ރެފަރެންޑަމް ގަރާރުގައި ހުރި މައްސަލައިގެ ޝަކުވާ ކުރާނެ ތަނެއް ކޯޓު ނޫނީ ނެތް، ‎ސިޔާސީ ގޮތުން ޖެއްސުން ކުރުމުގެ ބަދަލުގައި މައްސަލަ އަވަހަށް ރަޖިސްޓްރީ ކޮށް އަޑުއެހުންތައް ބޭއްވުން އުންމީދަކީ: މައުރޫފް

ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްކޮށްލުމާ ގުޅޭ ގޮތުން ނަގާ ޚިޔާލު ހޯދުމުގެ ވޯޓާ ގުޅިގެން ރައީސް ޑރ. މުހައްމަދު މުއިއްޒު ނެރުއްވި ގަރާރުގައި ގާނޫނާ ގާނޫނު އަސާސީ ގައި ބަޔާން ކުރާ ކަންކަން ފުރިހަމަނުވާތީ ޝަކުވާ ކުރެވޭނެ ހަމައެކަނި ތަނަކީ ކޯޓު ކަމަށް ވުމާއެކު ކޯޓަށް އެ މައްސަލަ ހުށަހެޅި ނަމަވެސް ކޯޓުން ފަހަރަކު ކަމެއް، ފަހަރަކު ކަމެއް ދަތިކުރަމުން ގޮސް 3 ފަހަރު އެ މައްސަލަ ރިޖެކްޓް ކޮށްފައިވާ ކަމަށް އެމްޑީޕީގެ ލީގަލް ޑިރެކްޓަރ އަހުމަދު މައުރޫފް ވިދާޅުވެއްޖެ އެވެ.

ރެފަރެންޑަމް ވޯޓާ ގުޅިގެން ހުކުރު ދުވަހު އެމްޑީޕީ އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މައުރޫފް ވިދާޅުވީ ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްކޮށްލުމާ ގުޅޭ ގޮތުން ނަގާ ޚިޔާލު ހޯދުމުގެ ވޯޓާ ގުޅިގެން ރައީސް މުއިއްޒު ނެރުއްވި ގަރާރުގައި ގާނޫނާ ގާނޫނުއަސާސީ ގައި ބަޔާން ކުރާ ކަންކަން ފުރިހަމަނުވާތީ އެ މައްސަލަ ސިވިލް ކޯޓަށް އެ ޕާޓީ ގެ ފަރާތުން ހުށަހަޅާފައިވާ ކަމަށެވެ. 

އެއީ އެ ޝަކުވާ ކުރެވޭނެ ހަމައެކަނި ތަނަކީ ކޯޓު ކަމަށް ވާތީ ކަމަށް ވެސް މައުރޫފް ވިދާޅުވި އެވެ. މައުރޫފް ވިދާޅުވީ އެ ބާވަތުގެ ދައުވާއަކީ ވެރިކަން ހިންގުމުގެ ފަރާތުން ކުރާ ކަމެއް ނޫނީ ނިންމާ ނިންމުމެއް، ޖުޑީޝިއަރީ އަށް ހުށަހަޅައިގެން އެ ރިވިއު ކުރުމަށް ފުރުސަތު ހޯދާ ބާވަތުގެ ދައުވާ އެއް ކަމަށެވެ. އެހެން ކަމުން އެންމެ ފުރަތަމަ އެމްޑީޕީ އިން މި މައްސަލަ ސިވިލް ކޯޓަށް ހުށަހެޅީ 25 ފެބްރުއަރީ ގައި ކަމަށް މައުރޫފް ވިދާޅުވި އެވެ.

