ޕާޓީގެ ތެރެއިން ނިންމެން ހުންނަ ކަންކަން، ކޯޓު މެދުވެރިކޮށް ނިންމަން އުޅުމަކީ ހިތާމަ ކުރާ ކަމެއް: މީކާއީލް
އިންތިހާބުގެ ކަންކަން މިހާރު ކަނޑައެޅިފައިވާ ތާވަލާ އެއްގޮތަށް ކުރިއަށް ގެންދަންޖެހޭ ކަމަށާއި، ކުރިއަށް އޮތް ހަފްތާގައި ރ އަދި ޅ އަތޮޅަށް ކުރާ ދަތުރުގައި އޭނާގެ މެނިފެސްޓޯ އިފްތިތާހު ކުރާނެ ކަމަށް މީކާއިލް ފާހަގަކުރެއްވި. މީގެ އިތުރުން 2028 ވަނަ އަހަރުގެ ރިޔާސީ އިންތިހާބު ކާމިޔާބު ކުރުމުގެ ރޫހު ޕާޓީގެ އާންމު މެންބަރުންގެ ކިބައިން ފެންނަމުންދާ ކަމަށްވެސް އޭނާ ވިދާޅުވި.
ހޯމަ ދުވަހު އެމްޑީޕީ ހަރުގޭގައި ބޭއްވި ނޫސްވެރިންގެ ބައްދަލުވުމުގައި މީކައިލް ވާހަކަ ދައްކަވަނީ | ރާއްޖެ އެމްވީ
އެމްޑީޕީގެ އެތެރޭގެ މަސްލަހަތާ ގުޅޭ ކަންކަމުގައި ޕާޓީގެ ތެރެއިން ވާހަކަދައްކައިގެން ހައްލު ހޯދުމުގެ ބަދަލުގައި، ބައެއް ފަރާތްތަކުން ކޯޓު މެދުވެރިކޮށް މައްސަލަތައް ނިންމަން އުޅުމަކީ ހިތާމަކުރައްވާ ކަމެއް ކަމަށް އެމްޑީޕީގެ ޗެއަރޕާސަންގެ މަގާމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް ވިދާޅުވެއްޖެ އެވެ.
މީކާއިލް މިހެން ވިދާޅުވީ "އިތުބާރު" ކެމްޕެއިންގެ ފަރާތުން ހޯމަ ދުވަހު އެމްޑީޕީ ހަރުގޭގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުންނެވެ. މި ބައްދަލުވުމުގައި މީކާއިލް ވިދާޅުވީ، ޗެއަރޕާސަން ހޮވުމަށް ބާއްވާ އިންތިހާބުގެ ޓައިމްލައިން ބާތިލު ކުރުމަށް ސިވިލް ކޯޓަށް މައްސަލައެއް ހުށަހެޅުމަކީ އެމްޑީޕީގެ ސިފަތަކާ ވަރަށް ބޮޑަށް އިދިކީލަ ކަމެއް ކަމަށެވެ. އެމްޑީޕީ އަކީ އަބަދުވެސް އިންސާފުވެރި ކަމާއެކު، އާންމު މެންބަރުންނަށް ކަންކަން ނިންމުމުގެ ފުރުސަތުދޭ ޕާޓީއެއް ކަން އޭނާ ފާހަގަކުރެއްވި އެވެ.
