ރާއްޖޭގެ ޓުއަރިޒަމް އަށް ބަރަކަށް ފަހު ބަރެއް ވެއްޓެމުން ގޮސް މިހާރު އޮތީ އެންމެ ފުލުގައި: ޝާޒް
ދުނިޔޭގެ މަސްރަހަށް އަންނަ ބަދަލުތަކާއެކު ރާއްޖޭގެ ފަތުރުވެރިކަން ވަރަށް ބޮޑަށް ދަށަށް ގޮސްފައިވާއިރު، މި ސިނާއަތް ކުރިއެރުވުމަށް ސަރުކާރުން އެކަށީގެންވާ މަސައްކަތްތަކެއް ނުކުރާކަމުގެ ކަންބޮޑުވުން ދާއިރާގެ ތަޖުރިބާކާރުން ދަނީ ފާޅުކުރަމުން.
މަޓާޓޯގެ ނައިބު ރައީސް ޝާޒް ވަލީދު ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަނީ 20.05.2026 | ސްކްރީން އިމޭޖް
ރާއްޖޭގެ ޓުއަރިޒަމް އަށް ބަރަކަށް ފަހު ބަރެއް ވެއްޓެމުން ގޮސް މިހާރު އޮތީ އެންމެ ފުލުގައި ކަމަށް ރިސޯޓް ލައިފް މޯލްޑިވްސްގެ ވެރިޔާ އަދި މަޓާޓޯގެ ނައިބު ރައީސް ޝާޒް ވަލީދު ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
މުޅި ދުނިޔެ އަށް މެދުއިރުމަތީގެ ހަނގުރާމައިގެ އަސަރު ކުރާ އިރު އެ ކަމުގެ އެންމެ ބޮޑު އަސަރެއް ކުރާ އެއް ސިނާއަތަކީ ފަތުރުވެރިކަން ކަމަށް އޭނާ ވިދާޅުވި އެވެ. ސަރަހައްދުގެ އެހެން ގައުމުތަކާއި އަޅާ ކިޔާ ނަމަ ރާއްޖޭގެ ބައެއް ހޮޓެލްތައް 22 ޑޮލަރަށް ވިއްކާ ހިސާބަށް ހާލަތު ގޯސްވެފައިވާ ކަމަށް އޭނާ ވަނީ ފާހަގަކުރައްވާފަ އެވެ. ނަމަވެސް އެއިން އެެއްވެސް ކަމަކަށް ސަމާލުކަން ސަރުކާރުން ދެމުން ނުދާ ކަމަށް ޝާޒް ވިދާޅުވި އެވެ.
"މި ބޭފުޅުން އަޅުގަނޑަކަށް ހިއެއް ނުވޭ އެއްވެސް ކަމެއް ކުރާހެންނެއް. ފަތުރުވެރިކަން ފުނޑިގެން މި ދަނީ. ދެން އިތުރުފުޅުހައްދަވައިގެންނެއް އަޅުގަނޑުމެންނަކަށް މީގެ ތެރެއަކު ކެތްކޮށްގެނެއް ނުތިބެވޭނެ. މިކަން ރަނގަޅު ކުރަން މަސައްކަތް ކުރަން އެބަ ޖެހޭ." ޝާޒް ވިދާޅުވި އެވެ.
ޝާޒް ވިދާޅުވީ އަހަރު ފެށުނު އިރު ފަތުރުވެރިކަމުގެ ދާއިރާ އަށް ލިބުނު 20%ގެ ކުރިއެރުން މިހާރު ވަރަށް ބޮޑަށް ފަހަތަށް ސޮއްސާލާފައިވާ ކަމަށެވެ. އަދި މިހާރު ރިސޯޓްތަކަށް ގޮތް ހުސްވެގެން ރިސޯޓްތަކުގެ އަގު ވަރަށް ބޮޑަށް ދަށް ކުރަމުންދާ ކަމަށް ޝާޒް ވަނީ ފާހަގަކުރައްވާފަ އެވެ. ދައުލަތަށް އެކަމުގެ ހިސާބުތައް ސާފުކޮށް އެނގެން އޮތް އިތު ކަންކަން އޮޅުވާލާ ސަބަބާއި މެދު އޭނާ ވަނީ ސުވާލު އުފައްދަވާފަ އެވެ.
ރާއްޖޭގެ ފަތުރުވެރިކަން ދަށަށް ދާ ވަރަށް ގައުމުގެ އިގްތިސާދު ދަށް ވެގެންދާނެ ކަމަށް ވެސް ޝާޒް ވަނީ ވިދާޅުވެފަ އެވެ. ފަތުރުވެރިން އަންނަ މިންވަރު މަދުވަމުންދާތީ، ދިވެހިރާއްޖޭގެ ފަތުރުވެރިކަމުގެ ސިނާއަތަށް ގާތްގަނޑަކަށް 500 މިލިއަން ޑޮލަރަށް ވުރެ ބޮޑު ގެއްލުމެއް ލިބޭނެ ކަމަށް ފަތުރުވެރިކަމުގެ ދާއިރާގައި މަސައްކަތް ކުރާ ޖަމިއްޔާ ޖަމާއަތްތަކުން ލަފާކުރެ އެވެ. އަދި އެކަމުގެ ސީރިއަސްކަން ހާމަކޮށް ސަރުކާރުގެ އެހީތެރިކަމަށް ވެސް އެ ޖަމިއްޔާ ޖަމާއަތްތަކުން އެދިފައިވެ އެވެ.
އެހެންނަމަވެސް އެ އަދަދުތަކާއި މެދު ސަރުކާރުން ވަނީ ސުވާލު އުފައްދާފަ އެވެ. ރާއްޖޭގެ ފަތުރުވެރިކަން މި ހިސާބަށް ދަށް ވުމުގެ ފަހަތުގައި ވެސް ވަނީ ސަރުކާރުގެ ސިޔާސަތެއް ނެތުމުގެ މައްސަލަ ކަމަށް ފަތުރުވެރިކަމުގެ ދާއިރާގައި އިސްކޮށް މަސައްކަތް ކުރާ ބައެއް ފަރާތްތަކުން ދަނީ ތުހުމަތު ކުރަމުންނެވެ.