އަޅުގަނޑުމެން ހުށަހެޅި ފޯމުގައި ހުރި ބައެއް ކަންކަން އިސްލާހު ކުރަން ކޯޓުން އަނެއް ދުވަހު އަންގާފައި ވޭ. ހަމަ އެ ދުވަހު އަޅުގަނޑުމެން އެކަންކަން އިސްލާހު ކޮށް، ފޯމު އަލުން ހުށަހެޅުމުން މާޗު 1 ވަނަ ދުވަހު އަނެއްކާ ވެސް އަޅުގަނޑުމެންނަށް ބައެއް ކަންކަން އިސްލާހު ކުރަން އެންގި. މި ކަންކަމުގެ ތެރޭގައި، ފުރަތަމަ އިސްލާހުކުރަން އެންގި ކަމެއްގެ ގޮތުގައި އޮތީ އެމްޑީޕީ އިން ހުށަހެޅި މައްސަލައަކަށް ވާތީ، އެމްޑީޕީ ގެ ރަޖިސްޓްރީ ގެ ކޮޕީ އަކާ، އެމްޑީޕީ ގެ ފަރާތުން މައްސަލަތައް ކޯޓަށް ހުށަހަޅާ އިރު ސޮއި ކުރަން ހުއްދަ އޮން ފަރާތް ކަނޑައަޅާފަ އޮންނަ ގަރާރުގެ ކޮޕީއަކާ މިހެން ގޮސް ޕާޓީގެ ފަރާތުން ހުށަހަޅަން ޖެހޭ ރަސްމީ ލިޔުންތައް ހުށަހަޅާފަ އަޅުގަނޑުމެން އޮންނާނީ. އެހެން ނަމަވެސް ކޯޓުން އެންގެވީ ސާފު ކޮޕީތަކެއް ހުށަހަޅަން. މިގޮތަށް ކޯޓުން އެންގެވުމާ ގުޅިގެން ހަމަ އެ ދުވަހު އަޅުގަނޑުމެން މި ދެންނެވި ލިޔުންތަކުގެ ސާފު ކޮޕީ ހުށަހެޅީ. މިއީ ހައި ކޯޓަށް ވެސް ސުޕްރީމް ކޯޓަށް ވެސް އަދި ސިވިލް ކޯޓަށް ވެސް މި ފަހުން އަޅުގަނޑުމެން ހުށަހެޅި މައްސަލަތަކާ ޕާޓީ އަށް ދައުވާ ލިބުނު މައްސަލަތަކުގަ ވެސް ހަމަ އަޅުގަނޑުމެން ކޯޓަށް ހުށަހެޅި ލިޔެކިޔުން މިއީ. ހަމަ އެ ފައިލް ހުށަހެޅީ. 

އެމްޑީޕީގެ ލީގަލް ޑިރެކްޓަރ އަހުމަދު މައުރޫފް 

މައުރޫފް ވިދާޅުވީ އެ ތަކެތި އަލުން ސާފު ކުރުމަށްފަހު ކޯޓަށް ހުށަހެޅުމުން މި މަހުގެ 5 ވަނަ ދުވަހު ކޯޓުން އަނެއްކާ ވެސް އިތުރު ކަމެއް އިސްލާހު ކުރުމަށް ކޯޓުން އެންގި ކަމަށެވެ. އޭގައި އޮތީ ހުށަހަޅައިގެން އުޅޭ މައްސަލައާ ގުޅޭ ކަން ހިނގިކަން އަންގައިދޭ ހެކިބަހުގެ ބަޔާނެއް ހުށަހެޅުމަށް ކަމަށް މައުރޫފް ވިދާޅުވި އެވެ. 

އަޅުގަނޑުމެންގެ މުޅި ދައުވާގަ ވެސް އަޅުގަނޑުމެން ފާހަގަކޮށްފަ އޮންނާނީ ރައީސް ނެރުއްވި ގަރާރުގައި، ގާނޫނުގައި އެ ބަޔާން ކުރާ ޝަރުތުތައް ނުވަތަ ގާނޫނުގައި ފުރިހަމަވާން ޖެހޭ ކަމަށް އެ ބުނާ ކަންކަން ފުރިހަމައެއް ނުވެއޭ. އެއީ ރައްޔިތުންގެ ފެންނަ ނުފެންނަ އާންމު ވޯޓަކަށް ދިއުމަށްޓަކައި ހުށަހަޅާ މައްސަލައާ އެއްކޮޅަށް ހުންނަ ހުއްޖަތްތަކުގެ ތަފްސީލު އެ ގަރާރުގައި ބަޔާން ކޮށްފައެއް ނެތޭ. އަޅުގަނޑުމެން ކޯޓަށް ހުށަހެޅި މައްސަލައިގަ މި ބުނަނީ ކަމެއް ނުހިނގާ ވާހަކަ. އެހެންވީމަ ކަމެއް ނުހިނގާކަން ސާބިތު ކޮށްދިނުމުގެ ޒިންމާއެއް މައްސަލަ ހުށަހަޅާ ފަރާތުގެ ނޯންނާނެ. 

