ފަތުރުވެރިކަމަށް ލިބެމުންދާ ގެއްލުން-ނުބީހެންޏާ ކަނޑާއި ހަމަ؟
22 މެއި 2026 | ހުކުރު 13:49ފަތުރުވެރިކަމުގެ ސިނާއަތަށް 500 މިލިއަން ޑޮލަރުގެ ގެއްލުމެއް ވެދާނެތީ މަޓާޓޯ އާއި ގެސްޓްހައުސް އެސޯސިއޭޝަނުން ކަންބޮޑުވުން ފާޅުކުރި ނަމަވެސް، އެ އަދަދުތަކަކީ ސަރުކާރުން ބަލައިގަންނަ ހިސާބުތަކެއް ނޫން ކަމަށް ޓުއަރިޒަމް މިނިސްޓަރު މުހައްމަދު އަމީން ވިދާޅުވި.
ވިލާ ޕާކް މޯލްޑިވްސް ގައި ފަތުރުވެރިންތަކެއް ބައިސްކަލު ދުއްވަނީ | ވިޒިޓް މޯލްޑިވްސް
ދިވެހި މުސްކުޅި ބަހެއްގައި އޮވެ އެވެ. ނުބީހެންޏާ ކަނޑާ ހަމައެވެ. މިހެން ބުނެ އުޅެނީ ދޯނި އެއްވެސް ތަނަކު ނުބީހެއްޏާ، އެ ދޯނި އެ އޮތީކަނޑުގައި އޮންނަ އިރު އޮންނާނޭ ގޮތަށް ކަމަށް ބުނުމުގެ ގޮތުންނެވެ. މި ބަސް ބުނެ އުޅެނީ އެއީ ފަޅެއްގައި އޮތަސް ނޫނީ ފަޅެއްގައި އޮތަސް ނުބީހޭ ކަމުގައި ވަނީނަމަ، އެ ދޯނި ކަނޑުގައި އޮތުމާއި، އޮޑިއަށް ވާނީ ހަމަ އެއްވަރެއް ކމަށް ބުނުމަށް ބުނާ ބަހެކެވެ.
ދިވެހިން މި ބަސް ބޭނުންކޮށް އުޅެނީ ކަމެއް ވުން ކިތަންމެ ގާތްވެފައި، އެކަމެއް ނުވެ ދިޔުމުން، އެކަމާ މެދު ފަރުވާލެއް ނެތްކަން ހާމަކޮށްދޭ މާނައެވެ. މިއީ ރާއްޖޭގެ އިގްތިސާދާއި މެދު ސަރުކާރުން އަމަލުކުރާ މޭރުމެވެ. ޚާއްސަކޮށް ފަތުރުވެރިކަމާއި މެދުގަ އެވެ.
ފަތުރުވެރިކަމުގެ ދާއިރާ ރަތް ރަނގަބީލު އަޅާ އިރު ސަރުކާރަށް ވަރިހަމަ އެވެ. އެ ދާއިރާގެ ވަޒީފާތައް ގެއްލެމުން ދާ އިރު މާބޮޑު ކަމަކަށް ނުހަދަ އެވެ. އަދި ހޮޓެލްތަކާއި ރިސޯޓްތައް ރެއަކަށް ދޫކުރާ ނިސްބަތް އިންތިހާ އަށް ދަށް ވާ އިރު އެކަން އެއީ ނުވާކަމަކަށް ހަދައިގެން ސަރުކާރުން ތިބީ އެކަން ވަންހަނާކޮށް ސިއްރުކޮށްގެންނެވެ.
ފަތުރުވެރިކަމުގެ ސިނާއަތުގެ ހަގީގީ ހާލަތު ރައްޔިތުންނާއި ބައިނަލްއަގްވާމީ ފަރާތްތަކުން ފޮރުވަމުން ސަރުކާރުން ދަނީ ފަހަރުގައި ލިބިދާނެ ހުތުރު ނަމަކަށް ވިސްނާފައި ކަމަށް ވެދާނެ އެވެ. އެކަމަކު ދާއިރާގެ އާރުކާޓީ އިން ސަލާމަތަށް އެދި އާދޭސްކުރަނީ އެވެ.
ފަތުރުވެރިކަމުގެ ސިނާއަތަށް 500 މިލިއަން އެމެރިކާ ޑޮލަރުގެ ގެއްލުމެއް ވެދާނެތީ ސަރުކާރުގެ އެހީއަށް ޖަމިއްޔާ ޖަމާއަތްތަކުން އެދުނެވެ. އެ އަޑު ވެސް ސަރުކާރަކަށް ނީވުނެވެ. އެ އަދަދާއި ގުޅުވައިގެން ސީދާ އެހީތެރިކަމެއް ދިނުމަށް ވިސްނާފައި ނެތް ކަމަށް ޓުއަރިޒަމް މިނިސްޓަރު މުހައްމަދު އަމީން ސާފުކޮށް ވިދާޅުވި އެވެ.
ތަފާސްހިސާބަށް ބެލިޔަސް ސަރުކާރުގެ ލަވަޔާއި ނަމްބަރުތަކާއި ދިމަ އެއް ނުވެ އެވެ. ތަފާސްހިސާބުތަކުން ދައްކާގޮތުގައި 2026 ވަނަ އަހަރުގެ މާޗް އަދި އޭޕްރީލް މަހު ރާއްޖެއަށް އައި ފަތުރުވެރިންގެ އަދަދު ވަނީ ވަރަށް ބޮޑަށް ދަށްވެފައެވެ. އަދި މެއި މަހުގެ ތެރޭގައިވެސް މި ހީނަރުކަން ދެމިއޮތްއިރު، ރާއްޖެއަށް އެންމެ ގިނައިން ފަތުރުވެރިން އަންނަ މާކެޓްތަކުގެ ކުރިމަގުގެ ބުކިންތައްވެސް ހުރީ ވަރަށް ދަށްކޮށެވެ.
މީގެ ސަބަބުން ރާއްޖޭގެ ބޭރު ފައިސާގެ ރިޒާވްއަށާއި، ވަޒީފާތަކުގެ އިތުރުން މުޅި ގައުމީ އިގްތިސާދުގެ ހަމަޖެހުމަށް ބޮޑު ނުރައްކާތަކެއް ކުރިމަތިވަމުންދާކަން އެ ޖަމިއްޔާތަކުން ފާހަގަކުރެއެވެ. ނަމަވެސް ސަރުކާރުން މި ކަންކަމުގެ ސީރިއަސްކަން ގަބޫލުކުރުމުގެ ބަދަލުގައި، ސިނާއަތުގެ ފަރާތްތަކުން ދެމުންދާ އަދަދުތައް ދޮގުކޮށް، ހަގީގީ ހާލަތު ފޮރުވަމުން ދަނީ ކަމަށް ސިނާއަތުގެ ތެރޭގައި ހަރަކާތްތެރިވާ ފަރާތްތަކުން ބުނެއެވެ. ތެޅިގަންނާނީ މުޅި އޮޑި ފަރަށް އެރީމަ ނޫނީ ތަނަކަށް ބީއްސާލީމަތޯ އެވ؟. ފަތުރުވެރިކަމުގެ ދޮރާށި ބަންދު ނުވަނީސް ދާއިރާ ނުރަކައްލަށް ހުށަހެޅޭކަން ގަބޫލު ނުކުރެވެނީބާ އެވެ؟
