އެމްއެމްޕީއާރުސީ މައްސަލައާއި ގުޅުވައި އޭސީސީ އިން ކުންފުންޏަށް ކުރަމުންދަނީ ކަނޑައެޅިގެން ދޮގު ތުހުމަތުތަކެއް: ޕޮޕިއުލަރ މޯލްޑިވްސް
ތ. އޮޅުގިރި ތަރައްޤީކުރުމަށް ހުރަސްއަޅައި، އޭސީސީން އެ ކުންފުންޏަށް ދޮގު ތުހުމަތުތަކެއް ކުރަމުންދާ ކަމަށް ބުނެ ޕޮޕިއުލަރ މޯލްޑިވްސް އިން ކޯޓަށް ދާން ވަނީ ނިންމާފައި. ހަތް އަހަރު ފަހުން މި މައްސަލަ ޕީޖީ އޮފީހަށް ފޮނުވީ ކޯޓަށް މައްސަލަ ހުށަހެޅުމުން ކުންފުނީގެ އަގުވައްޓާލުމަށް ކަމަށް ތުހުމަތުކޮށް، އެއްބަސްވުންތައް އުވައިލުމަށް އެންގުމުގެ ޤާނޫނީ ބާރު އޭސީސީއަށް ލިބިގެން ނުވާ ކަމަށްވެސް އެ ކުންފުނިން ބުނެފައިވޭ.
އެންޓި ކޮރަޕްޝަން ކޮމިޝަން | އޭސީސީ
އެމްއެމްޕީއާރުސީގެ މައްސަލައާ ގުޅުވައިގެން އެންޓި ކޮރަޕްޝަން ކޮމިޝަން (އޭސީސީ) އިން އެ ކުންފުންޏަށް ކުރަމުންދަނީ ކަނޑައެޅިގެން ދޮގު ތުހުމަތުތަކެއް ކަމަށް ޕޮޕިއުލަރ މޯލްޑިވްސް ޕްރައިވެޓް ލިމިޓެޑުން ބުނެފި އެވެ.
އެ ކުންފުނިން ނެރުނު ނޫސްބަޔާނެއްގައި ބުނެފައިވަނީ އެމްއެމްޕީއާރުސީން ވިއްކި ރަށްތައް އޭސީސީން ހުއްޓުވުމަށްފަހު، ގާތްގަނޑަކަށް ހުރިހާ ރަށެއްހެން މިހާރު ތަރައްޤީކުރަން ދޫކޮށްލާފައިވާ ކަމަށާއި، ގިނަ ރަށްތަކެއް ތަރައްޤީކޮށް ނިމި ހިންގަން ފަށާފައިވާ ކަމަށެވެ.
ނަމަވެސް ހަތް އަހަރު ވެގެންދިޔައިރުވެސް ތ. އޮޅުގިރި ދޫކޮށްފައި ނުވާކަން ފާހަގަކޮށް އެ ކުންފުނިން ބުނީ، ފާއިތުވި ހަތް އަހަރުގެ ތެރޭގައި އެ ރަށް ތަރައްޤީކުރަން ކުރި އެއްވެސް މަސައްކަތެއް ކާމިޔާބުނުވެ އޮތީ ބަލަމުންދާ މައްސަލައެއް އޮތް ކަމަށް ބުނެ އޭސީސީން އިންވެސްޓަރުން ބިރުގަންނުވަމުން ދާތީ ކަމަށެވެ. އަދި އޭސީސީން ހަތް އަހަރު ވަންދެން އެ ރަށް ހިފަހައްޓާފައިވަނީ ނުސީދާ މަގަކުން ކަމެއް ހާސިލުކުރުމަށްތޯ ވެސް އެ ކުންފުނިން ވަނީ ސުވާލު އުފައްދާފަ އެވެ.
ޕޮޕިއުލަރ މޯލްޑިވްސް އިން ބުނި ގޮތުގައި އޮޅުގިރިއަކީ އެ ކުންފުނިން ހައްޤު ގޮތުގައި އަގުދައްކާފައިވާ ރަށަކަށްވާތީ، އެ ހައްޤު ހޯދުމަށް ޝަރީޢަތަށް ދިއުމަށް މިހާރު ވަނީ ނިންމާފަ އެވެ. އެގޮތުން 2025 ވަނަ އަހަރުގެ ޑިސެމްބަރު މަހު އެ ކުންފުނީގެ ފަރާތުން ސިވިލް ކޯޓަށް މައްސަލަ ހުށަހެޅުމުން، އެ މައްސަލައަށް ޖަވާބުދާރީވުމަށް ކޯޓުން އޭސީސީގެ މައްޗަށް އަމުރުކޮށްފައިވާ ކަމަށްވެސް ބަޔާނުގައިވެ އެވެ.
އޭސީސީން އެންމެ ފަހުން ޕްރޮސިކިއުޓަރ ޖެނެރަލްގެ އޮފީހަށް މައްސަލަ ފޮނުވާފައިވަނީ ކޯޓުން އަމުރު ނެރުމާ ގުޅިގެން ކަމަށް ޕޮޕިއުލަރ މޯލްޑިވްސް އިން ތުހުމަތުކުރެ އެވެ. އެ ކުންފުނިން ބުނީ އޭސީސީގެ ކިބައިގައި އިޚުލާޞްތެރިކަމެއް އޮތް ނަމަ ހަތް އަހަރު ވަންދެން މައްސަލަ ނުނިންމާ ހިފަހައްޓައިގެން ތިބެން ނުޖެހޭނެ ކަމަށެވެ. އަދި ހަތް އަހަރަށްފަހު ކުއްލިއަކަށް ޕީޖީ އޮފީހަށް މައްސަލަ ފޮނުވީ ކުންފުނީގެ އަގުވައްޓާލުމަށާއި، ކޮމިޝަނުން ކުރާ ނުޙައްޤު ޑިމާންޑްތަކަށް ބޯނުލެނބުމުން ކަމަށްވެސް ބަޔާނުގައި ބުނެފައިވެ އެވެ.
މީގެ އިތުރުން ދައުލަތުން އެކި ފަރާތްތަކާއެކު ވެފައިވާ މަދަނީ އެއްބަސްވުންތައް އުވައިލުމަށް އެންގުމަކީ އޭސީސީއަށް ލިބިގެންވާ ޤާނޫނީ އިޚުތިޔާރެއް ނޫން ކަމަށް އެ ކުންފުނިން ބުނެ އެވެ. އަދި އެއްބަސްވުން އުވައިލަން އަންގާފައިވާ ކަމަށް ބުނެ ޚަބަރު ފަތުރަނީ ހިނގަމުންދާ މައްސަލައަށް ނުފޫޒު ފޯރުވުމުގެ ގޮތުން ކަމަށް ދެކޭ ކަމަށާއި، އެއީ ޤާނޫނީ އިމުގެ ތެރެއިން އިދާރާއަކުން ކުރަން އެކަށީގެންވާ ކަމެއް ނޫން ކަމަށްވެސް 10 މޭ 2026 ގައި ނެރުނު މި ބަޔާނުގައި ޕޮޕިއުލަރ މޯލްޑިވްސް އިން ބުނެފައިވެ އެވެ.
