ޚާމަނާއީ ފަސްދާނުލުމުގެ ތާވަލު އިއުލާނުކޮށްފި

އީރާނުގެ އިސްލާމީ އިންގިލާބުގެ ޝަހީދުވި ލީޑަރުގެ މަސައްކަތްޕުޅުތައް ރައްކާތެރިކޮށް ދެމެހެއްޓުމުގެ މަސްއޫލިއްޔަތު އުފުލާ އޮފީހުން، އާޔަތުﷲ ސައްޔިދު އަލީ ޚާމަނާއީގެ މައްޗަށް ކުރެވޭ ކަށުނަމާދުގެ އިތުރުން ފަސްދާނުލުމުގެ ރަސްމިއްޔާތުތައް ކުރިއަށްދާނެ ތާވަލު އިއުލާނުކޮށްފިއެވެ.

އެ އޮފީހުން ނެރުނު ބަޔާނެއްގައި ބުނެފައިވާ ގޮތުގައި، ޝަހީދުވި ލީޑަރުގެ ހަށިކޮޅަށް އެންމެ ފަހުގެ އިހުތިރާމް އަދާކުރުމުގެ ވަދާއީ ރަސްމިއްޔާތު އޮންނާނީ ޖުލައި މަހުގެ 4 އާއި 5 ގައެވެ. މިއީ ހިޖުރީ ގޮތުން މުހައްރަމް މަހުގެ 19 އާއި 20 ވަނަ ދުވަހެވެ. މި ރަސްމިއްޔާތުތައް ބޭއްވުމަށް ހަމަޖެހިފައިވަނީ ތެހެރާންގެ އިމާމް ޚުމައިނީ މިސްކިތުގައެވެ.

ޖުލައި މަހުގެ 6 ވަނަ ދުވަހު ތެހެރާންގައި ޖަނާޒާގެ ހިނގާލުމެއް ބޭއްވުމަށް ތާވަލުކޮށްފައިވާއިރު، ޖުލައި 7 ވަނަ ދުވަހު މުގައްދަސް ރަށެއް ކަމަށްވާ ގުމްގައި ވެސް ހިނގާލުމެއް ބޭއްވުމަށް ވަނީ ހަމަޖެހިފައެވެ.

ކަށުނަމާދު ޖުލައި މަހުގެ 9 ވަނަ ދުވަހު މުގައްދަސް ރަށެއް ކަމަށްވާ މަޝްހަދުގައި ބޭއްވުމަށް ވަނީ ނިންމާފައެވެ.  އެ އޮފީހުގެ ބަޔާނުގައިވާ ގޮތުން، ޝަހީދުވި ލީޑަރު ފަސްދާނުލުމަށް ހަމަޖެހިފައިވަނީ އިމާމް ރިޒާ ގެ ރައުޟާ ގައެވެ.

މި ރަސްމިއްޔާތުތަކުގައި ބައިވެރިވެ، ޝަހީދުވި ލީޑަރަށް އަލްވަދާއު ކިޔުމަށްޓަކައި "އިއްޒަތްތެރި އަދި ލޮބުވެތި އެންމެހާ ރައްޔިތުންނަށާއި، ދުނިޔޭގެ މިނިވަންކަމަށް ލޯބިކުރާ ފަރާތްތަކަށާއި، އިސްލާމީ ފިކުރުގެ އަހުލުވެރިންގެ އިތުރުން އީރާނަށް ތާއީދުކުރާ އެންމެހާ ފަރާތްތަކަށް" އިންތިޒާމުކުރާ ފަރާތްތަކުން ވަނީ ދައުވަތު ދީފައެވެ.

މި ރަސްމިއްޔާތުތަކާ ގުޅޭ އިތުރު ތަފުސީލުތައް ފަހުން އިއުލާނުކުރާނެ ކަމަށް ވެސް އެ އޮފީހުން ބުނެފައިވެއެވެ.