އިންތިހާބުގެ ޓައިމްލައިން ބާތިލު ކުރުމަށް ސިވިލް ކޯޓަށް މައްސަލަ އެއް ވަނީ ހުށަހަޅާފަ. އަޅުގަނޑު ގަބޫލު ކުރަނީ މިއީ އެމްޑީޕީ ގެ އޮރިޖިނަލް އެމްޑީޕީގެ ސިފަތަކާ ވަރަށް އިދިކީލި ކަމެއްގެ ގޮތުގަ. އަޅުގަނޑު ދެކެނީ އެމްޑީޕީ އަކީ ވޯޓުން، އިންސާފުން ކަންކަން ނިންމާ، އެމްޑީޕީ ގެ އާއްމު މެމްބަރުންނަށް ކަންކަން ނިންމުމުގެ ފުރުސަތު ހުޅުވާލަދޭ ޕާޓީ އެއްގެ ގޮތުގަ އަޅުގަނޑު އެމްޑީޕީ ދަންނަނީ. އެހެން ކަމުން އަޅުގަނޑު ވަރަށް ހިތާމަ ކުރަން، ޕާޓީގެ ތެރޭގެ މަސްލަހަތު ނަގާލައި، ވާދަވެރި ޓީމުން މިފަދަ މައްސަލަ އެއް ސިވިލް ކޯޓަށް ހުށަހަޅައި، ޕާޓީ ތެރެއިން ނިންމެން ހުރި ގިނަ ކަންކަން ވެސް، ކޯޓު މެދުވެރިކޮށް ނިންމަން މަސައްކަތް ކުރަމުންދާތީ އަޅުގަނޑު ހިތާމަކުރާ ވާހަކަ ދަންނަވަން.އެމްޑީޕީގެ ޗެއަރޕާސަންގެ މަގާމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް
މީކާއިލް ވިދާޅުވި ގޮތުގައި އެމްޑީޕީ އެކަތިގަނޑެއްގެ ގޮތުގައި އޮވެގެން މަސައްކަތްކޮށް، 2028 ވަނަ އަހަރުގެ ރިޔާސީ އިންތިހާބު ކާމިޔާބު ކުރުމުގެ ރޫހު ޕާޓީގެ އާންމު މެންބަރުންގެ ފަރާތުން ވަރަށް ބޮޑަށް ފެންނަމުންދާ ކަމަށެވެ. "އިތުބާރު" ކެމްޕެއިން ޓީމުން ރަށްރަށަށް ކުރި ދަތުރުތަކުން މިކަން ވަރަށް ބޮޑަށް ސާފުވެގެން ދިޔަކަމަށްވެސް އޭނާ ވިދާޅުވި އެވެ.
ކެމްޕެއިންގެ ކުރިއަށް ހުރި ހަރަކާތްތަކާ ގުޅޭގޮތުން މައުލޫމާތު ދެއްވަމުން މީކާއިލް ވިދާޅުވީ، ފެށޭ ހަފްތާގައި ކެމްޕެއިން ޓީމުން ރ އަދި ޅ އަތޮޅަށް ދަތުރުތަކެއް ކުރުމަށް ހަމަޖެހިފައިވާ ކަމަށެވެ. މި ދަތުރުގެ ތެރެއިން އޭނާގެ ޗެއަރޕާސަން ކަމުގެ މެނިފެސްޓޯ ލޯންޗް ކުރާނެ ކަމަށާއި، އޭނާގެ ޗެއަރޕާސަން ކަމެއްގައި ޕާޓީގެ މެންބަރުންނަށް ހުށަހަޅާ ކަންކަން އޮޅުންފިލުވައިދޭނެ ކަމަށްވެސް ވިދާޅުވި އެވެ.
މީގެ އިތުރުން މީކާއިލް ވިދާޅުވީ، އެމްޑީޕީގެ ޗެއަރޕާސަން އިންތިހާބުގެ ކަންކަން ކުރިއަށްދާންވާނީ މިހާރު އެކުލަވާލެވިފައިވާ އުސޫލުތަކާއި، ޓައިމްލައިން އަދި ޑެޑްލައިންތަކާ އެއްގޮތްވާ ގޮތުގެ މަތިން ކަމަށެވެ. ޕާޓީގެ އެތެރޭގެ އިންތިހާބުތަކަކީ ޕާޓީގެ ހިންގާ ގަވާއިދާއި އުސޫލުތަކުގެ ތެރެއިން ކުރިއަށްދާންޖެހޭ ކަންކަން ކަމަށް އޭނާ ތަކުރާރުކޮށް ވިދާޅުވި އެވެ.
