ދައުލަތައް ހުސްވި އަހަރުގެ އޭޕްރީލް މަހު ލިބުނު އާމްދަނީ އަށް ވުރެ މިއަހަރު ލިބުނުވަރު ދަށްވެއްޖެ

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް 2026 ވަނަ އަހަރުގެ އޭޕްރީލް މަހު އާމްދަނީގެ ގޮތުގައި ޖުމްލަ 2.63 ބިލިއަން ރުފިޔާ ލިބިއްޖެއެވެ. މިއީ 2026 ވަނަ އަހަރުގެ އޭޕްރީލް މަހަށް އަންދާޒާކުރި އާމްދަނީއަށްވުރެ 16.6 އިންސައްތަ އިތުރު އަދަދެކެވެ. ނަމަވެސް، މިއީ މިދިޔަ އަހަރުގެ އޭޕްރީލް މަހު ލިބުނު އާމްދަނީއާ އަޅާބަލާއިރު 0.3 އިންސައްތަ ދަށް އަދަދެކެވެ.

މީރާ އިން ހާމަ ކޮށްފައިވާ ގޮތުގައި އަންދާޒާކުރި މިންވަރަށްވުރެ އާމްދަނީ އިތުރުވި މައިގަނޑު ސަބަބުތަކަކީ ފަތުރުވެރިކަމުގެ ބޭނުމަށް ދޫކޮށްފައިވާ ބިންތަކުގެ ކުއްޔާއި، ޖީ.އެސް.ޓީ އަދި ވޯކް ޕާމިޓް ފީގެ ގޮތުގައި ލިބުނު އާމްދަނީ އިތުރުވުމެވެ. މީރާއިން ހާމަކޮށްފައިވާ ގޮތުގައި 2026 ވަނަ އަހަރުގެ އޭޕްރީލް މަހު ލިބުނު އާމްދަނީގެ 32.6 އިންސައްތައަކީ މުއްދަތު ހަމަވެފައިވާ ފައިސާގެ ގޮތުގައި ލިބުނު އާމްދަނީއެވެ. އަދި 14.2 އިންސައްތަ އާމްދަނީއަކީ ނުލިބި ހުރި ފައިސާ ހޯދުމަށް ކުރި މަސައްކަތުން ލިބުނު އާމްދަނީއެވެ. ދުނިޔޭގެ އެކި ސަރަހައްދުތަކުގައި ހިނގަމުންދާ ހަނގުރާމަތަކާ ގުޅިގެން ރާއްޖެއަށް ޒިޔާރަތްކުރި ފަތުރުވެރިންގެ އަދަދު މަދުވުމުން، ޖީ.އެސް.ޓީގެ ގޮތުގައި ލިބޭ އާމްދަނީ ދަށްވާނެ ކަމަށް ބެލެވުނެވެ. އެހެންކަމުން، ފަތުރުވެރިން ޒިޔާރަތްކުރާނެ ކަމަށް ކުރިން ލަފާކުރި އަދަދުތައް ވަނީ ދަށްކޮށް މުރާޖައާކޮށްފައެވެ.

މީރާއިން ބުނި ގޮތުގައި 2025 ވަނަ އަހަރުގެ އޭޕްރީލް މަހާ އަޅާބަލާއިރު 2026 ވަނަ އަހަރުގެ އޭޕްރީލް މަހު އާމްދަނީ ދަށްވީ މައިގަނޑު ގޮތެއްގައި ފަތުރުވެރިކަމުގެ ދާއިރާގެ ޖީ.އެސް.ޓީ، ގްރީން ޓެކްސް، އެއާޕޯޓް ޓެކްސް އަދި ފީތަކުން ލިބުނު އާމްދަނީ މަދުވުމުންނެވެ. 2025 ވަނަ އަހަރުގެ އޭޕްރީލް މަހާ އަޅާބަލާއިރު 2026 ވަނަ އަހަރުގެ އޭޕްރީލް މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު 19.8 އިންސައްތަ ދަށްވެފައިވުމަކީ ފަތުރުވެރިކަމާ ގުޅުންހުރި އާމްދަނީ ދަށްވުމަށް ދިމާވި ސަބަބެކެވެ. މީގެ އިތުރުން، ކޯޕަރޭޓް ސޯޝަލް ރެސްޕޮންސިބިލިޓީ (ސީ.އެސް.އާރު) ފީގެ ގޮތުގައި ލިބުނު އާމްދަނީ ވެސް މިދިޔަ އަހަރާ އަޅާބަލާއިރު ވަނީ ދަށްވެފައެވެ.

ނުލިބި ހުރި ފައިސާ ހޯދުމަށް ކުރި މަސައްކަތުން 2026 ވަނަ އަހަރުގެ އޭޕްރީލް މަހު މީރާއިން ވަނީ ޖުމްލަ 543 މިލިއަން ރުފިޔާ ހޯދާފައިވާ ކަމަށް މީރާ އިން ބުނެފައިވެއެވެ. މީގެ ތެރޭގައި ނޯޓިސް ފޮނުވައިގެން ހޯދި 372 މިލިއަން ރުފިޔާއާއި، ދަރަނި ސާފުކުރުމުގެ ތެރެއިން ލިބުނު 96 މިލިއަން ރުފިޔާއާއި، ފައިސާ ބަހާލައިގެން ދެއްކުމުގެ އެއްބަސްވުންތަކުން ލިބުނު 64 މިލިއަން ރުފިޔާ ހިމެނެއެވެ. މީގެ އިތުރުން، ފައިސާ ދައްކަންޖެހޭ ފަރާތްތަކަށް ފޯނުން ގުޅައިގެން 5 މިލިއަން ރުފިޔާ އަދި އެހެނިހެން ފިޔަވަޅުތައް އަޅައިގެން 4 މިލިއަން ރުފިޔާ ވަނީ ހޯދާފައެވެ.

2026 ވަނަ އަހަރުގެ އޭޕްރީލް މަހު ލިބުނު އާމްދަނީގެ އެންމެ ބޮޑު ބައެއް ހިއްސާކުރަނީ ޖީ.އެސް.ޓީއެވެ. އެއީ ޖުމްލަ އާމްދަނީގެ 63.6 އިންސައްތަ ނުވަތަ 1.7 ބިލިއަން ރުފިޔާއެވެ. ދެވަނައަށް އެންމެ ބޮޑު އާމްދަނީއެއް ލިބުނީ ގްރީން ޓެކްސްއިންނެވެ. އެއީ 185 މިލިއަން ރުފިޔާ ނުވަތަ 7.1 އިންސައްތައެވެ. މީގެ އިތުރުން، އާމްދަނީން ނަގާ ޓެކްސްގެ ގޮތުގައި 178 މިލިއަން ރުފިޔާ (6.8 އިންސައްތަ)، އެއާޕޯޓް ޑިވެލޮޕްމަންޓް ފީގެ ގޮތުގައި 152 މިލިއަން ރުފިޔާ (5.8 އިންސައްތަ)، ޑިޕާޗާ ޓެކްސްގެ ގޮތުގައި 152 މިލިއަން ރުފިޔާ (5.8 އިންސައްތަ) އަދި ރިސޯޓް ކުލީގެ ގޮތުގައި 129 މިލިއަން ރުފިޔާ (4.9 އިންސައްތަ) ވަނީ ލިބިފައެވެ. 2026 ވަނަ އަހަރުގެ އޭޕްރީލް މަހު ލިބުނު ޖުމްލަ އާމްދަނީގެ ތެރޭގައި 121 މިލިއަން އެމެރިކާ ޑޮލަރު ހިމެނެއެވެ.