އޮބާމާގެ 850 މިލިއަން ޑޮލަރުގެ ޕްރެޒިޑެންޝަލް ސެންޓަރު ހުޅުވަނީ

އެމެރިކާގެ 44 ވަނަ ރައީސް ބަރަކް އޮބާމާގެ ޝަރަފުގައި ޗިކާގޯގެ ސައުތު ސައިޑްގައި ބިނާކުރި "އޮބާމާ ޕްރެޒިޑެންޝަލް ސެންޓަރު" ހުޅުވުމަށް ތައްޔާރު ވެއްޖެ އެވެ.

ގާތް ގަނޑަކަށް 850 މިލިއަން ޑޮލަރުގެ ބޮޑު ހޭދައެއް ކޮށްގެން ބިނާކުރި މި މަރުކަޒަކީ އެމެރިކާގެ ތާރީޚުގައި ވެސް ރައީސަކަށް ޓަކައި ބިނާކުރި އެންމެ އަގު ބޮޑު އަދި އެންމެ ބޮޑު ބިނާއެވެ. 70 މީޓަރުގެ އުސް މި އިމާރާތަކީ އޮބާމާގެ ވެރިކަމުގެ ހަނދާން ތަކާއި، އޭނާގެ ފަލްސަފާ ދައްކުވައިދޭ ގޮތަށް ފަރުމާ ކޮށްފައިވާ ތަނެކެވެ.

މި ބިނާގެ ފަރުމާ އަށް ބަލާއިރު، މިއީ ވަރަށް ތަފާތު އަދި ބައެއް މީހުންގެ ފާޑު ކިޔުންތައް އަމާޒު ވެފައިވާ އިމާރާތެކެވެ. ކުޑަ ދޮރުތައް މަދު، ގްރެނައިޓް ހިލައިން ބިނާ ކޮށްފައިވާ މި ޓަވަރު ބައެއް މީހުން ސިފަ ކުރަނީ ސައިންސް ފިކްޝަން ފިލްމު ތަކުން ފެންނަ "ކްލިންގޮން ޖަލެއް" ނުވަތަ ބަންކަރެއްގެ ގޮތުގައި އެވެ. އާކިޓެކްޓް ބިލީ ސިއެން ވިދާޅުވި ގޮތުގައި، މި އިމާރާތް ފަރުމާ ކުރުމުގައި އޮބާމާ އަމަލީ ގޮތުން ވަރަށް ބޮޑަށް ބައިވެރިވެ ވަޑައިގެންނެވި އެވެ. އޮބާމާ ބޭނުންފުޅުވީ މިއީ އުންމީދުގެ ދަތުރު ދައްކުވައިދޭ "ބީކަން" އެއްގެ ގޮތުގައި ފެންނާށެވެ.

މި މަރުކަޒުގެ ފާރުތަކުގައި އޮބާމާގެ މަޝްހޫރު ބަސްފުޅުތައް ކަނޑައި ނެގިފައިވާއިރު، މީގެ ތެރޭގައި ސެލްމާ މާޗުގެ 50 ވަނަ އަހަރީ ދުވަހު އޭނާ ދެއްވި ތަގުރީރުގެ ބައިތައް ހިމެނެ އެވެ. 19 އޭކަރުގެ މި ކެމްޕަހުގައި ހަތަރު އިމާރާތެއް ހިމެނެ އެވެ.

އޭގެ ތެރޭގައި އޮޑިޓޯރިއަމް އަކާއި، ކެފޭ އަކާއި، ޗިކާގޯ ޕަބްލިކް ލައިބްރަރީގެ ގޮފި ތަކުގެ އިތުރުން، އޮބާމާގެ އަނބިކަނބަލުން މިޝޭލް އޮބާމާ ވައިޓް ހައުސްގެ ބަގީޗާ އިން އިންސްޕިރޭޝަން ހޯދައިގެން ހަދާފައިވާ ބަގީޗާ ތަކާއި، ކުޅިވަރު ކުޅޭ ސަރަހައްދުތައް ހިމެނެ އެވެ. މީގެ އިތުރުން އެންބީއޭ ފެންވަރުގެ ބާސްކެޓު ބޯޅަ ކޯޓެއް ވެސް މިތަނުގައި ވަނީ ގާއިމު ކޮށްފައި އެވެ.

މިއީ އެމެރިކާގެ ތާރީޚުގައި ފިޒިކަލް އަރުޝީފެއް ނުވަތަ ފޮތް ތަކެއް ނެތް ފުރަތަމަ ޑިޖިޓަލް ޕްރެޒިޑެންޝަލް ލައިބްރަރީ އެވެ. މިތަން ހިންގަނީ ސަރުކާރުގެ ނޭޝަނަލް އާކައިވްސް އިން ނޫން ކަމަށާއި، އެއީ އޮބާމާގެ އަމިއްލަ ފައުންޑޭޝަނުން ހިންގާ ތަނެއް ކަމަށް ވާތީ ބައެއް ތާރީޚު އިލްމުވެރިން ވަނީ ކަންބޮޑުވުން ފާޅު ކޮށްފައި އެވެ. 30 ޑޮލަރުގެ ޓިކެޓެއް ގަނެގެން ވަދެވޭ މި މަރުކަޒުގައި އޮބާމާގެ ދެމަފިރިންގެ ހަޔާތުގެ ދަތުރާއި، ސިވިލް ރައިޓްސް ހަރަކާތް ތަކާއި، ވައިޓް ހައުސްގެ އޯވަލް އޮފީހުގެ ފުލް-ސްކޭލް ރެޕްލިކާއެއް ވެސް ބަލައި ލެވޭނެ އެވެ.

މި މަޝްރޫއާ ގުޅިގެން ޗިކާގޯގެ އާންމުންގެ މެދުގައި ބޮޑެތި ބަހުސް ތަކެއް ވަނީ އުފެދިފައި އެވެ. ޚާއްސަކޮށް ތާރީޚީ ޖެކްސަން ޕާކުގެ ބައެއްގައި މި އިމާރާތް އެޅުމުން ތިމާވެށި ރައްކާތެރި ކުރާ ފަރާތް ތަކުން ދައުވާތައް އުފުލާފައިވެ އެވެ. އަދި މި ބިނާގެ ސަބަބުން އެ ސަރަހައްދުގެ ކުލި ބޮޑުވެ، އާމްދަނީ މަދު އާއިލާ ތަކަށް ދިރިއުޅެން ދަތި ވެދާނެ ކަމުގެ ބިރު ވެސް ވަނީ އުފެދިފައި އެވެ.

އޮބާމާ ފައުންޑޭޝަން އިން ބުނާ ގޮތުގައި މި މަރުކަޒުގެ ސަބަބުން އެ ސަރަހައްދުގެ އިގްތިސާދަށް 3.1 ބިލިއަން އެމެރިކާ ޑޮލަރުގެ ކުރިއެރުމެއް ލިބިގެންދާނެ އެވެ.