ފަތުރުވެރިކަމުގެ ވިޔަފާރި ކުރިއަށް އޮތް ކުއަޓަރުގައި ފެންނަނީ ނާއުއްމީދީ ގޮތެއްގައި: އެމްއެމްއޭ

އަހަރުގެ ކުރިއަށް އޮތް ތަނަށް ބަލާއިރު، 2026 ވަނަ އަހަރުގެ ދެވަނަ ކުއާޓަރުގައި ފަތުރުވެރިކަމުގެ ދާއިރާގެ ވިޔަފާރިތަކުގެ ހަރަކާތްތައް ކުރިއަށްދާނެ ގޮތުގެ ތަަސައްވަރު ނުވަތަ އައުޓްލުކް ފެންނަނީ ނާއުއްމީދީ ގޮތެއްގައި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަ ކޮށްފި އެވެ.

އެމްއެމްއޭ އިން ޝާއިއުކޮށްފައިވާ ކުއަޓާލީ ބިޒްނަސް ސާވޭ ގައި އިތުރަށް ފާހަގަކޮށްފައިވާ ގޮތުގައި ފަތުރުވެރިކަމުގެ ދާއިރާގެ މުހިންމު އިންޑެކްސްތައް ވަނީ ނެގެޓިވްވެފައެވެ. އެގޮތުން، 2026 ވަނަ އަހަރުގެ ފުރަތަމަ ކުއާޓަރުގައި ލިބޭނެ ކަމަށް ލަފާކުރާ ޖުމްލަ އާމްދަނީގެ އިންޑެކްސް 171 ޕޮއިންޓް ދަށަށް ގޮސް މައިނަސް 90 އަށް ވެއްޓިފައިވާއިރު، ރިސޯޓް ބުކިންގްސް އިންޑެކްސް ވަނީ 160 ޕޮއިންޓް ދަށަށް ގޮސް މައިނަސް 78 އަށް ތިރިވެފައެވެ.

ވިޔަފާރި ހިންގުމަށް ހިނގާ ޚަރަދުތައް ނުވަތަ އިންޕުޓް ޕްރައިސް އިންޑެކްސް 30 ޕޮއިންޓް ދަށަށް ގޮސް 30 ގައި ހުރިއިރު، ކޮޓަރިތަކުގެ އެވްރެޖް ރޭޓް ހުންނާނެ ކަމަށް ލަފާކުރާ އިންޑެކްސް ވަނީ 152 ޕޮއިންޓްގެ ބޮޑު ދަށްވުމަކާއެކު މައިނަސް 90 އަށް ވެއްޓިފައެވެ. މީގެ އިތުރުން، މުވައްޒަފުންގެ މުސާރައާއި މަސައްކަތްތެރިންނަށް ހިނގާ އެހެނިހެން ޚަރަދުތަކުގެ އިންޑެކްސް ވެސް ވަނީ 2026 ވަނަ އަހަރުގެ ފުރަތަމަ ކުއާޓަރުގައި 65 ޕޮއިންޓް ދަށަށް ގޮސް މައިނަސް 9 އަށް ތިރިވެފައެވެ.

މުޅި ވިޔަފާރީގެ ހާލަތާއި މާލީ ހާލަތަށް ބަލާއިރު، 2026 ވަނަ އަހަރުގެ ފުރަތަމަ ކުއާޓަރުގައި މި ދެ ދާއިރާގެ އިންޑެކްސްތައް ވެސް ވަނީ ނެގެޓިވްވެ، ހާލަތު އިތުރަށް ގޯސްވެފައެވެ. އެގޮތުން ވިޔަފާރީގެ ޖުމްލަ ހާލަތު އަންގައިދޭ އިންޑެކްސް 75 އިން -80 އަށް ދަށަށް ގޮސްފައިވާއިރު، ކުންފުނިތަކުގެ މާލީ ހާލަތު އަންގައިދޭ އިންޑެކްސް ވަނީ 66 އިން މައިނަސް 67 އަށް ވެއްޓިފައެވެ.