ވޯލްޑް ކަޕްގެ އެންމެ މޮޅު ލަނޑަކީ، އާޖެންޓީނާ ކޮޅަށް ކޭޕް ވާޑްގެ ލޯޕޭސް ކަބްރާލް ޖެހި ލަނޑު!

އެމެރިކާ އާއި ކެނެޑާ އަދި މެކްސިކޯގައި ނިމުނު ފީފާ ވޯލްޑް ކަޕްގައި ޖެހި އެންމެ މޮޅު ލަނޑަކީ، އާޖެންޓީނާ ކޮޅަށް ކޭޕް ވާޑްގެ ޑިފެންޑަރު ސިޑްނީ ލޯޕޭސް ކަބްރާލް ޖެހި ލަނޑު ކަމަށް ހޮވިއްޖެ އެވެ. 

ފީފާގެ ޕްރެސް އޮފީހުން ވޯޓުލުމުގެ ނަތީޖާ ހާމަކޮށްފައިވާ ގޮތުން، އުމުރުން 23 އަހަރުގެ ލޯޕޭސް ކަބްރާލް އާޖެންޓީނާ ކޮޅަށް ޖެހި ލަނޑު ވަނީ އެންމެ މޮޅު ލަނޑުގެ ގޮތުގައި ހޮވިފައި އެވެ. އެއީ މުބާރާތުގެ ގަދަ 32 ވަނަ ބުރުގައި ކޭޕް ވާޑް އިން އާޖެންޓީނާއާ ދެކޮޅަށް ކުޅުނު މެޗުގައި އެވެ. 

ކޭޕް ވާޑްއާ ދެކޮޅަށް ކުޅުނު އެ މެޗު އާޖެންޓީނާ އިން ކާމިޔާބު ކޮށްފައި ވަނީ 3-2 އިންނެވެ. ކޭޕް ވާޑްގެ ފަރާތުން އާދަޔާ ޚިޔާލު ކުޅުމެއް އެ މެޗުގައި ފެނުނުއިރު، އާޖެންޓީނާ އަށް މެޗު ކާމިޔާބު ކުރެވުނީ އިތުރު ވަގުތުގެ ދެ ހާފުގައި ކުޅެގެންނެވެ. އެ މެޗުގައި ދެ ވަނަ ފަހަރަށް ކޭޕް ވާޑް އަށް ނަތީޖާ ހަމަހަމަ ކޮށްދިން ލަނޑު ލޯޕޭސް ކަބްރާލް ޖެހީ 103 ވަނަ މިނެޓުގައި އެވެ.

އެންމެ މޮޅު ލަނޑުތަކުގެ ތެރޭގައި ދެން ހިމެނުނު އަނެއް ދެ ލަނޑަކީ އުޒްބެކިސްތާންގެ ފޯވާޑް އެލްޑޯ ޝޮމުރޮޑޮވް ކޮންގޯއާ ދެކޮޅަށް ކުޅުނު މެޗުގައި ޖެހި ލަނޑާއި، ހައިޓީގެ ފޯވާޑު ވިލްސަން އިޒިޑޯ މޮރޮކޯއާ ދެކޮޅަށް ކުޅުނު މެޗުގައި ޖެހި ލަނޑެވެ. މިއީ މުބާރާތުގެ ތެރޭގައި ވަރަށް ގިނަ ބަޔަކަށް ސަމާލުކަން ލިބުނު ތިން ލަނޑެވެ. 

މުޅިން އަލަށް ވޯލްޑް ކަޕްގައި ވާދަ ކުރި ކޭޕް ވާޑް އިން ވަނީ މިފަހަރުގެ މުބާރާތުގައި ހައިރާން ކުރުވަނިވި ނަތީޖާތަކެއް ނެރެފައި އެވެ. މުބާރާތުގެ ފުރަތަމަ މެޗުގައި ކޭޕް ވާޑް އިން ވަނީ ސްޕެއިންއާ އެއްވަރުކޮށްފައި އެވެ. ދެ ވަނަ މެޗުގައި އުރުގުއޭއާ އެއްވަރުކޮށް، ފަހު މެޗުގައި ސައުދީ އަރަބިއްޔާއާ ވެސް އެއްވަރު ކުރި އެވެ. ގަދަ 32 ގައި އާޖެންޓީނާ އަތުން ބަލިވެ މުބާރާތުން ކެޓި ނަމަވެސް، ކޭޕް ވާޑްގެ ހިތްވަރަށް ގިނަ ބަޔަކު ތައުރީފު ވެސް ކުރި އެވެ.