އަހަރެންގެ ޞިއްޙީ ޗެކަޕް ވަރަށް "ފުރިހަމަ": ޓްރަމްޕް
ޓްރަމްޕްގެ ޗެކަޕްއާ ގުޅޭ ގޮތުން ވައިޓް ހައުސް އިން އިތުރު ތަފްސީލެއް ދީފައި ނުވާއިރު، ކުރިއަށް އޮތް ދުވަސް ތަކުގައި ޗެކަޕްގެ ޚުލާސާއެއް ޓްރަމްޕްގެ ޑޮކްޓަރު ތައްޔާރު ކުރާނެ ކަމަށް ބެލެވޭ. ނަމަވެސް، އެ ރިޕޯޓުން ހާމަ ކުރާނީ ކިހާ މައުލޫމާތެއް ކަމެއް ނިންމާނީ ވައިޓް ހައުސް އިން.
އެމެރިކާގެ ރައީސް ޑޮނަލްޑް ޓްރަމްޕް. | ގެޓީ އިމޭޖަސް
އަންގާރަ ދުވަހު ހެއްދެވި ޞިއްޙީ ޗެކަޕް ވަރަށް ފުރިހަމަ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕް މިހެން ވިދާޅުވެފައި ވަނީ، އަންގާރަ ދުވަހު ވޯލްޓާ ރީޑް މިލިޓަރީ ހޮސްޕިޓަލް އަށް ވަޑައިގެން ޗެކަޕެއް ފުރިހަމަ ކުރެއްވުމަށް ފަހު އެވެ. ޗެކަޕް އަށް ފަހު ޓްރަމްޕް ސޯޝަލް މީޑިއާގައި ލިޔުއްވާފައި ވަނީ، ހުރިހާ ކަމެއް ވެސް ވަރަށް ފުރިހަމަ އަދި ރަނގަޅު ކަމަށެވެ. އަދި ވައިޓް ހައުސް އިން ވެސް ވަނީ ޓްރަމްޕްގެ ފޮޓޯއެއް ހިއްސާކޮށް، "ފުރިހަމަ ޞިއްޙަތެއް" މިހެން ޖަހައިފަ އެވެ.
މިއީ އެމެރިކާގެ ރިޔާސީ ދެ ވަނަ ދައުރަކަށް ވަޑައިގެންނެވި ފަހުން ޓްރަމްޕްގ ޗެކަޕެއް ހެއްދެވި ތިން ވަނަ ފަހަރަވެ. ޓްރަމްޕްގެ އަތުގައި ނޫފައިގެންފައި ހުންނަ ނިޝާން ތަކާއި، ލޭ ގަނޑުވެފައި ހުންނަ ނިޝާންތައް ފެންނަމުން ދާއިރު، އެތައް ބަޔަކު ވަނީ ޓްރަމްޕްގެ ޞިއްޙީ ޙާލު ކޮޅާ މެދު ކަންބޮޑުވުން ފާޅު ކޮށްފަ އެވެ.
ޓްރަމްޕްގެ ޗެކަޕްއާ ގުޅޭ ގޮތުން ވައިޓް ހައުސް އިން އިތުރު ތަފްސީލެއް ދީފައި ނުވާއިރު، ކުރިއަށް އޮތް ދުވަސް ތަކުގައި ޗެކަޕްގެ ޚުލާސާއެއް ޓްރަމްޕްގެ ޑޮކްޓަރު ތައްޔާރު ކުރާނެ ކަމަށް ބެލެވެ އެވެ. ނަމަވެސް، އެ ރިޕޯޓުން ހާމަ ކުރާނީ ކިހާ މައުލޫމާތެއް ކަމެއް ނިންމާނީ ވައިޓް ހައުސް އިންނެވެ.
އަންގާރަ ދުވަހު ޓްރަމްޕް ވިދާޅުވެފައި ވަނީ، އެ ދުވަހު އޭނާ ހެއްދެވީ ހަ މަސް ދުވަހުގެ ޗެކަޕެއް ކަމަށެވެ. ނަމަވެސް، މެއި މަހުގެ ކުރީ ކޮޅު ވައިޓް ހައުސް އިން ބުނެފައި ވަނީ، ޓްރަމްޕް ހޯއްދަވަނީ ދަތުގެ ފަރުވާއެއް ކަމަށާއި، ދެން ހައްދަވަނީ ޞިއްޙީ ޗެކަޕެއް ކަމަށެވެ.
އެންމެ ފަހުން ޓްރަމްޕް އަހަރީ ޗެކަޕެއް ހައްދަވާފައި ވަނީ 2025 ވަނަ އަހަރުގެ އޭޕްރީލް މަހު އެވެ. ނަމަވެސް، އެ އަހަރުގެ އޮކްޓޫބަރު މަހު ޓްރަމްޕް ވަނީ އަނެއްކާ ވެސް ހޮސްޕިޓަލް އަށް ވަޑައިގެންފަ އެވެ. އެ ފަހަރު ވެސް ވައިޓް ހައުސް އިން ބުނީ އެއީ އަހަރީ ޗެކަޕެއް ކަމަށެވެ.
ޞިއްޙީ ޙާލު ކޮޅާ ގުޅޭ ގޮތުން ޓްރަމްޕް ވިދާޅުވެފައި ވަނީ، އޭނާ އަށް އިޙުސާސް ކުރެވެނީ އުމުރު މިހާރު ހުރީ 50 އަހަރުގައި ކަމަށެވެ. ޓްރަމްޕް އަކީ ކެއުމުގައި ވަރަށް ގިނައިން ކޯކު ބޭނުން ކުރައްވާ ބޭފުޅެއް ކަމަށާއި، ވަރަށް ގިނައިން ފާސްޓް ފުޑް ބޭނުން ކުރައްވާ ބޭފުޅެއް ކަމަށް ވެސް ރިޕޯޓު ކޮށްފައިވެ އެވެ. އެ ރިޕޯޓުތައް ކޮށްފައި ވަނިކޮށް ޓްރަމްޕް ވިދާޅުވެފައި ވަނީ، އޭނާ އަށް ފަހަކަށް އައިސް ޖަންކް ފުޑް ވަރަށް ކަމުދާ ކަމަށެވެ.
މަސްދަރު: އޭއެފްޕީ
