

އެމެރިކާއިން އަމާޒުކުރާ އުޅަނދުތަކުގެ ތެރޭގައި އީރާނުގެ އުޅަނދުތަކުގެ އިތުރުން، "ޝެޑޯ ފްލީޓް" ގެ ގޮތުގައި ބެލެވޭ އުޅަނދުތައް ހިމެނެއެވެ. މިއީ އާންމުކޮށް ހުޅަނގުގެ އިންޝުއަރެންސް ނެތް، ބާވެފައިވާ އުޅަނދުތަކެކެވެ. މި އުޅަނދުތައް ބޭނުންކުރަނީ އަސްލު ވެރިފަރާތާއި، އުފުލާ މުދަލާއި، ދަތުރުކުރާ މިސްރާބު އޮޅުވާލުމަށްޓަކައި އެކި ގައުމުތަކުގެ ދިދަ ބޭނުންކޮށްގެން، ދަތިކުރުމުގެ ފިޔަވަޅު އަޅާފައިވާ ތެޔޮ އުފުލުމަށެވެ.