އެމެރިކާ ވިސާގެ މައްސަލަ ކުރިމަތިވެފައިވާ އީރާނުގެ ފުޓްބޯޅަ ޓީމު މެކްސިކޯއަށް ހިނގައްޖެ

އެމެރިކާގައި ބޭއްވުމަށް ހަމަޖެހިފައިވާ ވޯލްޑް ކަޕްގެ ތިން މެޗެއް ކުޅުމަށްޓަކައި، އީރާނުގެ ގައުމީ ފުޓްބޯޅަ ޓީމު އާދީއްތަ ދުވަހުގެ ހެނދުނުގެ ވަގުތެއްގައި މެކްސިކޯގެ ޓިހުއާނާއަށް ގޮސްފިއެވެ. މި ދަތުރު މިދިމާވީ ދުނިޔޭގެ އެންމެ ބޮޑު ކުޅިވަރު ހަރަކާތް، ސިޔާސީ ގޮތުން ހިޔާލުތަފާތުވުން އުފެދިފައިވާ ދެ ގައުމުގެ މެދުގައި ނުފޫޒު ގަދަކުރުމުގެ ކުރިމަތިލުމަކަށް ބަދަލުވެފައިވާ ދަނޑިވަޅެއްގައެވެ.

ވޭތުވެދިޔަ ތިން ހަފުތާގައި ތުރުކީވިލާތުގައި ތަމްރީނުތައް ފުރިހަމަކުރުމަށްފަހު، އީރާނުގެ ޓީމު މެކްސިކޯގެ މި ސިޓީއަށް އައިސްފައިވަނީ އާދިއްތަ ދުވަހުއެވެ. ޓިހުއާނާއަކީ އެމެރިކާގެ ސެން ޑިއޭގޯއާ ބޯޑަރު ހިއްސާކުރާ، ބޯޑަރުގެ އަނެއް ފަރާތުގައި އޮންނަ ސިޓީއެކެވެ.

އީރާނުގެ ފުޓްބޯޅަ ފެޑެރޭޝަނުން އެންމެ ފަހު ވަގުތު ޓީމުގެ ބޭސް ކޭމްޕް އެމެރިކާގެ އެރިޒޯނާއިން މެކްސިކޯއަށް ބަދަލުކުރަން ނިންމީ، އެމެރިކާއަށް އެތެރެވުމަށް ބޭނުންވާ ވިސާ ލިބޭނެކަމުގެ ޔަގީންކަން ނެތުމުގެ ސަބަބުންނެވެ.

އީރާނުގެ ފުރަތަމަ މެޗު ފެށުމަށް އެންމެ 10 ދުވަހަށް ވެފައި ވަނިކޮށް، މިދިޔަ ހުކުރު ދުވަހު އެމެރިކާއިން ވަނީ ޓީމުގެ ހުރިހާ ކުޅުންތެރިންނަށް ވިސާ ދޫކޮށްފައެވެ. ނަމަވެސް، އީރާނުގެ ފުޓްބޯޅަ ފެޑެރޭޝަނުން ބުނި ގޮތުގައި ޓީމުގެ ސަޕޯޓް ސްޓާފުންގެ ތެރެއިން ބައެއް މެންބަރުންނަށް ވިސާ ދީފައެއް ނުވެއެވެ. މީގެ ތެރޭގައި މެނޭޖްމަންޓާއި އިދާރީ ދާއިރާގެ މުހިންމު އިސް ފަރާތްތައް ހިމެނެއެވެ.

މުބާރާތުގެ ގްރޫޕް 'ޖީ' ގައި ހިމެނޭ އީރާނުގެ ފުރަތަމަ ދެ މެޗު ކުޅުމަށް ހަމަޖެހިފައިވަނީ ލޮސް އެންޖެލިސް ކައިރީގައެވެ. އެގޮތުން ޖޫން 15 ވަނަ ދުވަހު ނިއުޒީލެންޑާ ދެކޮޅަށް ކުޅުމަށްފަހު، ޖޫން 21 ވަނަ ދުވަހު ބެލްޖިއަމާ ދެކޮޅަށް އެ ޓީމު ނުކުންނާނެއެވެ. އަދި އީރާނުގެ ފަހު މެޗުގައި ޖޫން 26 ވަނަ ދުވަހު ސިއެޓްލްގައި ބައްދަލުކުރާނީ މިސްރާއެވެ.