އީރާނުން ބުނީ އެމެރިކާއާ އެކު އަލުން ހަނގުރާމަ ފެށުމަކީ ނުވެ ނުދާނެ ކަމެއް ކަމަށް

އެމެރިކާއާއި އީރާނާ ދެމެދު ކުރިއަށްދާ މަޝްވަރާތައް ހުއްޓުމަކަށް އައިސްފައިވާ ކަމަށް ބެލެވޭ ދަނޑިވަޅެއްގައި، އެމެރިކާއާއެކު އަލުން ހަނގުރާމައެއް ފެށުމަކީ ނުވެ ނުދާނެ ކަމެއް ކަމަށް އީރާނު އަސްކަރިއްޔާގެ އިސް އޮފިސަރަކު އަންގާރަ ދުވަހު ވިދާޅުވެއްޖެއެވެ.

އީރާނުގެ މަރުކަޒީ އަސްކަރީ ކޮމާންޑް، ޚާތަމް އަލް-އަންބިޔާގެ ޑެޕިއުޓީ ހެޑް މުޙައްމަދު ޖަޢުފަރު އައްސަދީ ވިދާޅުވީ، އެމެރިކާއިން ބޭނުންވަނީ އީރާނުން ފުރިހަމައަށް އަމާންދިނުމަށް ކަމަށާއި، ނަމަވެސް އީރާނުގެ ރައްޔިތުން ދުވަހަކުވެސް އަމާން ނުދޭނެ ކަމަށެވެ. އަދި އަމާން ނުދޭ ނަމަ، ދެ ގައުމުގެ ދެމެދުގައި ހަނގުރާމައެއް ފެށުމަކީ ނުވެ ނުދާނެ ކަމެއް ކަމަށްވެސް އޭނާ ވިދާޅުވިއެވެ.

އަނެއްކޮޅުން، ދެ ގައުމުގެ ދެމެދުގައި އުފެދިފައިވާ ހަމަނުޖެހުންތައް ނިމުމަކަށް ގެނައުމަށް އެމެރިކާއިން ހުށަހަޅާފައިވާ އެއްބަސްވުމުގެ ފަހުގެ ދެލިކޮޕީއަށް އީރާނުން އަދި ވަކި ޖަވާބެއް ދީފައެއް ނުވެއެވެ. އީރާނުގެ މަޝްވަރާ ޓީމާ ގާތް ގުޅުމެއް އޮންނަ މަސްދަރަކުން އަންގާރަ ދުވަހު މެހެރު ނިއުސްއަށް މައުލޫމާތު ދެމުން ބުނީ، އެއްބަސްވުމުގެ ފަހުގެ މާއްދާތަކާ ގުޅޭގޮތުން ތެހެރާންގައި އަދިވެސް މަޝްވަރާތައް ކުރިއަށްދާ ކަމަށެވެ.

އެ މަސްދަރުން ހާމަކުރި ގޮތުގައި، އެމެރިކާއަކީ މީގެ ކުރިންވެސް އެއްބަސްވުންތަކާ ޚިލާފުވެފައިވާ ގައުމަކަށް ވެފައި، ދެ ގައުމުގެ ދެމެދުގައި އޮތް އިތުބާރު ގެއްލިފައިވާތީ، އީރާނުން އެމެރިކާގެ ހުށަހެޅުންތައް ދިރާސާކުރަމުންދަނީ ވަރަށް ބޮޑަށް ސަމާލުވެ ތިބެގެންނެވެ.

މީގެ ކުރިން ކުރެވިފައިވާ ތަޖުރިބާތަކަށް ބަލާއިރު، އީރާނުން ބޭނުންވަނީ މި އެއްބަސްވުމުގެ ސަބަބުން އެ ގައުމަށް ފެންނަން އޮތް، ހަގީގީ މަންފާތަކެއް ލިބިގެންދިއުމަށް ކަމަށްވެސް އެ މަސްދަރުން ބުނެފައިވެއެވެ.