އެމްޑީޕީގެ ލީގަލް ޑިރެކްޓަރ އަހުމަދު މައުރޫފް 

މައުރޫފް ވިދާޅުވީ މިފަދަ ގަރާރެއް ފުރިހަމަ ނޫން ކަމަށް ބުނެ ހުށަހަޅާ ދައުވާއެއްގައި މިހާތަނަށް ކޯޓުން އަމަލުކޮށްފައި އޮތް ގޮތަށް ބަލާއިރު ވެސް އަދި ގާނޫނު ތަކަށް ބަލާއިރު ވެސް ސާބިތު ކޮށްދިނުމުގެ ޒިންމާ އޮންނާނީ މި މައްސަލަ ރައްދުވާ ފަރާތަށް ކަމަށެވެ. އެއީ ދައުލަތް ކަމަށާ އެމްޑީޕީ އިން ކުރި ދައުވާގެ ޖަވާބުގައި ނުވަތަ ދައުވާގެ ރައްދުގައި ދައުލަތުން ސާބިތު ކޮށްދޭން ޖެހޭނީ އެ ގަރާރުގައި ކަންކަން ފުރިހަމަ ވާ ކަމަށް ވެސް މައުރޫފް ވިދާޅުވި އެވެ. އެހެން ނަމަވެސް ސިވިލް ކޯޓުން މިފަހަރު އަމަލު ކޮށްފަ ވަނީ އެހެންޏާ މައްސަލަތަކުގައި އަމަލުކުރާ ގޮތާ މުޅިން ޚިލާފަށް ކަމަށް މައުރޫފް ވިދާޅުވި އެވެ. 

ފަހަރަކު ކަމެއް ފަހަރަކު ކަމެއް އިސްލާހު ކުރުމަށް އަންގާ އިރު ފުރަތަމަ ފޯމު ހުށަހެޅުމުން އިސްލާހު ކުރަން ކަންކަން ހުރި ނަމަ ހުރިހާ ކަމެއް އެއްފަހަރާ އެންގި ނަމަ ފަސޭހަ ވީސް ކަން ފާހަގަކުރައްވާ މައުރޫފް ވިދާޅުވީ މިގޮތަށް 3 ފަހަރު މަތިން އެ ޕާޓީ އިން ހުށަހެޅި ފޯމު ސިވިލް ކޯޓުން ރިޖެކްޓް ކޮށްފައި ވާ ކަމަށެވެ.

މައުރޫފް ވިދާޅުވީ ކޮންމެ ފަހަރަކު ވެސް އެކަންކަން އިސްލާހު ކުރުމަށްފަހު އެ ޕާޓީ އިން ފޯމު ހުށަހަޅަމުންދާ ކަމަށާ އެގޮތުގެ މަތިން މިދިޔަ ބުދަ ދުވަހު ވެސް، ކުރިން ފާހަގަ ކުރި ހުރިހާ ކަމެއްގެ މައްޗަށް ބިނާ ކޮށް ކޯޓުން ބުނެފައިވާ ގޮތަށް ފޯމު ފުރިހަމަ ކޮށްފަ އަލުން ހުށަހަޅާފައިވާ ކަމަށެވެ. 

އެ މައްސަލަ ވީހާ ވެސް އަވަހަކަށް ރަޖިސްޓްރީކޮށް މައްސަލަ ކުރިއަށް ގެންދިއުމަކީ އެ ޕާޓީގެ އެންމެ ބޮޑު އެދުން ކަމަށާ މިއީ ހަމައެކަނި އެ ގަރާރު ބާތިލް ކަމަށް ކަނޑައަޅައިދނުމަށް ހުށަހެޅޭ ދައުވާ އެއްގެ އިތުރުން އެ ދައުވާ އާއެކު ވަގުތީ އަމުރަކަށް ވެސް އެދިފައި ވާނެ ކަމަށް ވެސް މައުރޫފް ވިދާޅުވި އެވެ.