"އެމްވީ ކްރައިސިސް" ހިންގަނީ ޝުމްބާ އެއް ނޫން: ސިވިލް ކޯޓް
އެމްވީ ކްރައިސިސް ޕޭޖުން ޢަބްދުﷲ މަޙްޒޫމް މާޖިދުގެ އަބުރާ ބެހުނު ކަމަށް ބުނެ އަޙްމަދު އަޝްރަފް (ޝުމްބާ) އާ ދެކޮޅަށް ކުރި ދަޢުވާ ސާބިތުނުވާ ކަމަށް ސިވިލް ކޯޓުން ވަނީ ޙުކުމްކޮށްފަ. މި މައްސަލައިގައި ކޯޓުން ނިންމީ އެ ޕޭޖަކީ ސީދާ އަޝްރަފް ހިންގާ ޕޭޖެއްކަން މަދަނީ މިންގަނޑުން ސާބިތުކޮށްދިނުމަށް ހުށަހެޅި ހެކިތައް ކާފީ ނޫން ކަމަށް. އެހެންކަމުން، ސޯޝަލް މީޑިއާ އެކައުންޓްތަކުގެ ވެރިފަރާތް ޔަޤީންކަމާއެކު ކަށަވަރުނުވާތީ، އަބުރުގެ ބަދަލު ނަގައިދެވެން ނެތް ކަމަށް ޤާޟީ ވަނީ ކަނޑައަޅުއްވާފަ.
"އެމްވީ ކްރައިސިސް" ހިންގާ ކަމަށް ގިނަ ބަޔަކު ބަޔަކު އަޙްމަދު އަޝްރަފް (ޝުމްބާ ގޮންގް) | ސޯޝަލް މީޑިއާ
"އެމްވީ ކްރައިސިސް" ގެ ނަމުގައި ހިންގާ ސޯޝަލް މީޑިއާ އެކައުންޓްތަކަކީ އަޙްމަދު އަޝްރަފް (ޝުމްބާ ގޮންގް) ހިންގާ އެކައުންޓްތަކެއްކަން ސާބިތުނުވާތީ، އޭނާގެ މައްޗަށް ކުރި އަބުރުގެ ދައުވާ ސާބިތުނުވާ ކަމަށް ސިވިލް ކޯޓުން ބުރާސްފަތި ދުވަހު ޙުކުމްކޮށްފި އެވެ.
މި މައްސަލައަކީ ޢަބްދުﷲ މަޙްޒޫމް މާޖިދުގެ ފޮޓޯ ބޭނުންކޮށްގެން، އޭނާއާ ބެހޭގޮތުން ދޮގު މަޢުލޫމާތު އެމްވީ ކްރައިސިސް ގައި ފެތުރި ކަމަށް ބުނެ، އަބުރުގެ ބަދަލު ހޯދުމަށް އަޙްމަދު އަޝްރަފްގެ މައްޗަށް އުފުލި ދަޢުވާއެކެވެ. މަޙްޒޫމްގެ ފަރާތުން ބުނެފައިވަނީ އެމްވީކްރައިސިސް އަކީ އަޝްރަފް ހިންގާ ޕޭޖެއް ކަމަށާއި، އެ ޕޭޖުން ކުރި ޕޯސްޓެއްގެ ސަބަބުން އޭނާގެ އަގުވެއްޓިފައިވާ ކަމަށެވެ.
ނަމަވެސް، މި މައްސަލައިގައި ޤާޟީ އަޙްމަދު ޢަބްދުލްމަތީން އިއްވި ޙުކުމުގައި ބުނެފައިވަނީ، އެމްވީކްރައިސިސް ޕޭޖަކީ ސީދާ އަޝްރަފް ހިންގާ ޕޭޖެއްކަން މަދަނީ މިންގަނޑުން ސާބިތުކޮށްދިނުމަށް ދަޢުވާކުރާ ފަރާތުން ހުށަހެޅި ހެކިތައް ކާފީ ނޫން ކަމަށެވެ.
ޙުކުމުގައި ފާހަގަކޮށްފައިވާ ގޮތުގައި، އަޝްރަފްގެ މީސްމީޑިއާ ހޭންޑްލް އެއް ކަމަށް ބުނާ ޝުމްބާގޮންގް އެކައުންޓަކީވެސް އޭނާއާ ގުޅުން އޮތް އެކައުންޓެއްކަން ސާބިތުކުރުމަށް ހުށަހެޅި ކަންކަމަކީ ޤާނޫނީ މިންގަނޑަށް ބަލާއިރު ބަލިކަށި ހެކިތަކެއް ކަމަށް ކޯޓުން ވަނީ ކަނޑައަޅާފަ އެވެ.
އަޝްރަފްގެ ޣައިރު ޙާޟިރުގައި ކުރި މި ޙުކުމުގައި ކަނޑައަޅާފައިވަނީ، އެމްވީކްރައިސިސް ހިންގަނީ އަޝްރަފްކަން ސާބިތުނުވާތީ، މަޙްޒޫމްގެ އަބުރާ ބެހުމުގެ ޢަމަލެއް އަޝްރަފް ކުރިކަން މި މައްސަލައިގައި ސާބިތުނުވާ ކަމަށެވެ. އެހެންކަމުން، އަބުރުގެ ބަދަލު ނަގައިދެވެން ނެތް ކަމަށް ކޯޓުން ވަނީ ނިންމާފަ އެވެ.
